Oseas 14 - DIOSPA QHELQACHISQ

Oseas Israelta parlapayan

¹ Israel, Tata Diosniykiman kutirikuy juchallispa urmasqaykimanta.

² Tata Diosman kutirikuychej, kay jinata mañakuspataj, qayllaykuychej: Pampachapuwayku tukuy juchaykuta, simiykuwan yupaychasqaykutataj jap'ikuy.

³ Asiriaqa manamin qhespichiyta atiwasqaykuchu, nillataj caballokunapipis ayqesqaykuchu. Manaña: Diosniyku, nispa, noqaykoj ruwasqayku lantikunata nisqaykuchu, imaraykuchus qanllapimin wajcha wawakuna khuyakuyta tarinku.

⁴ Tata Dios nin: Mana kasukoj kasqaykichejta noqa jampisaj. Noqa tukuy sonqo munakusqaykichej mana munakunapaj jina kashajtiykichejpis, imaraykuchus phiñakuyneyqa tiyaykapunña.

⁵ Israelpaj noqa chhulla jina kasaj, paytaj lirio t'ika jina phancharenqa. Saphintaj Libanopi pino sach'aj saphin jina allin saphichasqa kanqa.

⁶ Thansankunapis olivo sach'a jina k'achitu kanqa, q'apaynintaj Libanopi pinoj q'apaynin jina kanqa.

⁷ Israelitakuna watejmanta llanthuy urapi kawsanqanku, chantá trigo jina wiñarenqanku, uva sach'a jinataj t'ikarenqanku, Libanopi vino jinataj manchay rejsisqa kanqanku.

⁸ Qan Efraín ninki: Lantikunawan ni ima ruwanay kanchu, nispa. Chantá noqa uyarisqayki, noqallataj waqaychasqayki. Noqa, qanpaj kani pino jina q'omerllapuni. Noqapitaj qan ayllúy, allin kayta tarinki.

⁹ Tukuy yachayniyojkuna, allin yuyayniyojkuna, kay simita jap'ikuchunku: Tata Diospa kamachisqanqa cheqanmin, cheqan kawsayniyojkunataj chaykunata kasunku. Mana kasukojkunatajrí chaypi misk'aspa, urmanqanku.