Proverbios 2 - DIOSPA QHELQACHISQ

Yachayniyoj kaspa imatachus tarinchej

¹ Wawáy, yachachisusqayta jap'ikuy, kamachisqaytapis sonqoykipi waqaychay.

² Yachaytaqa allinta uyariy, yuyayniyoj kanamantaj sonqoykita jayway.

³ Tukuy kallpaykiwan yuyayta, sumaj yachaytawan mañakuy.

⁴ Chaykunata qolqeta jina mask'ay, p'ampasqa qolqeta jina.

⁵ Ajinatachus ruwanki chayqa, imachus Tata Diosta kasuna kasqanta yachanki, jinallataj imaynatachus Diosta rejsina kasqanta tarinki.

⁶ Tata Diosmin yachaytaqa qon. Tukuy yachay, yuyayniyoj kaypis siminmanta llojsimun.

⁷ Paymin cheqanta purejkunaman sumaj yachayta qon. Mana juchayojkunapajqa paymin jark'akunanku escudo.

⁸ Payqa cheqan ruwajkunata waqaychan, jinallataj paypa nisqanta kasojkunatapis tukuy mana allin kajmanta jark'an.

⁹ Chaypacha yachallankitaj imachus cheqan kajta ruwana kasqanta, jinallataj yachanki imachus maychus kajta, justiciata, tukuy imachus allin kajtapis ruwana kasqanta.

¹⁰ Sonqoykiman yachay yaykojtin, yachayqa may jina misk'ichus kasqanta yachanki.

¹¹ Reparakuyta yachayqa allinta qhawasonqa, sumaj yachayniyoj kaypis waqaychasonqa.

¹² Chaykunaqa mana allinta purinamanta, millayta ruwajkunamanta ima karunchasonqanku.

¹³ Paykunaqa allin kajta ruwanata saqenku, mana allin kajta ruwaspa purinankupaj.

¹⁴ Millayta ruwasqankuwan kusikunku, millayta ruwaspataj, kusiywan tusunku.

¹⁵ Paykunaqa cheqan kajta ruwayta saqespa, mana allinta ruwaspa purinku.

¹⁶ Jinallataj yachayniyoj kayqa qosanta wasanchaj warmimantapis karunchachillasonqataj, misk'i simi, sonqo suwa warmimanta ima.

¹⁷ Chay warmeqa sipas kashaspa, casarakusqan qosanta saqerparin, Tata Diospa ñawpaqenpi tratota ruwasqantapis qonqapun.

¹⁸ Chay warmej wasinman rinaqa wañunamanpis enqhaykukusunman jina.

¹⁹ Pikunachus paywan puñuykojkunaqa manaña kutimonqankuchu, manañataj kusiy kawsayta rikonqankuchu.

²⁰ Chayrayku qanqa cheqanta ruwaspa puriy. Cheqan runakunaj kawsasqankuta jinataj kawsay.

²¹ Allinta ruwajkuna, mana k'aminapaj jina kawsajkuna imalla kay pachapi unayta tiyakonqanku.

²² Millayta ruwajkunarí kay pachamanta wijch'usqa kanqanku. Wasanchajkunapis chaymanta t'irasqa kanqanku.