Proverbios 1 - DIOSPA QHELQACHISQ

Imapajchus yachaywan nisqakuna qhelqasqa

¹ Kaykuna kanku Israelpa kuraj kamachejnin, Davidpa churin Salomonpa rijch'anachej nisqankuna.

² Chaykuna wakichisqa kanku yachayta yachachinapaj, chantá yachachiykuna, sumaj parlaykuna ima imatachus niyta munasqanta allinta entiendechinapaj.

³ Kayqa sumaj kashan allin yuyaychaykunata, cheqanchayta, cheqanta kawsayta, uj rejta ruwayta ima yachaqanapaj.

⁴ Jinallataj sumaj kashan llamp'u sonqoyojkunaman umayoj kayta yachachinapaj. Sumajllataj kanku waynakunaman, sipaskunaman ima allin yachayta, jamut'ayta ima yachachinapaj.

⁵ Yachayniyoj, yuyayniyojpis kay nisqakunata uyarispa, astawan yachayniyoj kanqa. Yuyayniyojpis astawan yuyaychasqa kanqa.

⁶ Astawan yachayniyoj kanqanku, maypachachus yachayniyojkunaj nisqankuta, chantá rijch'anachiykunawan parlasqankuta unancharenqanku, chaypacha. Jinallataj astawan yachayniyoj kanqanku, maypachachus sumaj yachaywan nisqankuta, chantá watuchiykunawan parlasqankuta ima unancharenqanku, chaypacha.

⁷ Yachayniyoj runa kanapajqa ñawpajta Tata Diosta may jatun respetowan qhawana. Wampu runakunarí yachayta, yachachiytawan ima qhesachanku.

Waynapaj, sipaspaj ima yuyaychaykuna

⁸ Wawáy, tataykej k'amisusqanta uyariy, amataj pisipaj qhawaychu mamaykej yachachisusqantapis.

⁹ Chay yachayqa umaykipi t'ikamanta pillu jina kanqa, kunkaykipitaj k'achitu walqa jina.

¹⁰ Sichus juchasapakuna q'otiyasuyta munasunkuman chayqa, ama kasuychu, wawáy.

¹¹ Ichapis nisonqanku: Noqaykuwan jaku rinachej. Mana juchayojta wateqaspa, ni imallamanta payta wañuchisunchej.

¹² Cheqan runakunata kawsashajllata oqoykusunchej, imaynatachus ukhu pacha wañusqata oqoykun, ajinata.

¹³ Ajinata ruwaspa, imatachus qhechusqanchejwan wasinchejta junt'aykuchisunchej.

¹⁴ Noqaykuwan jamuy, qanpajpis kallanqataj. Tukuy suwasqanchejta khuskamanta rak'inakusun, nispa.

¹⁵ Wawáy, paykunawanqa amapuni puriychu. Manachayqa millayta ruwaspa purejkunamanta karunchakuy,

¹⁶ imaraykuchus paykunaqa mana allin kajta ruwanaman usqhayllata thaskirinku. Runata wañuchinapajqa manchay k'uchi kanku.

¹⁷ P'isqokunaj rikunanta tojllata churanaqa qhasilla.

¹⁸ Chay runakunarí tojllata paykunallapajtaj churakunku. Paykuna kikillankutaj wañuyman qaraykukunku.

¹⁹ Ajinata tukuy imayoj kayta munaj runakunaqa tukukonqanku, munapayasqankutaj paykunata wañuchenqa.

Yachayniyoj kayta tarinapaj

²⁰ Yachayqa uj warmipis kanman jina ñankunapi, plazakunapiwan ima jatunmanta parlan.

²¹ Yachayqa uyarichikun llajta punkukunapi, maypichus runakuna k'iski purishanku, chay cheqakunapi. Imatachus niyta munasqanta kay jinata sut'inchan:

²² Qankuna, kawsay imachus kasqanta mana yachajkuna, mayk'ajkamataj ajinallapuni kayta munankichejri? Alqochakojkuna, mayk'ajkamataj asikuspa kusirikunkichejri? Wampukuna, mayk'ajkamataj yachayta chejninkichejri?

²³ K'amisqayta uyariwaychej, noqataj yachaywan junt'achisqaykichej, imatachus yachasqaytataj rejsichisqaykichej.

²⁴ Noqa wajyarqaykichej, qankunatajrí mana uyariyta munarqankichejchu. Makiyta jaywashajtiypis, qankuna mana rikoj tukorqankichej.

²⁵ Aswanraj, imatachus yuyaychasqayta qhesacharqankichej, k'amisqaytapis mana jap'ikorqankichejchu.

²⁶ Chayrayku, llakiykuna chayamusojtiykichej, noqañataj asikusaj, manchachikuywan kharkatitishajtiykichejpis asipayallasqaykichejtaj.

²⁷ Asikullasajtaj manchachikuykuna, manchay waqay, llakiykuna ima chayamusojtiykichej, maypachachus sonqo nanayta phutiypi kashajtiykichej, muyoj wayra t'ustirparisunkichej, chaypacha.

²⁸ Chay p'unchaypi, qankuna wajyakuwankichej, manataj uyarisqaykichejchu. Mask'awankichej, manataj tariwankichejchu,

²⁹ imajtinchus qankunaqa yachayta qhesachankichej. Tata Diosta kasuytapis mana ajllakunkichejchu.

³⁰ Yuyaychasqayta mana jap'ikuyta munankichejchu, k'amisqaytapis pisipaj qhawankichej.

³¹ Mana kasukusqaykichejrayku ñak'arinkichej. Mana allin ruwayta yuyasqaykichejwantaj amichikunkichej.

³² Mana yachayniyojkunataqa pantasqallankutaj wañuchenqa. Wampu runataqa mana allinta qhawakuspa, purisqallantaj chinkachenqa.

³³ Pichus noqata uyariwajrí, mana imamanta manchachikuspa tiyakonqa, sonqo tiyaykusqataj kawsakonqa, nispa.