Proverbios 16 - DIOSPA QHELQACHISQ

¹ Runaqa imatapis ruwananpaj yuyaychakun chaypis, Tata Dios imachus kananta nin.

² Runamanqa tukuy ima ruwasqanpis allillan rijch'an. Chaywanpis Tata Dioslla allinta qhawan imata yuyaspachus chayta ruwasqanta.

³ Imatachus ruwasqaykitaqa Tata Diospa makinman churay, jinataj imatachus ruwanaykipaj yuyasqayki junt'akonqa.

⁴ Tata Diospa tukuy ima ruwasqanqa mana jinallachu. Millayta ruwaj runatapis uj p'unchay jasut'isqa kananpaj ruwan.

⁵ Tata Diosqa runaykachajkunata millachikun, paykunataj jasut'isqapuni kanqanku.

⁶ Munakuywan, cheqa kaywan ima juchata pampachakun. Pichus Tata Diosta may jatun respetowan qhawajqa mana allinta ruwanamanta karunchakun.

⁷ Maypachachus pipis imaynatachus kawsasqanwan Tata Diosta kusichin chaypacha, Tata Diosqa chay runaj awqankunatapis paywan allin kawsayman churanqa.

⁸ Cheqanta ruwaspa pisitapis ganakunaqa astawan allin, pichus sajrata ruwaspa ashkhata ganajmanta nisqaqa.

⁹ Runaqa imatachus ruwananta sonqonpi wakichin, Tata Diostajrí chay runata munasqanman jina pusan.

¹⁰ Kuraj kamachejqa Diospa sutinpi parlan. Imata juzgaspapis, mana pantanchu.

¹¹ Mana suwa pesakunawan, romanakunawan ima Tata Diospatamin kanku. Allin pesakunaqa paypa ruwasqanmin.

¹² Kuraj kamachejkunaqa tukuy mana allin ruwasqata chejninku, imaraykuchus kamachiyninkoqa justiciata ruwasqankurayku sayan.

¹³ Kuraj kamachejkunaqa pichus cheqan sonqowan parlajkunata munakunku, kusikunkutaj pikunachus mana llullakuspa cheqa kajta nejkunawan.

¹⁴ Kuraj kamachejpa phiñakuynenqa wañuymanta willaj jina, yachayniyojkunarí chay phiñakuyninta thasnunku.

¹⁵ Kuraj kamachejpa kusikuyninpi kawsay tiyan, paypa k'acha kaynintaj para qallariy jina.

¹⁶ Yachayta tarinaqa qorimantapis astawan allin, yuyayniyoj kanataj qolqemantapis astawan sumaj.

¹⁷ Cheqanta ruwaj runakunaqa mana allinta ruwanamanta t'aqakunku, jinallatataj imaynatachus purisqanta qhawakojqa pay kikin kawsayninta waqaychakun.

¹⁸ Jatunchakuypa qhepanta mana allinpi kay jamun, runaykachaypa qhepantataj llakiylla.

¹⁹ Pichus llamp'u sonqoman tukuspa wajchakunawan khuska kawsakun, chay astawan allinpi kanqa, pichus jatunchakojkunawan kawsakuspa qhapajyan, chaymanta nisqaqa.

²⁰ Yachachisqata uyarikoj runataqa allinpuni renqa. Kusikuyniyojmin pichus Tata Diospi atinikuspa kawsajqa.

²¹ Yachayniyoj runata ninku: Payqa allin yuyayniyoj, nispa. Misk'i simi parlayniyojtaj wajkunawan uyarichikun.

²² Allinta qhawarikuspa imatapis ruwajqa unayta kawsanqa. Wampu runakunaman yachachiyrí qhasi manakajlla.

²³ Pichus yuyayniyojqa allinta qhawarikuspa parlan, chay parlasqantaj wajkunawan uyarichikun.

²⁴ Misk'i simiwan parlayqa abeja misk'i jina. Uyarejpa kawsayninta misk'ichan, ukhuntataj jampin.

²⁵ Runamanqa imata ruwayta yuyasqanpis allin rijch'an. Qhepanejmanrí imatachus ruwayta yuyasqan wañuyman apan.

²⁶ Llank'aj runaj yarqhaynenqa astawan llank'anaman sonqonta aysan, imaraykuchus yarqhachikusqan, imallatapis ruwayta munachin.

²⁷ Millayta ruwaj runaqa mana allin ruwayllata mask'an, parlasqanpis nina lawray jina ruphakun.

²⁸ Millayta ruwaj runaqa ch'ajwata jatarichin, simi apajtaj kawsaqekunata phiñanachin.

²⁹ Maqanakoj runaqa kawsaqenta q'otiyan, ajina ruwasqantaj, mana allin ñanninta payta pusan.

³⁰ Ch'irmirispa qhawaykachajqa millay ruwayta wakichishan, millayta ruwaytawantaj, siminta khamurarikun.

³¹ Yuraj uma kayqa sumaj pillu jina. Chaytaqa pipis cheqanta purispa tarin.

³² Mana usqhayllata phiñakoj runaqa aswan allin kallpasapa runamantaqa. Pichus pay kikinta qhawarikuyta yachajqa aswan allin llajtakunata atipajmanta nisqaqa.

³³ Runaqa suerteta choqan, chaywanpis Tata Dioslla imachus kananta nin.