Oseas 9 - DIOSPA QHELQACHISQ

Tata Dios Israelta jasut'enqa

¹ Ama kusikuychu, Israel, nillataj kusikuywan phinkiriychu waj suyu jinaqa. Qanqa, grano trillana erapi Diosta wasanchaspa, waynaykikunawan khuchichakunki. Khuchichakusqaykimantataj pagota jap'iyta misk'irichikunki.

² Chayrayku Israel, qan mana trigoyoj nitaj vinoyoj kanki, mosoj vino kajpis pisilla kanqa.

³ Efrainqa Egiptoman kutirenqa, Asiriapitaj ch'ichipaj qhawasqa mikhunata mikhonqa. Manañataj Tata Diospa suyunpi tiyakonqachu.

⁴ Manaña vinotapis Tata Diosman jaywanqankuchu, nillataj Diospis uywa ñak'asqatapis tukuy sonqo jap'ikonqachu. Israelitakunaj mikhunanku t'antapis wañuypi mikhuna jina kanqa. Pikunachus mikhojkunaqa mana llimphupaj qhawasqa rikhurenqanku. Chay t'antaqa paykunallapaj kanqa. Chaywanpis Tata Diospa Templonman mana apaykuyta atenqankuchu.

⁵ Jatun raymi p'unchaypi, Tata Diospaj raymipi imatataj ruwankichejri?

⁶ Tukuchisqa kanaykichejmanta ayqejtiykichejpis, Egiptomanta runakuna jap'isonqachej, Menfis llajtapitaj ayaykichej p'ampasqa kanqa. Qolqe jallch'anaykichejman ithapallulla junt'aykonqa, jaraykichejpipis khishkalla wiñaykaponqa.

⁷ Jasut'ina p'unchay chayamunña. Ña chayamunña ruwasqankuman jina pagana p'unchay. Israelpis yachanqa chay p'unchay chayamusqanta. Qankuna ninkichej: Diosmanta sut'inchajqa wampu, yuyaychaj runapis mana yuyayniyoj, nispa. Chayta ninkichej ruwasqaykichej chay jina millay kasqanrayku, jinataj chejnikuywan junt'a kasqaykichejrayku.

⁸ Diosqa paymanta sut'inchajta Efrainta qhawananpaj churasqa, qankunatajrí purinanman tojllata churarqankichej. Diospa Templonpipis payta chejninkichej.

⁹ Imaynatachus ñawpa israelitakuna Gabaa llajtapi ruwasqanku, jinallatataj qankunapis millayta juchallinkichej. Chaywanpis Diosqa millay ruwasqaykichejta mana qonqanqachu, manachayqa juchallikusqaykichejmanta jasut'isonqachej.

Israelitakuna juchallikusqankumanta ñak'arenqanku

¹⁰ Tata Dios nin: Ñawpajta Israelta tarispa, kusikorqani, imaynatachus runakuna ch'innejpi uvata tarispa kusikunku, ajinata. Noqapaj ñawpa tataykichejkunaqa mishkha poqoj higo jina karqanku. Paykunatajrí Baal Pegorman chayaspa, qhasi manakaj dioskunaman kutirikorqanku. Munakusqanku lantita yupaychasqankurayku, mayta millachikunaman tukuporqanku.

¹¹ Efrainpa may jatun kaynenqa p'isqo jina phawaponqa. Mana astawan wawakunapis kanqañachu, manaña wijsallisqa warmikunapis kanqachu, nitaj yumasqa kajkunapis.

¹² Wawankuta uywanqanku chaypis, noqa qhechukapusaj ni uj puchuyojta. Ay, imarajchus kanqa, paykunamanta karunchakusqayrayku.

¹³ Rikuni Efrainqa Tiro llajtaman rijch'akusqanta. Payqa sumaj cheqapi sayarichisqa kashan. Chaywanpis wawankunata wañuchisqa kananpaj orqhomonqa, nispa.

¹⁴ Tata Diosníy, paykunaman qollay imachus qonaykita. Warmikunapis mana wawata rejsej kachunku, ch'aki ñuñuyojtaj, nispa.

Tata Diosqa Efrainpa contranpi phiñakun

¹⁵ Tata Dios nin: Israelitakunaqa Gilgalpi tukuy imaymana mana allin kajta ruwarqanku, chaymantapachataj paykunata chejnikuyta qallarerqani. Millay sajrata ruwasqankuraykutaj wasiymanta paykunata wijch'usaj. Manaña paykunata munakusajñachu, imaraykuchus tukuy kurajninkukuna contraypi oqharikorqanku.

¹⁶ Efrainqa parti wañusqa kashan, ch'aki saphiyoj sach'a jina. Chayrayku manaña poqonqachu. Wawankuna kajtinpis, noqa chay wawakunata wañurachisaj, nispa.

¹⁷ Kay aylloqa Diosniyta mana kasuyta munarqankuchu. Chayraykumin Diosneyqa paykunata qhesachallanqataj, paykunataj suyukuna ukhupi puriskiri jina purenqanku.