Proverbios 11 - DIOSPA QHELQACHISQ

¹ Tata Diosqa suwa pesakunata chejnikun, cabal pesakunamantarí kusikun.

² Jatunchakoyqa p'enqaypi kayta apamun, llamp'u sonqoyojkunarí yachayniyoj kayta yachakonqanku.

³ Cheqan runataqa cheqan kawsakuynin kawsachin, puraj uya runakunatarí wasanchasqan chinkachin.

⁴ Juicio p'unchaypi qhapaj kanaqa mana payta yanapanqachu. Cheqan kawsayniyoj runarí wañuymanta kacharichisqa kanqa.

⁵ Cheqanta ruwanaqa cheqan runaj ñanninta cheqanchan. Millayta ruwaj runarí mana allinta ruwasqallanpitaj urmanqa.

⁶ Cheqanta ruwasqanqa cheqan runata kacharichenqa. Juchasapakunatarí juchallankutaj jap'iykonqa.

⁷ Millayta ruwaj runa wañuspa, imatachus suyakushasqan paywan khuska wañullantaj.

⁸ Cheqan runataqa ima llakiymantapis Tata Dios qhespichenqa, chay llakiymantaj millayta ruwaj runata cheqan runaj cuentanmanta churanqa.

⁹ Millayta ruwaj runaj parlasqanqa runa masinta mana allin kawsayman churan, cheqan runaj yachayninrí payta qhespichin.

¹⁰ Cheqan runata allin rejtenqa, llajta masinkuna kusikunku. Mana allinta ruwaj runakuna wañojtinkutaj, raymita ruwanku.

¹¹ Cheqanta ruwaj runakunaqa llajtaj allinninpaj kanku. Mana allinta ruwaj runakunaj parlasqankurí mana allin kawsayta chay llajtaman apamun.

¹² Mana yuyayniyoj runaqa runa masinmanta mana allinta parlanchu, yuyayniyoj runarí ch'inlla kakun.

¹³ Simi apaj runaqa mana parlana kajtapis tukuyman willan. Allin yuyayniyoj kajrí, pipis imatapis willajtin, sonqonpi waqaychan.

¹⁴ Mana allin kamachejkuna kajtinku, uj suyuta mana allinchu rin. Maypichus ashkha yuyaychajkuna kanku chaypirí, tukuy ima allin rin.

¹⁵ Mana rejsisqapaj garante sayaj runaqa uma nanayta tarikonqa. Mana garante sayaj munajrí mana llakikuspa kawsakonqa.

¹⁶ K'acha sonqoyoj warmeqa respetasqa kanqa, mana khuyakuyniyoj runarí qhapajyayllata ganan.

¹⁷ Khuyakuyniyoj runaqa pay kikinpaj allinta ruwakun. Phiña mana sonqoyoj runarí pay kikillanpajtaj mana allinta mask'akun.

¹⁸ Millayta ruwajpa pagonqa qhasi manakajlla. Cheqan kajta ruwajrí sumaj t'inkata jap'enqa.

¹⁹ Justiciata ruwanaqa allin kawsayman apan, mana allinta ruwanarí wañuyman apan.

²⁰ Tata Diosqa millay yuyajkunata chejnikun, allinta purejkunatarí may kusisqa qhawan.

²¹ Millayta ruwaj runaqa jasut'isqapuni kanqa, cheqanta ruwajkunarí ima llakiymantapis kacharichisqa kanqanku.

²² Imaynachus uj qori anillo khuchej senqanpi churasqa, chaywan ninakun uj k'achita warmi mana yuyayniyoj.

²³ Cheqan runakunaqa allin kajta munanku. Mana allinta ruwajkunaj munayninkurí phiñakuyllata sayarichin.

²⁴ Pichus wajchakunaman jaywarejmanqa imapis astawan yapakun. Pichus mich'akojrí wajchaman tukonqa.

²⁵ Khuyakoj runaqa tukuy imayoj kanqa, k'acha sonqoyoj runataj sajsachisqapuni kanqa.

²⁶ Trigo pisiyajtin, sichus pipis trigota tantaspa pakaykun chayqa, runa masinkuna maldicenqanku. Pichus trigota vendejtarí saminchanqanku.

²⁷ Pichus allin kajpa qhepanta purejqa allinpaj qhawasqa kayta mask'an. Mana allin kajta mask'ajmanrí mana allinchu renqa.

²⁸ Qhapaj kayninpi atinikojqa ch'aki laqhe jina urmanqa. Cheqan runakunarí sach'a jina q'omeryanqanku.

²⁹ Ayllunta mana allinta qhawajqa mana imayojman tukonqa, wampu runataj yachayniyojpa wata runallanpuni kanqa.

³⁰ Cheqan kajta ruwanaqa runata kawsachin, yachayniyojtaj wajkunaj sonqonkuta suwan.

³¹ Sichus kay pachapi cheqan runa ruwasqanman jina pagota jap'in chayqa, astawanraj millayta ruwaj runakunawan, juchasapakunawan ima jasut'isqa kanqanku.