Proverbios 25 - DIOSPA QHELQACHISQ

Salomonpa yachaywan waj nisqankuna

¹ Kaykunapis Salomonpa nisqankuna kanku. Chaykunatataj Judá suyupi kuraj kamachej Ezequiaspa qhelqerinkuna tantaspa qhelqarqanku.

² Diosqa wakin yachayta pakaspa, may jatun kasqanmanta yachayta qowanchej. Kuraj kamachejtajrí chay pakasqa kajta sut'inchaspa, chaymanta jatunchasqa kanqa.

³ Janaj maykamachus kasqan, jallp'aj sonqon may ukhuchus kasqan, chantá kuraj kamachej imapichus yuyasqan imaqa, mana unanchay atina kanku.

⁴ Qolqe metalta unuyachispa ch'ichinta orqhonchej, chaymantataj pichus alajata ruwayta yachajqa qolqe vasota ruwanqa.

⁵ Ajinallatataj kuraj kamachejqa mana allin yuyaychajkunata qayllanmanta wijch'ojtin, kamachiynin sinch'i sayanqa, cheqan kajta ruwasqanrayku.

⁶ Kuraj kamachejpa ñawpaqenpi ama runaykachaychu, nitaj maypaj qhawasqa runakunaj kanankupi kaychu.

⁷ Manachayqa suyariy kamachej: Noqaman chimpamuy, nispa nisunanta. Sichus qanllamanta maypaj qhawasqa runakunaj kananman rinki chayqa, ichapis kamachej chaymanta wijch'ususpa, p'enqaypi rikhurichisunkiman. Imatachus rikusqaykitaqa

⁸ ama chaypachapacha juezman willamuychu. Pajtataj waj testigo llullapaj jap'ichisunkiman, p'enqaypitaj rikhurichisunkiman.

⁹ Runa masiyki ch'ataykusojtin, kutichikuyta atinki. Chaywanpis ama willankichu imatachus waj runa pakaypi willasorqa, chayta.

¹⁰ Pajtataj pillapis chayta uyarisoj: Cuento q'epi kanki, nispa p'enqachisunkiman, jinapitaj p'enqachisqa kasqayki mana chinkanqachu.

¹¹ Maychus tiemponpi allinta parlayqa qolqewan t'ikanchasqa qori manzana jina.

¹² Sichus pipis yachayniyoj runata maychus kajta k'amin chayqa, chay yachayniyoj k'amisqanta qori anillota jina qhawan, chayrí qori walqata jina.

¹³ Sumajta ruphamushajtin, chiri wayritaqa may sumajmin. Ajinallataj pichus kachasqa kaspa kachanpa nisqanta maychus kajta junt'an, chay runaqa. Payqa kamachejninpa sonqonta oqharirin.

¹⁴ Pichus: Qosqayki, nishaspa mana imatapis qonchu, chay runaqa rijch'akun wayraj apasqan phuyuman, mayqenchus mana paranchu, chayman.

¹⁵ Kuraj kamachejpa phiñakuynintaqa alliyllamanta tiyaykuchina, llamp'u simiwan parlaytaj rumi sonqota llamp'uyachin.

¹⁶ Sichus abeja misk'ita tarinki chayqa, pisillata mikhuy. Pajtataj anchata mikhuspa, kutichimuwaj.

¹⁷ Jinallataj ama kawsaqeykej wasinman sapa kuti riychu. Pajtataj qanwan amichikuspa chejnikusunkiman.

¹⁸ Pichus runa masinpa contranta llullakuspa parlajqa garrotemanta, espadamanta, chayrí filo puntayoj flechamantapis astawanraj nanachin.

¹⁹ Llakiypi kashaspa, manapuni wasanchaj runapi atinikunachu. Chay ninakun chaki p'akisqawan purinaman, chayrí jusk'usqa kiruwanpis mikhunawan.

²⁰ Llakisqa sonqoyojpaj mana kusiy takiyta takipunachu. Chay ninakun chiri p'unchaypi p'achata qhechunawan, chayrí llejtiman vinagreta jich'aykunawan.

²¹ Awqaykichus yarqhachikonqa chayqa, mikhunata jaywariy. Ch'akichikonqachus chayqa, yakuta jaywariy.

²² Ajinata ruwanki chayqa, awqaykej uyan p'enqakuymanta pukayanqataj, yanayarenqataj. Tata Diostaj chaymanta kutichipusonqa.

²³ Wichaynejmanta wayramojtin, para chayamunpuni. Ajinallataj runaj wasallanmanta parlajqa runata phiñachinpuni.

²⁴ Aswan allin wasi patio k'uchullapi tiyakuna, jatun wasipi phiñanakuta mask'aj warmiwan tiyanamanta nisqaqa.

²⁵ Chiri yakoqa ch'akisqa runapaj may sumajmin. Ajinallataj karu suyumanta chayamoj sumaj willaykunapis.

²⁶ Pichus cheqan runa kaspa millayta ruwajwan apachikun, chay runa rijch'akun qonchu yaku juturiman chayrí asnashaj yaku qochaman.

²⁷ Mana allinchu abeja misk'ita ancha ashkhata mikhoyqa. Manallataj allinchu jatunchasqa kanata mask'akoyqa.

²⁸ Pichus sapa kuti sonqonwan apachikojqa thuñisqa perqayoj llajta jina.