Proverbios 24 - DIOSPA QHELQACHISQ

-19 -

¹ Ama millayta ruwaspa purej runakunata moq'espa qhawaychu, nitaj paykunawan khuska puriyta munaychu.

² Paykunaqa suwanallapi yuyanku, sajrata ruwanallamantapunitaj parlanku.

-20 -

³ Wasitaqa yachaywan jatarichina, allinta yuyaychakuspataj cimientontapis churana.

⁴ Yuyayniyoj runaj wasenqa imaymana k'achitu valorniyoj imakunawan junt'a kashan.

-21 -

⁵ Aswan allin yachayniyoj runa kallpayoj runamanta nisqaqa. Yachayniyoj kanaqa aswan allin atiyniyoj kanamantaqa.

⁶ Chayrayku awqawan maqanakoj rinapajqa allintaraj yuyaycharikuna. Atipanapajqa ashkha yuyaychajkunawan yuyaychachikuna.

-22 -

⁷ Wampoqa kurajkunaj ñawpaqenkupi mana imatapis niyta atinchu, imaraykuchus pay yachayniyoj kayta mana taripanchu.

-23 -

⁸ Pichus mana allinta ruwanallapi yuyajqa millayta ruwaj runapaj qhawasqa kanqa.

⁹ Wampu runaqa juchallinallapi yuyan. Alqochakoj runataqa ni pi rikuyta munanchu.

-24 -

¹⁰ Sichus ima llakiypi rikhurispa q'ewayawaj chayqa, mana kallpayoj kasqaykita rikuchinki.

-25 -

¹¹ Mana imallamanta juchachasqa kajkunata wañuchisqa kanankumanta kacharichiy, jinallataj wañuy patapiña kashajkunatapis libray.

¹² Sichus qan niwaj: Manapuni yacharqaykuchu, nispa chayqa, pichus sonqoykita rikojqa yachanpuni, ruwasqaykita rikusojtaj qhawanqa. Payqa sapa ujman ruwasqanman jina qoponqa.

-26 -

¹³ Wawáy, abeja misk'ita mikhurikuy, imayna misk'ichus kasqanta llamiriy.

¹⁴ Ajinallataj yachaywan, yachayniyoj kaywan ima misk'illataj kanku. Chaykunata tarinki chayqa, jamoj p'unchay qanpaj allin kanqa. Ajinamanta imatachus suyakusqaykeqa mana chinkanqachu.

-27 -

¹⁵ Ama cheqanta ruwajpa contranpi ima mana allintapis ruwayta yuyaychu, nitaj wasinmanta imatapis suwaychu.

¹⁶ Cheqan runaqa qanchis kutita urmanqa chaypis, payqa qanchis kutillatataj sayarikun. Mana allinta ruwaj runakunarí jatun llakiypi urmaspa, manaña ujtawan sayarenqankuchu.

-28 -

¹⁷ Ama kusikuychu, nitaj raymita ruwaychu, awqayki misk'ajtin, chayrí urmajtinpis.

¹⁸ Pajtataj Tata Dios asikusqaykimanta phiñakunman, awqaykipajtaj manaña phiñakunmanchu.

-29 -

¹⁹ Ama millayta ruwajkunarayku phiñakuychu, nitaj moq'espa qhawaychu,

²⁰ imaraykuchus paytaqa manapuni allinchu renqa. Millayta ruwaj runaqa mechero jina wañonqa.

-30 -

²¹ Tata Diosta, chantá kuraj kamachejtawan jatun respetowan qhaway, wawáy. Mana kasukojkunawanqa ama tantakuychu.

²² Chay runakunaj tukukuyninkoqa ujllata chayarparimonqa. Ni pi yachanchu ima jatun llakiymanchus Tata Dioswan, kuraj kamachejwan ima paykunata churanankuta.

Waj yachayniyojkunaj nisqanku

²³ Kaykunapis waj yachayniyojkunaj nisqankunallataj kanku: Justiciata ruwaspa, wakillanta allinpaj qhawanaqa mana allinchu.

²⁴ Sichus juez juchayojta nin: Mana juchayojchu kanki, nispa chayqa, llajtayojkuna juezta maldicenqanku, suyukunapis payta chejnenqanku.

²⁵ Aswanpis juchayojta juchachaj juezkunata tukuy imapi allin renqa, jinallataj saminchasqa kanqanku.

²⁶ Pichus cheqanta kutichejqa misk'itapis much'aykushanman jina.

²⁷ Ñawpajta imachus ruwanaykitaraj ruwamuy, tarpunaykipajpis jallp'ata llank'ay. Chaymantaraj wasiykita ruwayta atinki.

²⁸ Ama runa masiykej contranta qhasimanta testigo kaychu, amataj ima llullatapis parlaychu.

²⁹ Ama niychu: Imaynatachus ruwawarqa, kikillantataj ruwasaj, ruwawasqanman jinataj kutichisaj, nispaqa.

³⁰ Qhella runaj chajrannejta rerqani, mana yuyayniyoj wampu runaj uva huertannejta ima.

³¹ Chajranpi qhoralla junt'aykusqanta rikorqani, rumi perqanpis thuñisqa kasqanta.

³² Chayta rikuspa, sonqoypi unancharqani, chayta qhawarispataj, kayta yachaqakorqani:

³³ Puñunaykikama, uj chhikanta ch'irminaykikama, makiykita ojllakuspa puñunaykikamataj,

³⁴ wajchayayqa suwa jina chayamusonqa, pisichikuytaj maqanakoj runa jina jamusonqa.