Proverbios 21 - DIOSPA QHELQACHISQ

¹ Kuraj kamachejpa imatachus yuyasqanqa Tata Diospa makinpi mayu jina, Tata Diostaj maynintachus munasqanman jina pusan.

² Runamanqa tukuy ima ruwasqanpis allillan rijch'an. Chaywanpis ima yuyaywanchus chayta ruwasqanta Tata Dioslla qhawan.

³ Tata Dios astawan munan cheqan kajta, allin kajtawan ruwananchejta, uywa ñak'asqata jaywananchejmanta nisqaqa.

⁴ May kasqanta yuyakuna, runaykachana, millayta ruwaspa purej runa jina purina ima, chay kinsantin jucha kanku.

⁵ Sichus pipis allinta qhawarikuspa imatapis ruwan chayqa, imatachus ruwasqan allin llojsin. Pichus usqhayllata imatapis ruwajrí wajchayayman chayanqa.

⁶ Llullakuspa qhapajyayta tarinaqa q'oshñi jina chinkapun, chaytaj wañunaman apaj tojlla jina.

⁷ Mana allinta ruwajkunataqa kallpaman atinisqa kayninku chinkachenqa, cheqan kajta mana ruwayta munasqankurayku.

⁸ Mana allinta purejqa uma nanayta tarikuspalla kawsan. Cheqan sonqoyoj runaj ruwasqankunarí llimphu kanku.

⁹ Wasi k'uchullapi tiyakunaqa aswan allin, sumaj jatun wasipi phiñanakuta mask'aj warmiwan tiyakunamanta nisqaqa.

¹⁰ Millayta ruwaj runaqa mana allinta ruwanallapi yuyan, runa masintataj ni jayk'aj khuyapayanchu.

¹¹ Mana yuyayniyoj runaqa yuyayniyoj kayta yachakun, uma oqharej runa jasut'isqata rikuspa. Yuyayniyoj runarí astawan yuyayniyoj kayta yachakun, pipis payta yachachishajtillan.

¹² Cheqanta ruwaj Diosqa juchasapakunaj sonqonkuta sumajta rejsin, millayta ruwaj runakunatataj llakiypi tukuchin.

¹³ Sichus pipis wajcha runakunaj mañakusqankuta mana uyarin chayqa, paypa mañakusqanpis manallataj uyarisqachu kanqa.

¹⁴ Pakaypi t'inkata jaywaspa, runaj sinch'i phiñakuyninta tiyaykuchin. Mana pejpa rikusqallanta imatapis jaywarispataj, runaj k'araj phiñakuyninta thasnun.

¹⁵ Maypachachus justicia ruwakun, chaypacha, cheqan runa kusikun. Mana allinta ruwajkunatajrí chayta rikuspa, mancharikunku.

¹⁶ Allinta purinamanta t'aqakojqa wañusqakunawan tantakonqa.

¹⁷ Pichus raymillapi puriyta yuyajqa wajchayanqa. Jinallataj pichus vinota ujyanallapi, chantá q'apashaj jawinawan jawikunallapi yuyajqa mana qhapajyanqachu.

¹⁸ Cheqan runata jasut'inankutaqa millayta ruwaj runata jasut'enqanku, cheqan sonqoyoj runakunaj cuentanpitaj juchallikoj runata ñak'arichenqanku.

¹⁹ Pichus ch'innejpi tiyakojqa astawan allinpi kashan, pichus tiyakun imamantapis phiñakuspa maqanakuta mask'aj warmiwan, chaymanta nisqaqa.

²⁰ Yachayniyojpa wasinpi qhapaj kapuynin, sumajta q'apashaj jawina ima tiyan. Wampu runarí tukuy ima kapusqantapis tukurparin.

²¹ Pichus cheqan kawsayta, munakuytawan mask'ajqa unayta kawsanqa. Pay allinpaj qhawasqa kanqa, chantá qhapajyanqa ima.

²² Yachayniyoj runa yachan imaynatachus sumaj jark'achasqa llajtata jap'inanta, urmachillantaj chay llajtayojkunaj atinikusqanku jatun perqatapis.

²³ Pichus sumajta unancharisparaj parlajqa ni jayk'aj ima llakiy phutiytapis tarikonqachu.

²⁴ Jatunchakojta, asipayakojtataj “uma oqharej runa” ninku, anchata runaykachaspa purisqanrayku.

²⁵ Qhellaqa tukuy imayoj kayta munan, nitaj makinwan llank'ayta munanchu.

²⁶ Qhellaqa sapa p'unchay moq'espalla kashan. Cheqan kaj runarí mana mich'akuspa imatapis qon.

²⁷ Tata Diosqa millayta ruwajkunaj uywa ñak'asqa jaywasqankuta millachikun, mana allin sonqowan jaywasqankurayku.

²⁸ Llulla testigoqa wañuchisqa kanqa. Pichus imatapis maychus kajta willajrí parlayta atillanqapuni.

²⁹ Millayta ruwaj runaqa imatapis allinta ruwanman jina purin. Cheqanta ruwaj runarí imatapis ruwananpaj ñawpajta allintaraj unancharin.

³⁰ Pipis Diospa contranpi sayaykojtin, ni yachayniyoj kaynin, ni yuyayniyoj kaynin, nitaj ima yuyaychakuypis payta yanapanqachu Tata Diosta atipananpaj.

³¹ Runaqa maqanakuman rinanpaj caballonta wakichin. Maqanakupirí Tata Dioslla pitapis yanapan atipananpaj.