Proverbios 20 - DIOSPA QHELQACHISQ

¹ Vinoqa runata machu machuman tukuchin, machachikoj ujyanakunataj astawan runata qhayqerachin. Chaywan machajqa mana yuyayniyoj jina imatapis ruwarparillan.

² Kuraj kamachej phiñakun chayqa, phiña león jina qhaparin. Payta phiñachej runaqa kawsayninta wañuy pataman churan.

³ Ch'ajwata mana munaj runaqa jatunchasqa kanqa. Wampu runarí ch'ajwapi pejtukun.

⁴ Qhella runaqa tarpuy tiempo kashajtin, mana tarpunchu. Chajra oqharina tiempo chayamojtinrí, mikhunata mask'aspapis mana tarenqachu.

⁵ Runaj yuyaychasqanqa mama qocha jina ukhu. Yuyayniyoj runatajrí chayta jap'eqayta yachan.

⁶ Ashkha runakuna sumaj kawsaqe kasqankuta ninku. Chaywanpis, atinikunapaj jina runakunaqa pisilla kanku.

⁷ Cheqan runaqa llimphuta kawsaspallapuni purin. Churinkunapis pay jina kawsaspa, may kusikuyniyoj kanqanku.

⁸ Maypachachus kuraj kamachej juzganan tiyanapi tiyakun chaypacha, ujta qhawarispalla ima mana allintapis chinkachin.

⁹ Mana pipis ninmanchu: Noqaqa llimphu sonqoyoj kani, mana ima juchayojtaj, nispa.

¹⁰ Mana cabal pesatawan, suwa romanatawan, Tata Diosqa chay iskayninta chejnikun.

¹¹ Waynapis ruwasqannejta rejsisqa kanqa, allin puriyniyojchus, manachus, chayta.

¹² Ninreqa uyarinapaj, ñawitaj qhawanapaj. Iskayninta Tata Dios ruwarqa.

¹³ Ama puñuysiki kaychu, pajtataj wajchayawaj. Llank'anallapipuni yuyay, jinataj ashkha mikhunayki tiyapusonqa.

¹⁴ Ranqheroqa imata rantispapis, rantinankama nin: Mana walejchu, nispa. Rantispataj: Allinta rantikuni, nispa kusikun.

¹⁵ Yachaywan parlanaqa tukuy qorimanta, alajakunamantapis astawan valorniyojraj.

¹⁶ Pichus mana rejsisqamanta garante sayajmanta p'achanta jap'ispa, prendapaj qhepachiy.

¹⁷ Runapaj q'otiyaspa mikhuyta tarisqanqa misk'i mikhuy. Aswan qhepamanrí jallp'allatapis mikhunman jina kanqa.

¹⁸ Imatapis ruwanaykipajqa allin yuyaychaykunata mask'ay. Jatun maqanakuyman rinapajqa sumajtaraj umachakuna tiyan.

¹⁹ Simi apajqa pakasqa kajtapis mana sonqollanpi jallch'ayta yachanchu. Chayrayku simi apaj runawanqa ama puriychu.

²⁰ Pichus tatanta, mamantapis maldicejqa manaraj wañunanpi wañonqa.

²¹ Qallariypi imatapis jasallata tarinaqa, qhepaman mana kusikunapajchu kanqa.

²² Amapuni jayk'ajpis niychu: Vengakusaj, nispa. Tata Diospi atinikuy, paytaj yanapasonqa.

²³ Mana cabal pesata, chantá suwa romanata ima Tata Dios chejnikun.

²⁴ Tukuy runaj kawsaynenqa Tata Diospa makinpi kashan. Mana pipis yachayta atinchu imapichus kawsaynin tukukunanta.

²⁵ Manaraj allinta unancharishaspa, ama usqhayllata niychu Diosman imatapis qonaykita. Pajtataj qhepanejman mana junt'ayta atishawajchu.

²⁶ Yachayniyoj kuraj kamachej mana allinta ruwaj runakunata karunchachispa, trillana ruedawan jina paykunata saruchin.

²⁷ Tata Diosqa runata ruwarqa espirituyoj kananpaj, chay runaj espirituntaj k'anchay jina runaj sonqon ukhukama k'anchaykun.

²⁸ Sichus kuraj kamachej cheqan kaywan, khuyakuywan ima kamachin chayqa, mana pipis payta kamachinan tiyanamanta qharqonqachu.

²⁹ Waynakunaj jatunchakuynenqa kallpanku. Machu runakunaj jatunchakuynintajrí yuraj chujchanku.

³⁰ Jasut'ispa nanachisqanqa runaj mana allin kayninta llimphuchan, seq'oytaj sonqo ukhuta pichan.