Proverbios 17 - DIOSPA QHELQACHISQ

¹ Aswan allinmin chojru t'antallatapis mikhuspa allinpi kawsakuna, jatun mikhuyta ruwaspa maqanakuspataj kawsanamanta nisqaqa.

² Sumaj yuyayniyoj kamacheqa patronninpa mana kasukoj churinta kamachenqa, chay churej wawqenkunawantaj khuska chayaqeta jap'enqa.

³ Qoritawan, qolqe metaltawan ninapi unuyachispa ch'uwanchanchej. Runaj sonqon imaynachus kasqantarí Tata Dioslla yachan.

⁴ Millayta ruwajwan, llulla runawanqa millay parlajkunata kasunku.

⁵ Pichus wajcha runamanta alqochakojqa ruwajnin Diosta phiñachin. Pichus wajcha runata kusipayajqa jasut'isqapuni kanqa.

⁶ Machu runakunaj pillunkoqa allchhinkuna kanku. Wawakunaj jatunchakuyninkutaj tatankukuna kanku.

⁷ Mana yuyayniyoj runapaj mana allinchu sumajta parlayqa, nitaj kamachej runapaj allinchu llullakuspa parlayqa.

⁸ Pichus lluk'iyta yachajqa atiyniyoj kasqanta yuyakun, imajtinchus imata ruwasqanpi allillan rin.

⁹ Pichus contranta juchallejta qhespichejqa munakuyta t'ikarichin. Pichus contranpi imatachus ruwasqanta willajrí kawsaqenta karunchachin.

¹⁰ Yuyayniyoj runaqa ujta k'amisqalla uyarikun, wampu runarí ni pachaj kutita seq'ojtinkupis uyarikunchu.

¹¹ Mana kasukoj runaqa maqanakunallata mask'an. Uj p'unchaytajrí sinch'ita jasut'isqa kanqa.

¹² Astawan allinraj uñankunata qhechuchikoj china jukumariwan tinkunaqa, mana uyarikoj wampu runawan tinkunamantaqa.

¹³ Sichus allinmanta mana allinwan kutichin chayqa, wasinmanta mana allin kaj ni jayk'aj chinkanqachu.

¹⁴ Ch'ajwata jatarichinaqa mayuta yaku wasaykoj jinawan ninakun. Chayrayku ch'ajwa manaraj qallarishajtin, ayqekuy.

¹⁵ Tata Dios manapuni munanchu pipis juchallikojta llimphuman orqhonanta, nillataj kusikunchu pipis mana juchayojta juchachasqanmanta.

¹⁶ Imapajtaj wampoqa qolqe oqharisqa yachayta rantej jamun mana yuyaynin kashajtinri? Yachayqa mana qolqewanchu rantikun.

¹⁷ Kawsaqeqa tukuy tiempopi munakuyniyoj. Llakiy phutiy tiempopipis wawqe jina khuyapayakun.

¹⁸ Mana allin yuyayniyoj runaqa kawsaqenpaj garante jina sayan, jinaspataj, kawsaqenpa manu kasqanta q'epirikun.

¹⁹ Pichus jap'inakuyta munajqa maqanakuyta mask'an. Pichus jatunchakuspa parlajpis payllapajtaj mana allin kajta mask'akun.

²⁰ Millay yuyayniyojmanqa mana allinchu renqa. Llulla runapis jatun llakiyman urmanqa.

²¹ Wampu chureqa tatanta llakichin, mana yuyayniyoj runaj tatantaj mana kusikunchu.

²² Kusisqa sonqoqa allin jampi jina. Llakisqa sonqorí runata onqochin.

²³ Mana allinta ruwaj runaqa pakaypi lluk'ichikun, justiciata q'ewinanpaj.

²⁴ Sumaj yuyayniyoj runaqa yachayniyoj kayta mask'an. Wampu runarí imamanpis sat'iykukullanpuni.

²⁵ Wampu chureqa tatanta mayta llakichin, mamanpa sonqontapis nanachin.

²⁶ Mana juchayojtaqa mana juchachanachu, manallataj cheqanta ruwaj runata seq'onachu.

²⁷ Pichus pisillata parlajqa yachayniyojmin. Pichus mana usqhayllata phiñarikojqa sumaj yuyayniyojmin.

²⁸ Sichus pipis wampu kashaspapis ch'inlla kakun, simintataj wisq'an chayqa, runakuna payta yachayniyojpaj, yuyayniyojpajtaj qhawanqanku.