Nehemías 9 - DIOSPA QHELQACHISQ

Esdrasqa israelitakunaj juchankuta Diosman rimarin

¹ Chantá israelitakunaqa chay kikin killallapitaj iskay chunka tawayoj kaj p'unchayninpi watej tantakorqanku. Chaypi qhashqa p'achata churakorqanku, ayunarqanku, jallp'atataj umankuman qhallaykukorqanku juchankumanta llakisqa kasqankumanta yachayta qonankupaj.

² Paykuna ñapis mana judiokunamanta t'aqakusqankuña. Chantá sayarikuspa, sapa uj juchankuta, jinallataj ñawpa tatankoj juchankutapis Diosman rimarerqanku.

³ Chaypi sayashajtinkutaj, levitakunapis tukuypa uyarinanta kinsa phanitapuni Tata Diosninkoj kamachisqanta jatunmanta ñawirerqanku. Waj kinsa phanitawan chay runakunaqa Tata Diosman juchankuta rimarerqanku, chantá Tata Diosta yupaycharqanku.

⁴ Chaymantataj levitakunamanta Josué, Bani, Cadmiel, Sebanías, Binuy, Serebías, Bani, Quenani ima chay tarimaman wicharispa, jatunmanta qhaparispa Tata Diosmanta mañakorqanku.

⁵ Chaymantataj levitakunamanta Josué, Cadmiel, Bani, Jasabnías, Serebías, Hodías, Sebanías, Petajías ima runakunata nerqanku: Sayarikuspa, Tata Diosninchejta wiñay wiñaypaj yupaychaychej, nispa. Chantá Diosman parlaspa, kay jinata nerqanku: Tata Diosniyku, may sumaj sutiykeqa jatunchasqa kachun, tukuy kaj chhika patapi tukuy jatunchaymanta aswan patapi.

⁶ Qanllamin uj k'ata Tata Dios kanki. Qan ruwarqanki janajta, janajmanta aswan patapi kajtapis, chaypi tukuy kaj ch'askakunatapis. Ruwallarqankitaj kay pachata, chaypi tukuy ima kajtapis, mama qochatapis, chaypi tukuy ima kajtapis. Qanqa tukuy imaman kawsayta qonki. Chayraykumá janajpi tukuy ch'askakunapis yupaychasunku.

⁷ Qanqa Tata Dios, Abramta ajllaspa, payta Caldea suyupi Ur llajtamanta orqhomorqanki, suticharqankitaj Abraham sutiwan.

⁸ Repararqanki payqa qanpi atinikoj runa kasqanta, jinataj paywan uj tratota ruwarqanki. Nerqankitaj payman jinataj mirayninman uj jallp'ata qonaykita, maypichus cananeokuna, jititakuna, amorreokuna, ferezeokuna, jebuseokuna, gergeseokuna ima tiyakusharqanku, chay jallp'ata. Chay nisqaykitataj junt'arqanki, imaraykuchus qanqa nisqaykita junt'ajmin kanki.

⁹ Qanqa ñawpa tataykukuna imaynatachus Egiptopi ñak'arisqankuta rikorqanki, Puka Mama Qocha kantupipis qhaparikamususqankuta uyarerqanki.

¹⁰ Chayrayku faraonpa contranpi, kamachinkunaj contrankupi, jinataj chay jallp'api tukuy runajpa contrankupi ima runaj mana jayk'aj rikusqanta, may t'ukuna imakunata qan rikucherqanki, imaraykuchus rikorqanki imaynatachus israelitakunata llakichisqankuta. Jinamanta sutiyki may uyarisqa kashan kunankama.

¹¹ Chantá israelitakunaj ñawpaqenkupi mama qochata iskayman t'aqarqanki, chawpintataj ch'akipipuni chimparqanku. Egiptomanta soldadokunatatajrí ukhu qochaman chinkaykucherqanki.

¹² Chaymantataj israelitakunata pusarqanki p'unchayninpi phuyuwan llanthuykuspa, tutanpitaj nina k'anchaywan k'anchaykuspa.

¹³ Chaymanta Sinaí orqoman urayk'amorqanki, paykunamantaj parlamorqanki. Cheqan kamachisqaykita, cheqan sumaj yachachisqaykita ima paykunaman qorqanki.

¹⁴ Yachachillarqankitaj samarina p'unchaypi samarinankumanta. Kamachiyki Moisesnejta paykunaman waj kamachisqakunatawan, yachachiykunatawan ima yachacherqanki.

¹⁵ Paykunaman janaj pachamanta t'antatapis qollarqankitaj yarqhayninkupi sajsakunankupaj. Yakutapis chhankamanta phullchicherqanki ch'akiyninkuta thasnunankupaj. Chaymantataj kamacherqanki jallp'ata jap'ej yaykunankuta, mayqentachus tiluspa nerqanki qonaykita, chay jallp'ata.

¹⁶ Chaywanpis paykunawan, ñawpa tataykukunawan imaqa may machu machu, rumi sonqotaj karqanku, manataj kamachisqaykitaqa kasorqankuchu.

¹⁷ Mana kasukuyta munarqankuchu, nitaj yuyarikorqankuchu t'ukuna imakunata paykunata khuyaspa ruwasqaykimanta. Aswanpis may rumi sonqo kasqankurayku, Egiptopi wata runa kayman kutiripunankupaj uj kamachejta churakorqanku. Chaywanpis qanqa juchata pampachayta yachaj Diosmin kanki, llamp'u sonqo, khuyakuyniyoj, munakuyniyojtaj. Chayrayku paykunataqa mana saqerparerqankichu.

¹⁸ Qorita unuyachiytawan, uj waka uñata ruwakuspa, nerqanku: Kaymá Egiptomanta orqhomuwarqanchej, chay Dios, nispa. Chayta ruwaspa chay chhika millay juchata ruwarqanku.

¹⁹ Chaywanpis qan jatun khuyakuyniykirayku mana paykunata ch'in pampapi saqerparerqankichu. Llanthoj phuyoqa ñanninkuta pusaspa, manapuni paykunamanta p'unchayninpi t'aqakorqachu. Nitaj k'anchaypis tutanpi paykunamanta t'aqakullarqatajchu, purinanku ñanta k'anchaspa.

²⁰ Chay jawarí paykunata yachachinaykipaj, k'acha Espirituykita qorqanki. Manataj jayk'ajpis siminkumanta piserqachu janaj pachamanta apachimusqayki t'antaqa. Yakutapis ch'akiyninkuta thasnunankupaj qorqanki.

²¹ Tawa chunka wata junt'ata ch'in pampapi mikhuyta qorqanki, manataj jayk'ajpis imallankupis piserqachu. P'achankupis mana thantakorqachu, nitaj chakinkupis punkerqachu.

²² Qan ñawpa tataykukunaman llajtakunata, suyukunata ima qollarqankitaj. Jallp'atapis sapa ujman rak'irallarqankitaj. Ajinamanta paykunaqa Jesbonta kuraj kamachej Sijonpa jallp'anta, chantá Basanta kuraj kamachej Ogpa jallp'antawan jap'ikaporqanku.

²³ Paykunata mirachillarqankitaj janajpi ch'askakuna chhikatapuni. Ñawpa tatankuman qonaykita nerqanki, chay suyumanpis paykunata pusallarqankitaj.

²⁴ Ñawpa tataykukuna chay cheqaman yaykuspa, Canaanpi jallp'akunata jap'ikaporqanku. Qantaj chay llajtayojkunata paykunaj ñawpaqenkupi k'umuykachacherqanki, jinataj kuraj kamachejninkuta, chay cheqapi tiyakojkunatapis makinkuman churarqanki, paykunawan munayninkuta ruwanankupaj.

²⁵ Paykunataj sumaj perqawan muyuchisqa llajtakunata, waj jina poqoyniyoj sach'akunatapis, tukuy allin imawan junt'asqa wasikunata ima jap'ikaporqanku. Jinallataj yaku jap'ina qochakunata, uva huertakunata, olivo sach'akunata, waj jina poqoyniyoj sach'akunatapis jap'ikapullarqankutaj. Sumaj mikhunata mikhorqanku sajsakunankukama, jinaspataj wirayarqanku, chay jatun khuyakuyniykipitaj kusikorqanku.

²⁶ Chaywanpis, Tata Dios, paykunaqa mana kasukojkuna karqanku. Contraykipi oqharikorqanku, kamachisqaykitataj qhesacharqanku. Chantaqa sut'inchajniykikunata wañucherqanku uyankupi qanman kutirikamunankuta k'amisqankurayku. Chaymantataj aswan millayta ruwaspa, sonqoykita nanachisorqanku.

²⁷ Chayrayku qanqa paykunata awqankoj makinkuman jaywaykorqanki, chay awqankukunataj sinch'ita paykunata ñak'aricherqanku. Chantá may llakiypi rikukuspa, aylluykeqa qan yanapanaykita mañakusorqanku. Qantaj jatun munakuyniykirayku janaj pachamanta uyarimuspa, chay ñak'arichejkunaj makinkunamanta kacharichinankupaj runakunata churarqanki.

²⁸ Jinapis paykunapaj allin kawsay kajtin, watejmanta ñawpaqeykipi juchallillajñataj kanku. Chayrayku watej awqankunaj makinman urmajta saqerqanki, chay runakunataj chakinku uraman israelitakunata churarqanku. Chantataj yanapayniykita mañakullasojtaj kanku. Qantaj khuyakuyniykipi uyarimullajtaj kanki janaj pachamantapacha, ashkha kutita paykunata kacharichinaykipaj.

²⁹ Qanqa paykunata k'amej kanki kamachisqaykita watej junt'anankupaj. Paykunatajrí may kasqankuta yuyakuspa, kamachisqaykita mana kasojchu kanku. Nisqaykita p'akej kanku, mayqentachus junt'aspa kawsayta tarinanku karqa, chayta. Paykunatajrí qanpa contraykita oqharikuspa, rumi sonqo kasqankurayku, mana uyarikorqankuchu.

³⁰ Watan watanta paykunawan pacienciakorqanki. Espirituykiwan, sut'inchajkunapiwan paykunaman willachej kanki kamachisqaykita junt'anankuta. Chaytapis manallataj kasojchu kanku, chayraykutaj waj suyukunaj makinkuman paykunata jaywaykorqanki.

³¹ Chaywanpis jatun khuyakuyniykirayku mana tukuyninkutachu tukucherqanki, nitaj paykunata saqerparerqankichu, khuyakoj Dios, munakuyniyojtaj kasqaykirayku.

³² Chayrayku, Diosniyku, qanqa jatun Dios kanki, atiyniyojtaj, manchachikuna imataj. Munakuyniykipitaj trato ruwasqaykita mana saqenkichu. Chayrayku ama pisipaj qhawaychu imaynatachus jatun llakeyqa kuraj kamachejniykukunata, kurajniykukunata, sacerdoteykukunata, sut'inchajniykukunata, ñawpa tataykukunata, jinataj tukuy aylluntinta ima qhatirisqanta. Chay llakeyqa Asiriata kuraj kamachejkunaj tiemponmantapacha kunankama qhatirishawaykupuni.

³³ Mana qanchu juchayoj kanki chay llakiykuna qhatiriwasqaykumanta, imaraykuchus qanqa cheqan sonqowan imatapis ruwapuwayku, noqaykutajrí sajra kajllata ruwayku.

³⁴ Kuraj kamachejniyku, kurajniykukuna, sacerdoteykukuna, ñawpa tataykukuna ima, kamachisqaykita mana junt'arqankuchu. Nillataj kamachisqaykikunata, nitaj k'amisqaykitapis kasorqankuchu.

³⁵ Chaywanpis paykunaqa kamachiyninkupi kashaspa, ashkha allichaj imakunata qoshajtiykipis, jinataj sumajta poqoj jallp'ata qoshajtiykipis, manapuni munayniykita ruwarqankuchu, nitaj sajra ruwasqankumanta t'aqakuspa qanman kutirikamusorqankuchu.

³⁶ Kunantaj qhawariy: Ñawpa tataykukunaman jallp'ata qorqanki, chay jallp'aj poqosqanmanta kawsanankupaj. Noqaykurí chay kikin jallp'allapitaj wata runa kashayku.

³⁷ Chay jallp'api tukuy ima sumajta poqon. Chaywanpis chayqa kuraj kamachejkunaj pirwallankuman rin, pikunatachus juchaykurayku kamachinawaykupaj churarqanki, chaykunajpaman. Paykunaqa noqaykuwan jinataj uywaykukunawanpis munayninkuta ruwanku, noqaykutaj may jina ñak'arichisqa kashayku, nispa. Ajinata chay levitakuna Diosmanta mañakorqanku.

Israelitakuna tratota ruwanku

³⁸ Chantá israelitakunaqa nerqanku: Chay tukuy imarayku noqaykoqa tukuy sonqowan kay tratota ruwayku. Kay trato ruwasqamantaj sutinkuta, sellonkuta churanku kamachejniykukuna, levitakuna, jinataj sacerdotekunapis.