Oseas 8 - DIOSPA QHELQACHISQ

Israelitakuna k'amichikunku

¹ Waqachiychej cornetata runakuna wakichikunankupaj. Aylluypa awqan anka jina jamurishan, imaraykuchus aylloyqa yachachisqayta mana kasuspa, tratoyta p'akisqanku.

² Chaykamarí israelitakuna qhaparispa, jamuwanku: Qanta Diosniykupaj rejsikapuyku, nispa.

³ Chaywanpis israelitakuna allin kajta ruwayta qhesachanku, chayraykutaj awqankukuna paykunata qhatiykachanqanku.

⁴ Mana ch'ijllasqallayta kuraj kamachejkunata churakunku. Kuraj kamachejkunatapis ajllakunku, mana tapuriwaspalla. Qolqe metalmanta, qorinkumantapis lantikunata ruwakunku, paykuna kikinku mana allinninkuta tarikunankupaj.

⁵ Samariapi tiyakojkuna, torillo lantita yupaychasqaykichejta millachikuni. Phiñakuyniy k'ajarin contraykichejpi. Israelitakuna, mayk'ajkamataj juchayojllapuni kankichejri?

⁶ Samariapi israelitakunaj yupaychasqanku torillo lanteqa mana Dioschu. Chaytaqa runalla ruwan, chayraykutaj phirisqa kanqa.

⁷ Israelitakuna wayraman tarporqanku, oqharerqankutaj muyoj wayrata. Trigo chajra mana poqosqanrayku, jak'u mana kanqachu. Sichus poqonman chaypis, waj llajtayojkuna mikhukaponqanku.

⁸ Waj suyukuna Israelta oqokaponqanku, chay suyukunapitaj Israel lajrasqa t'uru manka jina ni imapaj walej kanqa.

⁹ Efrainqa sapan purikoj k'ita burro jina yanapata mañakoj Asiriaman risqa, khuchichakunanpajtaj qolqewan waynankunata mink'akusqa.

¹⁰ Waj suyukunaman t'inkakunata rak'irachun chaypis, noqa paykunata ch'eqerachisajpuni. Jinamanta pisi tiempota mana kuraj kamachejkuna nitaj kurajkunapis kanqachu,

¹¹ imaraykuchus Efrainqa may chhika altarkunata ruwakorqa, chaykunataj juchallinallanpaj karqa.

¹² Noqaqa may chhika yachachisqayta paykunapaj qhelqarqani. Paykunatajrí manapis paykunapajchu kanman jina chayta qhawarqanku.

¹³ Paykunaqa anchatataj uywa ñak'asqata jaywayta munanku, chay jaywasqa aychatapis mikhullankutaj. Noqatajrí mana kusisqachu chayta jap'ikuni. Aswanpis millay ruwasqankumanta yuyarikusaj, juchankumantataj paykunata jasut'isaj. Noqaqa paykunata Egiptoman kutichisaj.

¹⁴ Israelqa kamachina wasikunata ruwarin, ruwajnin Diosmantatajrí qonqakapuwan. Judapis ashkha sumaj perqasqa llajtakunata oqharin. Noqatajrí, chay llajtakunaman ninata jap'iykuchisaj, tukuy jatuchaj wasinkuna ruphananpaj.