Oseas 2 - DIOSPA QHELQACHISQ

¹ 1 (3) Chaypacha qankuna wawqeykichejkunaman ninkichej: Diospa ayllun kankichej, nispa. Panaykichejkunamantaj ninkichej: Diospa khuyasqan kankichej, nispa.

Israelitakuna Diosta wasanchanku

² 2 (4) Chaywanpis Tata Dios nin: Israel mamaykichejta uyanpi nipuychej, imaraykuchus payqa manaña warmiychu, nitaj noqapis qosanñachu kani. Pay saqechun ujwan ujwantaj khuchichakuyta, jinallatataj amaña waj qharikunawan puñuykuchunchu.

³ 3 (5) Manachus saqenqa chayqa, imaynatachus paqarerqa, ajina q'alallata saqesaj. Ch'in ch'aki jallp'a jinaman tukuchisaj, yaku ch'akiywantaj wañuchisaj.

⁴ 4 (6) Wawankunamantapis mana khuyakusajchu, khuchichakuspa tarikusqan kasqankurayku.

⁵ 5 (7) Mamanku khuchichakorqa. Paykunata paqarichikojqa uyanpi mana yawarniyoj jina nerqa: Rispa, mask'amusaj ñawpa qhariykunata. Paykuna mikhunata qowanqanku, linomanta, millmamanta ruwasqa p'achata ima. Sumaj q'apashaj jawinawantaj jawiykuwanqanku, chantá mayta kusichiwanqanku, nispa.

⁶ 6 (8) Chayrayku Israelpa ñanninta khishkawan jark'aykuchisaj, mana ñanninta tarinanpajtaj perqata sayarichisaj.

⁷ 7 (9) Waynankunaj qhepankuta renqa, manataj taripanqachu. Mask'anqa, manataj tarenqachu. Chaypachataj nenqa: Kutipusaj ñawpa qosayman, imaraykuchus paywan aswan allin karqani kunanmanta nisqaqa, nispa.

⁸ 8 (10) Payqa mana yuyarikorqachu noqamin payman trigota, vinota, aceitetapis qosqayta. Paytajrí qolqeta, qorita ashkhata qosqaywan Baal lantikunata ruwakorqa.

⁹ 9 (11) Chayrayku kunanqa poqoy oqharina tiempopi trigoyta, vinoytapis qhechukapusaj. Qhechullasajtaj p'achallikunanpaj qosqay millmayta, linoytapis.

¹⁰ 10 (12) Chaymanta waynankunaj ñawpaqenkupi millay puriyniyoj kasqanta rikuchisaj. Ni pi payta makiymanta kacharichenqachu.

¹¹ 11 (13) Kusikuyninta chinkachisaj, nitaj mosoj killapi raymikuna, samarina p'unchaykuna, tukuy jatun raymikuna ima kanqachu.

¹² 12 (14) Uva sach'anta, higo sach'antapis chaqorachisaj, mayqenmantachus pay nirej: Kaykunataqa waynaykuna qowarqanku, nispa, chayta. Aswanpis chay tukuyta ch'umiman tukuchisaj, k'ita animalkuna mikhukapunankupaj.

¹³ 13 (15) Payqa lantikunata yupaychaspa, inciensota q'oshñicherqa. Chantá jaluchukunawan, walqakunawan ima t'ikanchaykukuspa, waynankunaj qhepanta rerqa. Noqarí, mashkha kutitachus pay noqamanta qonqaspa, chayta ruwasqanman jina payta jasut'isaj. Noqa Tata Diosmin chayta nini.

Dios Israel ayllunta munakun

¹⁴ 14 (16) Chaywanpis aswan qhepaman noqaqa sonqonta ujtawan suwasaj. Ch'insitunejman payta pusaspa, sonqonman may misk'ita parlaykusaj.

¹⁵ 15 (17) Chantá uva huertantapis kutichipusaj. Llakiynintapis kusiyman tukuchisaj. Chaypi sipasllaraj kashaspa imaynatachus k'askawarqa, ajinata k'askawanqa, maypachachus Egiptomanta llojsimorqa, chay p'unchaypi jina.

¹⁶ 16 (18) Chaypacha: Qosaymin kanki, nispa niwanqa, manañataj niwanqachu: Baal diosníy, nispa. Chayta noqa Tata Diosmin nini.

¹⁷ 17 (19) Siminmanta qhechusaj Baal sutita oqharisqanta, nitaj jayk'aj sutillantapis oqharenqañachu.

¹⁸ 18 (20) Chaypachallataj noqa israelitakunaj allinninkupaj tratota ruwasaj k'ita animalkunawan, p'isqokunawan, katarikunawan ima. Jinallatataj kay suyumanta chinkachisaj flechakunata, maqanakutapis, ajinamanta aylluy mana manchachikuspa samarikunanpaj.

¹⁹ 19 (21) Israel, noqa qanwan wiñaypaj casarakusaj. Kamachisqapi nisqanman jina cheqapuni warmiy kanki, imaraykuchus tukuy sonqoywan munakuyki.

²⁰ 20 (22) Noqa qanwan casarakusaj, manataj piwanpis wasanchasqaykichu. Chaypachataj Tata Diosniyki kasqayta rejsiwanki.

²¹ 21 (23) Noqa Tata Dios nillanitaj: Chaypacha noqa janajmanta kay pachaman parachimusaj.

²² 22 (24) Jallp'ataj poqonqa trigota, uvata, aceitunata ima, chaykunatataj Jezrelman qopusaj.

²³ 23 (25) Aylluyta kay jallp'api munayniyta ruwananpaj sayachisaj, jinataj noqallapaj kanqa. Khuyakusaj Lorrujamanta, Loamitataj nisaj: Qanmin aylluy kanki, nispa. Paytaj kutichiwanqa: Qanmin Diosniy kanki, nispa.