Proverbios 27 - DIOSPA QHELQACHISQ

¹ Ama q'aya p'unchaymanta jatunta yuyaychu, imaraykuchus mana yachankichu q'aya imachus kanantaqa.

² Ama qan kikiyki jatunchakuychu. Aswan walej wajkuna jatunchanasunku.

³ Rumiwan, t'iyuwanqa llasa kanku. Wampu runaj phiñakuyninrí astawan llasaraj.

⁴ Phiñakoyqa mana khuyakuyniyoj, k'araj phiñakuytaj mana atipay atina. Celosakuyrí sayachiy mana atinapuni.

⁵ Uyanpi nipuna aswan allin, munakuspa mana imatapis ninamanta nisqaqa.

⁶ Kawsaqenchej k'amiwajtinchej, paypi atinikuyta atinchej. Awqanchej much'aykuwajtinchejpis, manapuni paypi atinikunachu.

⁷ Pichus sajsasqa kajqa abeja misk'itapis mana qhawarinñachu. Yarqhasqa runarí k'arkutapis misk'ita mikhuykun.

⁸ Imaynatachus p'isqo thapanmanta karupi phawaykachamun, ajinallataj ayllunmanta karupi purimoj runaqa.

⁹ Sumajta q'apashaj jawinaqa sonqota kusichin, ajinallataj k'acha kawsaqej yuyaychasqanqa runatapis kusichillantaj.

¹⁰ Amapuni kawsaqeykitaqa saqeychu, nitaj tataykej kawsaqenmanta qonqaychu. Llakiy phutiypi kaspaqa, ama wawqeykej wasinman riychu. Aswan allinmin qayllapi wasi masillaykej wasinman rinayki karupi kaj wawqeykiman rinaykimantaqa.

¹¹ Wawáy, yachayniyoj kay, ajinaqa sonqoyta kusichiwanki. Ajinamanta phiñachiwajkunaman kutichisaj.

¹² Yuyayniyojqa mana allin kajta rikuspa ayqekun. Mana yuyayniyojrí chimpaykullan, chantá uma nanayta tarikusqanwan ñak'arin.

¹³ Mana rejsisqanmanta garante sayajmantaqa p'achanta jap'ispa, prendata qhepachiy.

¹⁴ Tutallamanta runa masita qhaparispa napaykunaqa mana allinchu. Paypajqa payta maldicishawajpis jina kanqa.

¹⁵ Paray tiempopi wasi ukhuman para sut'umullanpuni. Chayman rijch'akun phiñanakuta mask'aj warmeqa.

¹⁶ Payta jark'anaqa wayratapis sayachiyta munay jinalla, chayrí aceitetapis makinchejpi jap'iyta munasunman jina.

¹⁷ Fierroqa fierrollawantaj filochakun. Runatapis runallataj aswan k'achaman tukuchin.

¹⁸ Pichus higo sach'ata qarpajqa poqoyninta mikhonqa. Pichus patronninpa kapuyninta qhawajqa t'inkachisqa kanqa.

¹⁹ Imaynatachus runa uyanta yakupi qhawakuspa imaynachus kasqanta reparan, ajinallataj runaj sonqonta allinta rejsispa, imayna runachus kasqanta yachanchej.

²⁰ Wañuywan, ukhu pachawan ima mana jayk'aj sajsankuchu. Jinallataj runaj munapayayninpis mana sajsakunchu.

²¹ Qorita, qolqe metaltawanqa ninapi unuyachispa ch'uwachanchej. Runatajrí paymanta allinta parlajtinku, imaynachus kasqan yachakun.

²² Wampu runamantaqa wampu kayninta mana orqhosunmanchu, maranpi kutin kutinta trigota jina kutashaspapis.

²³ Ovejaykikuna imaynachus kasqankuta allinta qhaway. Uywaykikunataqa allinta michiy,

²⁴ imaraykuchus qhapajyayqa mana wiñaypajchu, nitaj kamachej kaypis wiñaypajchu.

²⁵ Ch'iki ijimojtin, q'achupis rikhurejtin, orqokunapitaj q'achu ruthusqa kajtin,

²⁶ chaypacha p'achallikunaykipaj ovejaykikunamanta millmanta ruthunki. Chivoykikunata vendespapis qolqechakunki, jallp'ata rantikunaykipaj.

²⁷ Jinallatataj cabraykikunamanta ashkha lecheta ch'awanki, qan, aylluykiwan, kamachiykikunawan ima ujyanaykichejpaj.