Proverbios 15 - DIOSPA QHELQACHISQ

¹ Misk'i simiwan kuticheyqa phiñasqa sonqota tiyaykuchin, k'araj simiwan kutichiyrí astawan phiñarichin.

² Yachayniyojkunaj siminmantaqa yachay llojsimun, wampukunaj siminkumantarí qhasi manakaj parlaylla llojsimun.

³ Tata Diosqa tukuynejpi kashan. Allin runakunata, mana allin runakunatapis qhawashallanpuni.

⁴ K'acha simiwan parlayqa jampi jina. Sonqota k'arachinapaj jina parlayrí runata llakichin.

⁵ Wampu runaqa tatanpa k'amisqanta pisipaj qhawan. Pichus k'amisqata jap'ikojrí yachayniyoj.

⁶ Cheqan runaj ayllunpajqa mana imapis pisiyanchu. Millayta ruwajkunaj qolqechakusqankurí uma nanayllata apamun.

⁷ Yachayniyojkunaj siminkoqa yachasqankuta tukuyman willan. Wampukunarí mana jinatachu ruwanku.

⁸ Tata Diosqa mana allin ruwajkunaj jaywasqankuta millachikun. Cheqan runakunaj mañakusqankutarí kusisqa uyarin.

⁹ Tata Diosqa mana allinta ruwajkunaj kawsasqankuta millachikun, cheqanta kawsajkunatarí munakun.

¹⁰ Mana allinta purejpajqa sinch'i jasut'i tiyan, k'amisqata mana uyarejtaj wañonqa.

¹¹ Sichus wañuywan, ukhu pachawan ima Tata Diospa qhawayninpi kashan chayqa, astawanraj runakunaj sonqonkuta rejsin.

¹² Alqorakoj runaqa pichus k'amejta mana munakunchu, nitaj yachayniyojkunawanpis tantakunchu.

¹³ Runaj sonqonpi kusiy kajtin, uyanpis kusisqallataj. Sonqo llakisqa kajtinrí, uyanpis llakisqallataj.

¹⁴ Sumaj yuyayniyoj runaqa astawan yachayta mask'an. Wampukunarí qhasi manakajta parlasqankuwan sajsakunku.

¹⁵ Llakisqa sonqoyoj runapajqa sapa p'unchay mana allinchu. Kusisqa sonqoyoj runapajrí, sapa p'unchay raymi p'unchaypi jina kusikuyllapuni tiyan.

¹⁶ Wakin runakuna wajcha kaspapis, Tata Diosta kasukuspa kawsanku. Chayqa aswan allin, pichus qhapaj kaspa, uma nanayllata tarikun, chaymanta nisqaqa.

¹⁷ Astawan allin munanakuypi kawsakuspa q'omerkunallatapis mikhuna, chejninakuypi kawsaspa, waka aychata mikhunamanta nisqaqa.

¹⁸ Usqhayllata phiñakoj runaqa ch'ajwata jatarichin. Llamp'u sonqo runarí ch'ajwata ch'inyachin.

¹⁹ Qhella runaj ñannenqa khishkawan junt'a. Cheqanta ruwajpa purinanrí jatun ñan jina.

²⁰ Yachayniyoj chureqa tatanta kusichin. Wampu churitajrí mamanta llakichin.

²¹ Mana yuyayniyojqa wampu kasqanwan kusikun. Yuyayniyoj kajrí pantaykuspapis cheqan ñanman kutirin.

²² Sichus pipis mana tapurikuspalla imatapis ruwananpaj wakichikun chayqa, imatachus yuyasqan mana allinchu llojsenqa. Sichus imatapis ruwananpaj allintaraj tapuykacharikun chayrí, imatachus ruwayta yuyasqan allin llojsenqa.

²³ Maychus kajta kutichinaqa tukuyta kusichin. Maychus tiemponpi kutichiyrí aswan allinraj.

²⁴ Yachayniyoj runaj ñannenqa aswan pataman rin, yuyayniyoj runatataj jallp'aj sonqonman yaykunamanta kacharichin.

²⁵ Tata Diosqa runaykachajpa wasinta raqayman tukuchin. Warmisapaj jallp'antarí ni piwan qhechuchinchu.

²⁶ Tata Diosqa mana allinta ruwajkunaj ruwasqankuta millachikun. Pipis allin sonqowan parlajtinrí, Tata Dios chaywan kusikun.

²⁷ Pichus mana allinta ruwaspa qhapajyayta munajqa ayllunta mana allintachu ruwan. Pichus lluk'ichikuyta qhesachajrí unayta kawsanqa.

²⁸ Cheqan runaqa manaraj kutichishaspa, sumajtaraj yuyaychakun. Millayta ruwajpa siminmantarí sonqota k'arachinapaj parlaylla llojsin.

²⁹ Tata Diosqa mana allinta ruwaj runakunamanta karunchakun. Cheqan runakunaj mañakusqankutarí tukuy sonqo uyarin.

³⁰ Kusiy ñawiwan qhawayqa sonqota kusichin. Sumaj willaykunarí, runaj kallpanta mosojyachin.

³¹ Pichus allinta purinanpaj k'amisqata jap'ikojqa yachayniyojkunawan khuska tiyakonqa.

³² Pichus k'amisqata sajrapaj jap'ejqa pay kikinta pisipaj qhawakun. K'amisqata uyarikojrí astawan yachayta jap'in.

³³ Pichus Tata Diosta may jatunpaj qhawajqa yachayniyoj kayta yachaqan. Jatunchasqa kanapajqa ñawpajta llamp'u sonqo kaytaraj yachana.