Oseas 7 - DIOSPA QHELQACHISQ

¹ Tata Dios nillantaj: Maypachachus Efrainta, Samariatawan jampikapuyta munarqani chaypacha, juchanku, millay ruwasqanku ima sut'i rikukunku. Tukuyninku llulla kanku. Paykunaqa suwa jina wasikunaman yaykuykunku, ñan patapitaj kallpaman atinikuspa, runamanta kapuyninkuta qhechurparinku.

² Paykuna mana reparankuchu tukuy sajra ruwasqankuta mana qonqasqayta. Millayta ruwasqankoqa paykunata muyuykun, chay tukuytataj noqa rikushallanipuni.

³ Aylloyqa millay ruwasqankuwan, llullakusqankuwantaj kuraj kamachejta, kurajkunatapis kusirichinku.

⁴ Tukuyninku khuchichakuspa purinku. Paykuna q'oñirispa, pariyachisqa horno jina kanku, mayqenchus k'ajarillanpuni masa poqonankama, ajina.

⁵ Kuraj kamachej raymita ruwajtin, kurajkunaqa yuyayninkuta chinkachinankukama vinota ujyanku. Kuraj kamachejpis alqochakojkunaman k'askakun.

⁶ Paykunaj sonqonkoqa mana allinta ruwanapaj yuyaykunawan horno jina k'ajarin. Tukuy tutantin q'oshñillan chaypis, q'ayantin ujtawan lawrarillanpuni.

⁷ Arí, paykuna enqhasqa horno jina lawrarinku, jinataj kamachejninkuta q'olaspa tukuchinku. Kuraj kamachejkunatapis ujmanta uj kamachinankumanta wijch'urparinku, manataj ni ujpis kanchu qhaparikamuwajqa.

Diosmanta karunchakoj ayllu

⁸ Efrainqa waj llajtayojkunawan chhapuykukun. Paykunaqa uj ladollanmanta chayasqa t'anta jinamin.

⁹ Waj suyumanta runakunaqa paypa kallpanta tukuchishanku, paytaj mana imatapis reparakunchu. Chujchanpis yurajyapunña mana reparakusqallan.

¹⁰ Israelpa runaykachasqanqa paykunaj contranpi juchachan. Chaywanpis mana noqa Tata Diosman kutirikamuwankuchu, nitaj mask'awankuchu.

¹¹ Efrainqa mana yuyayniyoj mancharisqa urpi jina. Egiptomanta yanapananta mañakun, yanapata mask'aspataj, Asiriamanpis qayllaykullantaj.

¹² Chaywanpis jaqayman rishajtinku, noqa Tata Dios ch'ipayta patankuman wijch'uykusaj, p'isqokuna jinatataj jap'irasaj. Ajinata paykunata juchankumanta jasut'isaj.

¹³ Ay, imapichus tukukonqanku, noqamanta t'aqakuwasqankurayku. Chinkachisqa kananku p'unchay chayamonqa contrayta oqharikusqankurayku. Preciota pagaspa paykunata kacharichiyta munani, paykunatajrí llullakuspa parlawanku.

¹⁴ Puñunankupi sonqo nanayta waqanku chaypis, mana tukuy sonqochu mañakuwanku. Ukhunkutapis khuchurakuspa, trigota, vinotawan mañakuwanku. Chaywanpis contraypi oqharikullankupuni.

¹⁵ Noqa paykunata yachacherqani, kallpacharqanitaj. Paykunarí contraypi millay kajta ruwayta wakichikorqanku.

¹⁶ Lantikunaman kutiporqanku. Imaynatachus uj wist'u arcoj flechan waj ladollaman phawan, ajinallatataj paykunapis waj ladollaman ripunku. Runaykachaspa parlasqankurayku kurajninkukuna wañuchisqa kanqanku, Egipto llajtayojkunataj paykunamanta alqochakuspa asipayanqanku.