Oseas 4 - DIOSPA QHELQACHISQ

Israelitakuna Tata Diosta wasanchanku

¹ Israelitakuna, Tata Diospa nisqanta uyariychej. Payqa kay suyupi tukuy tiyakojkunawan quejaman yaykun, imaraykuchus qankuna payta wasanchankichej, nitaj khuyakuyniyoj kayta yachankichejchu, nillataj Diostapis rejsinkichejchu.

² Aswanpis manakajta tilunkichej, llullakunkichejtaj. Runata wañuchinkichej, jinataj suwankichejtaj. Sapa kuti khuchichakunkichej, kallpaman atinikuspataj, ujkunata ñak'arichinkichej, kutin kutinta runata wañuchinkichej.

³ Chayrayku kay suyu lutuchasqa jinamin, chaypi kajkunataj kallpa wañusqa kanku. K'ita animalkunapis, p'isqokunapis, chantá mama qochapi challwakunapis chinkarapushanku.

Tata Dios sacerdotekunata juchachan

⁴ Tata Dios sacerdotekunata nin: Ama ni pita ch'ataykunkichejchu nitaj wajta k'aminkichejchu. Qankuna sacerdotekunallawan quejanakuyta munani.

⁵ Qankunaqa sut'i p'unchaypi urmankichej, tutantaj noqamanta sut'inchajkunapis qankunawan khuska urmallanqankutaj. Mamaykichejtapis chinkarparichisaj.

⁶ Qankunatajrí, sacerdote kashaspa, yachachisqayta qhesacharqankichej. Chayrayku noqapis sacerdote kanaykichejmanta wijch'usqaykichej. Qankunaqa Diosniykichejpa kamachisqanta qonqaporqankichej. Kunantaj noqapis wawaykichejkunamanta qonqapullasajtaj.

⁷ Sacerdotekunaqa astawan ashkhaman mirasqankuman jina astawan contraypi juchallerqanku. Chayrayku allinpaj qhawasqa kasqankuta p'enqayman tukuchisaj.

⁸ Aylluy juchanku pampachasqa kananpaj imatachus qosqankumanta sacerdotekuna kawsanku. Chayrayku sacerdotekuna munanku aylluy juchallinallankutapuni.

⁹ Noqatajrí aylluyta, jinataj sacerdoteykunatapis chay ruwasqankuman jina jasut'isaj.

¹⁰ Paykunaqa Tata Diosta yupaychanata saqerqanku. Chayrayku mikhuspapis, mana sajsakonqankuchu. Mirayta munaspapis, mana wawayojchu kanqanku.

Israelitakuna lantikunata yupaychanku

¹¹ Sajra purikoj warmiwan purina, vinowan machana imaqa yuyayta chinkachin.

¹² Chayrayku aylloyqa k'ullumanta lantikunallata tapukunku, jinataj chay k'ullu kutichinanta suyanku. Lantikunata yupaychaspa khuchichakunku. Paykunaqa Diosninkumanta t'aqakunku sajra puriyman qokunankupaj.

¹³ Jatun orqokunapi, lomakunapipis inciensota q'oshñichinku, uywa ñak'asqatataj jaywanku. Kikillantataj ruwanku roble sach'a urapi, álamo sach'a urapi, encina sach'a urapipis. Chayrayku ususinkukuna phisu warmiman tukunku, ñojch'ankukunapis waj qharikunawan khuchichakunku.

¹⁴ Chaywanpis noqaqa ususinkukunata phisu warmiman tukusqankumanta mana jasut'isajchu, nitaj ñojch'ankukunatapis jasut'isajchu waj qharikunawan khuchichakusqankumanta. Mana paykunata jasut'isajchu, imaraykuchus qankuna qharikunapis phisu warmikunawan khuchichakoj ripunkichej. Chay warmikunawan khuskataj uywa ñak'asqata lantikunaman jaywankichej. Ajinata mana yuyayniyoj suyoqa urman.

¹⁵ Israel, sichus qan phisu warmi jina wajkunaman jaywakunki chayqa, Judallapis ama kikillantataj juchallichunchu. Judá, ama Gilgalman riychejchu, nitaj Bet Avenmanpis wichariychejchu lantikunata yupaychaj. Amallataj Tata Diospa sutinpi tiluychejchu.

¹⁶ Israelqa chukara wakilla jina mana kasukunchu. Ajina israelitakuna kashajtinku, imaynatataj Tata Dios ovejata jina paykunata sumaj qhallallaj pastopi michinmanri?

¹⁷ Efrainqa lantita yupaychayman qokapun. Chayrayku saqellaychej jina purejta.

¹⁸ Tukuyninku machasqa jina urmarqanku. Mana sayk'uyta khuchichakorqanku, aswanpis p'enqaypi kayta munarqanku jatunpaj qhawasqa kanamanta nisqaqa.

¹⁹ Chayrayku sinch'i wayra paykunata picharparenqa. Lantinkukunaman uywata q'olachispa jaywasqankuraykutaj p'enqaypi rikhurenqanku.