Proverbios 12 - DIOSPA QHELQACHISQ

¹ Pichus yachayniyoj kayta munajqa k'amisqata tukuy sonqo jap'ikun. K'amisqata chejnikojrí mana yuyayniyoj.

² Allin runaqa Tata Diospa k'acha khuyakuyninta tarin. Ch'awka runatarí Tata Dios ruwasqanman jina juchachanqa.

³ Pichus millayta ruwajqa mana sinch'ita sayanqachu, allinta ruwaj runakunarí unaypaj sumaj sayachisqa kanqanku.

⁴ Allin warmeqa qosanpa pillun jina, mana allin warmirí qosanpaj tullu nanay jina.

⁵ Cheqan runakunaqa cheqanta ruwanallapi yuyanku, mana allinta ruwajkunarí runata ch'awkiyanallapi yuyanku.

⁶ Millayta ruwajkunaqa runata wañuchinallamanta parlanku, cheqan runakunaj parlasqanrí wajkunata wañuymanta kacharichin.

⁷ Mana allinta ruwajkunaqa wañonqanku, chaypitaj tukukaponqanku. Cheqan runaj aylluntajrí kawsallanqapuni.

⁸ Runaqa yachayniyoj kasqanman jina jatunchasqa kanqa, mana yuyayniyoj runarí pisipaj qhawasqa kanqa.

⁹ Wakinkuna pisipaj qhawasqa kaspapis, kamachiyoj kanku. Chaykuna aswan allin kanku, pikunachus may kasqankuta yuyakunku chaypis, ni mikhunankupajpis kanchu, chaykunamanta nisqaqa.

¹⁰ Cheqan runaqa uywankunata allinta qhawan, millayta ruwaj runarí uywankunata mana khuyanchu.

¹¹ Pichus jallp'anta llank'ajqa ashkha mikhunayoj kanqa. Qhella runarí mana yuyayniyoj kaspa, manakaj ruwanallapi tiemponta usuchin.

¹² Mana allinta ruwajkunaj munasqankoqa llakiyllata apamun. Cheqan runakunaj ruwasqankurí allin sach'aj poqoynin jina.

¹³ Millayta ruwaj runaqa kikin llullakusqallanpitaj ch'ipaykukun, cheqanta ruwajrí ima llakiymantapis llusp'illan.

¹⁴ Pichus allinta parlajqa mikhunallayojpuni kanqa, ruwasqanman jinataj t'inkata jap'enqa.

¹⁵ Wampoqa tukuy ima ruwasqanta allillan kasqanta yuyan. Yuyayniyoj runarí wajkunaj yuyaychasqankuta jap'ikun.

¹⁶ Wampoqa ima nejtinkupis, phiñakunpacha. Sumaj yuyayniyoj runarí contranta parlajtinkupis, mana kasuta ruwanchu.

¹⁷ Cheqa kajta parlaj testigoqa cheqan kajta parlan, mana allin testigorí llullakuspa parlan.

¹⁸ Mana allinta yuyaychakuspalla runaj parlarisqanqa wajkunaj sonqonkuta k'arachin. Yachayniyojkunaj parlasqankurí jampi jina sonqota tiyaykuchin.

¹⁹ Cheqanta parlaj runaqa unayta kawsanqa, llulla runarí mana unaytachu kawsanqa.

²⁰ Millayta ruwajpa sonqonpeqa llullakuylla tiyan. Allinta kawsajkunata yuyaychajpajrí kusikuy tiyan.

²¹ Cheqan runamanqa ni ima sajrapis chayanqachu. Millayta ruwaj runarí tukuy imaymana llakiykunawan atipachisqa kanqa.

²² Tata Diosqa llullakojkunata chejnikun, cheqanta parlajkunatarí may kusisqa qhawan.

²³ Yuyayniyoj runaqa yachayniyoj kasqanmanta mana runaykachanchu. Wampu runarí wampu kasqanmanta jatunchakun.

²⁴ Llank'aj runaqa tukuy ima patapi kanqa, qhella kajrí kamachi kanqa.

²⁵ Llakikoyqa runaj sonqonta ñak'arichin. Misk'i simiwan parlaykuyrí sonqonta kusichin.

²⁶ Cheqan runaqa runa masinta cheqan ñanta pusan. Mana allinta ruwaj runakunarí cheqan ñanmanta pantachinku.

²⁷ Qhella runaqa animal jap'isqantapis ni mikhunchu, k'uchi runarí ni imamanta pisenqachu.

²⁸ Justicia ruwanaqa allin kawsayman pusan, mana allin kawsayrí wañuyman apan.