Proverbios 14 - DIOSPA QHELQACHISQ

¹ Yachayniyoj warmeqa ayllunta pataman oqharin. Mana yuyayniyoj warmirí makillanwantaj ayllunta ch'eqerachin.

² Cheqanta kawsajqa Tata Diosta may jatunpaj qhawan. Mana allinta kawsajrí Tata Diosta pisipaj qhawan.

³ Mana yuyayniyojpa siminmanta jatunchakuylla llojsin. Yuyayniyoj runaj parlayninrí payta waqaychan.

⁴ Bueykuna mana kajtenqa, pirwaqa ch'usajpacha. Bueypa kallpanwanrí chajra oqharina ashkhayan.

⁵ Cheqan testigoqa manapuni llullakunchu. Llulla testigorí imata parlaspapis llullakun.

⁶ Alqochakoj runaqa yachayta mask'an, manataj tarinchu. Yuyayniyoj runapajrí imata yachanapis jasalla.

⁷ Wampu runamanta t'aqakuy, imaraykuchus paypa siminmantaqa mana imatapis yachawajchu.

⁸ Yachayniyoj runataqa yachaynin imaynatachus kawsananta yachachin, wampu runatarí wampu kaynillantaj pantachin.

⁹ Wampu runakunaqa juchankumanta asikunku. Cheqan runakunarí Tata Diospa khuyakuyninta tarinku.

¹⁰ Runaj sonqollan imachus llakichisqanta yachakun. Manataj pipis paywan khuska kusiysikunchu.

¹¹ Millayta ruwaj runakunaj ayllunkoqa ch'eqerasqa kanqa. Cheqan runakunaj ayllunkutatajrí allin renqa.

¹² Runamanqa imatachus ruwayta yuyasqan allin rijch'an. Chaywanpis qhepanejman imachus yuyasqanrí wañuyman apan.

¹³ Asishajtinpis, sonqoqa llakisqallamin kashan. Ajinaqa kusikuypis waqaypi tukukun.

¹⁴ Wampu runaqa mana allinta purisqanwan kusikun. Allinta ruwaj runarí sumaj ruwasqanwan kusikun.

¹⁵ Mana yuyayniyojqa runakunaj ima nisqankutapis jap'ikullan. Yuyayniyoj runarí maynintachus rinanta allintaraj qhawakun.

¹⁶ Yachayniyojqa manchachikuspa, mana allinta ruwanamanta t'aqakun. Wampurí payllapi atinikuspa, mana allinta qhawarikuspa imatapis ruwarparillan.

¹⁷ Usqhayllata phiñakojqa mana ruwanatapis ruwarparillan. Yachayniyoj runarí pacienciakuspa, imatapis alliyllamanta ruwan.

¹⁸ Mana yuyayniyoj runakunaj t'inkankoqa wampu kaymin. Yuyayniyojkunarí yachayta jap'enqanku imatachus ruwanankuta yachanankupaj.

¹⁹ Mana allinta ruwaj runakunaqa allinta ruwaj runakunaman k'umuykonqanku. Millay runakunataj cheqan runaj ñawpaqenpi qonqorikonqanku.

²⁰ Wajcha runataqa kawsaqenkunapis chejninku. Qhapaj runatarí tukuy munakunku.

²¹ Pichus runa masinta pisipaj qhawajqa juchallikun. Wajchakunata khuyajrí kusikuyniyojmin.

²² Mana allin ruwayta mask'ajkunaqa jatunta pantanku. Allin ruwayta mask'ajkunarí Tata Diospa khuyakuyninta tarenqanku.

²³ Pichus llank'ajqa allin kajta tarin. Jaramallatajrí wajchayayllata tarin.

²⁴ Yachayniyojpa pillonqa qhapajyay. Wampu runaj pillunrí mana yachayniyoj kaynin.

²⁵ Cheqanta parlaj testigoqa wajkunata wañunamanta qhespichin. Llullata parlaj testigorí runa masinta wasanchan.

²⁶ Pichus Tata Diosta may jatunpaj qhawan, chay runaqa allin waqaychasqa kanqa. Wawankunapis allin waqaychasqallataj kanqanku.

²⁷ Pichus Tata Diosta may jatun respetowan qhawajqa unayta kawsanqa. Ajinamanta wañuypa makinmanta kacharichisqa kanqa.

²⁸ Ashkha runata kuraj kamachejqa manchay uyarisqa kanqa. Pisi runata kamachejrí pisipaj qhawasqa kanqa.

²⁹ Mana usqhayta phiñarparikojqa jatun yuyayniyoj. Usqhayta phiñarparikojrí wampu kasqanta tukuyman rikuchin.

³⁰ Llamp'u sonqo kayqa runaj ukhunta kawsachin. Envidiarí tullupi ismu onqoy jina kashan.

³¹ Wajcha runata waqachejqa Tata Diosta pisipaj qhawan. Wajcha runata khuyajrí Tata Diosta jatunchan.

³² Millayta ruwaj runata mana allin ruwasqallantaj jatun llakiyman churan. Allin ruwaj runarí wañunankama Tata Diosllapi suyakun.

³³ Allin yuyayniyojpa sonqonpi yachay kashan. Wampu runakunaj chawpinkupirí, yachay mana rejsisqachu.

³⁴ Justiciata ruwayqa suyuta jatunchan. Jucharí mayqen suyutapis p'enqayman churan.

³⁵ Sumaj yuyayniyoj kamacheqa kuraj kamachejninwan munachikun. Mana allin kaj kamachirí phiñapayachikuyllata tarin.