Oseas 1 - DIOSPA QHELQACHISQ

Oseas casarakun

¹ Judá suyupi Uzías, Yotán, Ajaz, jinataj Ezequías ima ujmanta uj kamachishajtinku, chantá Israel suyupi Joaspa churin Jeroboán kamachishajtin, Tata Diosqa Beríj churin Oseasta parlapayarqa.

² Tata Diosqa Israel suyuman Oseasnejta parlayta qallarispa, kay jinata nerqa: Israel suyoqa noqamanta t'aqakuspa, khuchichakun. Ajinallataj qanpis riy warmillikamuy uj khuchi warmiwan, chay warmipi wawayojtaj kay, jinamanta khuchichakoj warmej wawankuna nisqa kanankupaj, nispa.

³ Chantá Oseasqa Diblayinpa ususin Gomerwan casarakorqa. Chay warmi wijsallisqa rikhurispataj, qhari wawata Oseaspaj paqarichikorqa.

⁴ Chantá Tata Diosqa Oseasta nerqa: Chay wawata Jezrel sutiwan sutichay, imaraykuchus mana unaymantachu kuraj kamachej Jehúj ayllunta jasut'isaj Jezrelpi runakunata wañurachisqanmanta. Jinamantataj Israelta wajpa makinman jaywaykusaj.

⁵ Chay p'unchaypi noqaqa Jezrel vallepi Israelpa soldadonkunaj atiyninkuta phirisaj, nispa.

⁶ Chantá Gomer ujtawan wijsallikuspa, uj warmi wawatañataj paqarichikorqa. Jinapi Tata Diosqa Oseasta nerqa: Chay wawata Lorrujama sutiwan sutichay, imaraykuchus noqaqa manaña Israel suyumanta khuyakusajchu. Manataj paykunata ujtawan qhespichisajchu.

⁷ Judá suyumantarí khuyakusaj. Tata Diosninku jina noqa paykunata kacharichisaj mana maqanakuwanchu, nitaj flechawanchu, nitaj espadawanchu, nillataj caballokunapi purejkunawanchu, nispa.

⁸ Lorrujamata p'itisqanmanta, Gomerqa ujtawan wijsallikuspa, uj qhari wawatañataj paqarichikorqa.

⁹ Chaypacha Tata Diosqa Oseasta nerqa: Chay wawata Loamí sutiwan sutichay, imaraykuchus Israelqa manaña aylluychu kanqa, nitaj noqapis Diosninkuñachu kasaj, nispa.

Israel suyu watej oqharisqa kanqa

¹⁰ 10 (2.1) Chaywanpis uj p'unchaypi Israelpa mirayninku mama qocha kantupi t'iyu jina kanqanku. Ni pi chimpuyta, nitaj yupayta atenqachu. Mana aylluychu kankichej, nispa ninaytaqa, paykunata nisaj: Qankunaqa noqa kawsaj Diospa wawaykuna kankichej, nispa.

¹¹ 11 (2.2) Chaypacha Judá suyumanta kajkuna, Israel suyumanta kajkunawan ujllaman tantakonqanku. Paykuna uj kamachejllata churakonqanku, chantataj tukuynejmanta Jerusalenman kutimponqanku. Jezrelpa p'unchaynenqa may yuyarisqamin kanqa.