Nehemías 8 - DIOSPA QHELQACHISQ

Esdras Diospa kamachisqanta ñawirin

¹ Tukuy runakuna uj runa jinalla plazapi, Yaku punkoj ñawpaqenpi tantakorqanku. Chantá yachachej Esdrasta nerqanku: Ama jinachu kay, aparimuy Tata Diospa qosqan qhelqata, mayqentachus Moisesnejta Israelman qosqa, chayta, nispa.

² Qanchis kaj killa qallariy p'unchaypi, sacerdote Esdras kamachisqakunamanta qhelqata apamorqa, maypichus qharikuna, warmikuna, yuyayninkupiña karqanku, chay tukuy wawakuna ima tantakorqanku, chayman.

³ Chantá sut'iyaymantapacha chawpi p'unchaykama Esdrasqa tukuypa uyarinankuta chay qhelqata ñawirerqa Yaku punku nisqa plazapi. Paykunataj kamachisqakunamanta qhelqata sumajta uyarerqanku.

⁴ Yachachej Esdrasqa tarima patapi sayasharqa. Pañanpi kaykuna karqanku: Matatías, Semá, Anías, Urías, Hilcías, Maseías ima. Lloq'enpitaj karqanku: Pedaías, Misael, Malquías, Jasún, Jasbadana, Zacarías, Mesulán ima.

⁵ Chantá Esdras chay qhelqata kicharerqa, tukuy runataj payta rikuyta aterqanku, tukuyninkumanta aswan patapi sayashasqanrayku. Qhelqata kicharejtinkamataj, tukuy sayarikorqanku.

⁶ Jinapi Esdrasqa Tukuy Atiyniyoj Tata Diosta yupaycharqa, tukuy runataj makinkuta oqharispa, kuticherqanku: Ajina kachun, ajina kachun, nispa. Chaymantataj pampakama k'umuykuspa, Tata Diosta yupaycharqanku.

⁷ Kay levitakuna Diospa kamachisqanmanta yachacherqanku: Josué, Bani, Serebías, Jamín, Acub, Sabetay, Hodías, Maseías, Kelita, Azarías, Yozabad, Janán, Pelaía ima. Chaykamataj runakunaqa kikinpi sayaspallapuni kasharqanku.

⁸ Levitakunaqa jatunmanta ñawirerqanku Diospa kamachisqanmanta qhelqata, chaymantataj chay ñawirisqankuta sut'incharqanku uyarejkunaman tukuyninku chayta allinta jap'eqanankupaj.

⁹ Chaypi tantasqa runakunaqa Diospa kamachisqanmanta uyarispa, waqarqanku. Chayrayku kamachej Nehemiasqa, yachachej sacerdote Esdraspis, levitakuna ima tukuy runata nerqanku: Kay p'unchayqa Tata Diospaj t'aqasqan, chayrayku ama llakikuychejchu nitaj waqaychejchu, nispa.

¹⁰ Chantá Nehemías nillarqataj: Riychej, allin mikhunata mikhukamuychej, upi vinotataj ujyarikamuychej. Wajchakunamantaj mikhunaykichejmanta jaywariychej, imaraykuchus kay p'unchayqa Tukuyta Kamachej Diospaj t'aqasqamin. Ama llakikuychejchu, imaraykuchus kusichisoj Tata Diosniykichej kallpachasonqachej, nispa.

¹¹ Ajinallatataj levitakunapis runakunata ch'inyacherqanku: Amaña waqaychejchu, kay p'unchay Diospaj t'aqasqa kasqanrayku, ama llakikuychejchu, nispa.

¹² Ajinaqa tukuy mikhoj, ujyajtaj riporqanku. Mikhunatapis wajkunaman jaywarerqanku, sumaj raymitataj ruwarerqanku, imaraykuchus uyarisqankuta sumajta sonqonkupi jap'eqarqanku.

Ch'ujlla Ruwana raymita ruwanku

¹³ Q'ayantenqa, sapa ayllumanta kurajkuna, chantá sacerdotekuna, levitakuna ima yachachej Esdraswan tantakorqanku, Diospa kamachisqan qhelqa imatachus nisqanta yachaqanankupaj.

¹⁴ Chaypitaj repararqanku Tata Dios imatachus kamachin Moisesnejta kamachisqanta: Chay qanchis kaj killapi yuyarikuy raymita ruwashaspa, israelitakunaqa ch'ujllakunapi tiyakunanku karqa.

¹⁵ Chaypacha tukuy Judapi llajtakunaman, jinataj Jerusalenpipis willachinanku karqa: Tukuy runaqa monteman rispa, thansakunata k'utuychej olivo sach'amanta, k'ita olivomanta, arrayanmanta, palmera sach'akunamanta ima. Jinallataj chay thansakunata apamuspa, chaywan ch'ujllakunata ruwakuychej kamachisqa kasqanman jina, nispa.

¹⁶ Chantá tukuyninku sach'a thansakunawan ch'ujllata ruwakorqanku, wakin wasi patapi, wakin patiopi, wakintaj Diospa Templonpa pationpipis, Yaku punku nisqa plazapipis, jinallataj Efrainpa punkun nisqa plazapipis.

¹⁷ Israelitakuna waj suyuman apasqa kasqankumanta kutimpojkunaqa tukuyninku ch'ujllata ruwakorqanku, chaypitaj tiyakorqanku. Nunpa churin Josué kawsasharqa, chaymantapacha, Nehemiaspa p'unchayninkama mana jayk'ajpis chay jina raymita ruwasqankuchu. Paykunataj chaypacha may jinata kusikorqanku.

¹⁸ Chay raymita chay qanchis p'unchaykunapi israelitakuna ruwashajtinku, Esdrasqa sapa p'unchay Diospa kamachisqanmanta qhelqata paykunaman yachacherqa. Pusaj kaj p'unchaypitaj tukuyninku jatun tantakuypi tantakorqanku, kamachisqa kasqanman jina.