Oseas 10 - DIOSPA QHELQACHISQ

Altarkuna thuñisqa kanqanku

¹ Israelqa uva sach'a jina may chhika poqoyniyoj. Chaywanpis astawan qhapajyasqankuman jina, astawan ashkha altarkunata jatarichillarqankutaj. Jallp'anku astawan sumajta poqojtin, yupaychana rumi sayantakunatapis astawan k'achituta ruwarqanku.

² Israelqa iskay sonqolla kashan, kunantaj juchanmanta jasut'isqa kanqa. Altarninkunatapis Tata Dios thuñenqa, yupaychana rumi sayantankunatapis phirenqa.

³ Kay aylloyqa ichapis nenqa: Kuraj kamachejniyku mana tiyapuwaykuchu, Tata Diosta mana manchachikusqaykurayku. Chaywanpis, kuraj kamachej noqaykurayku imatataj ruwayta atinmanri? nispa.

⁴ Paykuna parlallanku, yanqhallata imatapis ninku, tiluspa trato ruwasqankutapis p'akillanku. Chayrayku paykunapaj Diospa justician surk'u chawpipi wiñaj jaya qhora jina kanqa.

⁵ Samariamanta runakuna kharkatitinku, jinataj Bet Avenpi torillo lanti chinkachisqa kasqanmanta waqashanku. Chaymantamá chay llajtayojkuna, sacerdotekuna ima waqashanku, maypaj qhawasqanku lantinkuta wajkuna apakapusqankurayku.

⁶ Torillo lanteqa Asiriaman apasqa kanqa, kuraj kamachejman t'inkata jina jaywanankupaj. Jinamanta Efrainqa p'enqachisqa rikhurenqa. Israelpis lantinmanta p'enqakonqa.

⁷ Samariamanta kuraj kamachejqa yaku patapi tuytoj k'aspi jina chinkachisqa kanqa.

⁸ Bet Avenpi lanti yupaychana cheqakuna thuñisqa kanqanku, maypichus Israelpi tiyakojkuna juchallej kanku, chaykuna. Chay altarninkukuna patapi qhewayllukuna, khishkakuna ima wiñanqanku. Runakunataj orqokunata nenqanku: Pakaykuwayku, nispa, moqokunatataj nenqanku: Pataykuman urmaykamuwayku, nispa.

Tata Dios israelitakunata k'amin

⁹ Tata Dios nin: Israelqa mana sayk'uspa juchallikullanpuni. Gabaapi juchalliyta qallarisqankumantapacha juchallispallapuni kashan. Chayraykumari maqanakupis Gabaapi millay ruwajkunata taripanqa.

¹⁰ Maypachachus munasaj, chaypachaqa paykunata jasut'isaj. Ashkha suyukunataj contranpi tantaykukonqanku, maypachachus millay ruwasqanmanta paykunata jasut'isaj, chaypacha.

¹¹ Efrainqa mansuyachisqa vakilla jina erapi trillaspa misk'irichikun. Noqatajrí llosq'o kunkitanman llasa yugota watani carretata aysananpaj. Judaqa llank'anqa, Jacobtaj rastranqa.

¹² Paykunata nerqani: Cheqan kaj ruwayta tarpuychej, munakuytataj oqharinkichej. Barbechota ruwaychej, imaraykuchus Tata Diosta mask'ana p'unchay chayamunña. Pay jamuspa qhespichisonqachej, chaytaj ch'aki jallp'apaj para jina kanqa.

¹³ Qankunarí millay kajta ruwanata tarporqankichej, jinataj oqharerqankichej mana allin kajta. Imatachus llullakuspa tarisqaykichejta mikhorqankichej, imaraykuchus maqanakuna carretaykichejkunapi, wapu soldadoykichejkunapi ima atinikorqankichej.

¹⁴ Chayrayku qankuna ukhupi ch'ajwa sayarenqa. Jark'achasqa wasiykichejkunapis pampachasqa kanqanku, imaynatachus kamachej Salmanpa soldadonkuna maqanakupi Bet Arbelta chinkachisqanku, ajinata. Chaypacha mamakunata wawakunata ima ch'allparqanku.

¹⁵ Betelpi tiyakojkuna, chay jinata juchallisqaykichejrayku, ajinallatataj qankunatapis qhatirisonqachej. Sut'iyamushajtintaj, Israelpa kuraj kamachejnin wañuchisqa kanqa.