Oseas 12 - DIOSPA QHELQACHISQ

¹ 1 (2) Efrainqa wayrallata mikhuspa kawsan. Tukuy tuta p'unchay inti llojsimuynejmanta wayraj qhepanta ripun. Mana sayk'uspa llullakullanpuni, kallpaman atinikuspataj, millayta ruwallanpuni. Asiriawan tratota ruwan, aceite t'inkatataj Egiptoman apachin.

² 2 (3) Tata Diosqa Israelwan quejaman yaykun. Jacobpa ayllunta mana allin kajta ruwasqankuman jina jasut'enqa, chantá ruwasqanman jinataj pagaponqa.

³ 3 (4) Jacobqa manaraj paqarishaspa, wawqenpa chakinmanta jap'iykukorqa, runayaspañataj Dioswan maqanakorqa.

⁴ 4 (5) Arí, angelwan maqanakorqa, atiparqataj. Waqaspataj, angelmanta saminchananta mañakorqa. Diosqa Betelpi tariparqa, chayllapitaj Jacobwan parlarqa.

⁵ 5 (6) Chayqa Tukuy Atiyniyoj Tata Dios karqa, sutintaj Tata Dios.

⁶ 6 (7) Ajinaqa, Israel, Diosniykiman kutirikamuy. Cheqa kajta munakuy, cheqan kajtataj ruway, paypi atinikuspataj, suyakuypuni.

⁷ 7 (8) Tata Dios nin: Canaanqa mana cabalta pesaj balanzata apaykachan, imaraykuchus runakunata q'otiyaspa misk'irichikun.

⁸ 8 (9) Efraín nin: Qhapajyaykuni, jinataj tukuy imayoj kani. Jinapis ni pi ch'ataykuwanmanchu mana cheqan kajta ruwaspa qhapajyasqaymantaqa, nispa.

⁹ 9 (10) Israel, noqa Diosniyki Tata Dios kani Egipto suyupi kashasqaykimantapacha. Watejmanta toldopi tiyachisqayki, ch'innejpi imaynatachus tinkukorqanchej, chay p'unchaypi jina.

¹⁰ 10 (11) Noqa parlarqani sut'inchajkunaman. Mosqoypi jina k'iskimanta parlarqani, chay sut'inchajkunanejtataj rijch'anachinawan parlarqani.

¹¹ 11 (12) Chaywanpis Galaadpi waj dioskuna tiyan, chaykunataj qhasi manakaj dioskunalla kanku. Gilgalpi ñak'asqa jaywanapaj torota jaywanku. Altarninkukunapis llank'ana chawpipi rumi qollu jina kashan.

¹² 12 (13) Jacobqa Aram cheqaman ayqerqa, chaypitaj warmita tarinanrayku ovejata micherqa.

¹³ 13 (14) Tata Dios Israel ayllunta Egiptomanta uj sut'inchajnejta orqhomorqa, chay sut'inchajnejtataj paykunata waqaycharqa.

¹⁴ 14 (15) Chaywanpis Efrainmanta kajkuna may jinata Tata Diosta phiñacherqanku. Chayraykumin Tukuyta Kamachej Diosqa runata wañuchisqankumanta paykunata juchachanqa, millayta ruwasqankumantataj ñak'arichenqa.