Nehemías 6 - DIOSPA QHELQACHISQ

Nehemiasta wañuchiyta yuyanku

¹ Sambalat, Tobías, Arabiamanta Guesén, waj awqakuna ima yacharqanku watej llajtaj perqata oqhariyta tukusqaykuta, mana ni uj cheqata q'asallata saqespa. Chaywanpis punkuta mana churarqaykurajchu.

² Chantá, Sambalat, Guesenwan ima nichimuwarqanku Onó nisqa pampapi noqawan parlayta munashasqankuta. Paykunatajrí mana allinta ruwawayta yuyarqanku.

³ Chayrayku noqa willacherqani: Uj jatun ruwanapi kaspa, mana tiempoyoj kani, manataj riyta atiymanchu qankunawan parlaj. Rinaykamataj ruwanay sayasqa kanman, nispa.

⁴ Tawa kutikama paykuna chayllatapuni nichimuwarqanku, noqataj sapa kuti kikillantataj kuticherqani.

⁵ Sambalatqa phishqa kutipi uywasqannejta uj cartata apachimuwarqa.

⁶ Chay cartapitaj kay jinata nerqa: Runakuna parlashanku, chantá Guesenpis nillantaj qan, jinataj judío masiykikunapis yuyashankichej kuraj kamachej Artajerjespa contranpi oqharikuyta. Chayrayku perqata watej oqharichishankichej. Chay nisqankuman jinaqa qanchá kuraj kamachejninku kayta munashanki.

⁷ Chaypajtaj Diosmanta sut'inchajta churasqanki, Jerusalenpi kuraj kamachejpaj churasunankupaj, ninankupajtaj: Judá suyupi kuraj kamachej tiyanña, nispa. Chay runaj parlasqantaj kuraj kamachej Artajerjeskama chayanman. Chayrayku jamuypuni ari, chaymanta parlarisunchej, nispa.

⁸ Noqatajrí Sambalatman nicherqani: Chay nisqaykeqa mana jinachu. Astawanpis chay tukuy imaqa qanpa yuyasqallayki, nispa.

⁹ Paykunaqa mancharichiyta munawarqayku jinamanta iskayrayanaykupaj, manataj chay ruwanata tukuyta atinaykupaj. Chaywanpis noqaqa mañakorqani: Diosníy, kallpachaway, nispa.

¹⁰ Chaymanta Semaiaspa wasinman rerqani. Payqa Delaiaspa churin karqa, Mehitabelpa allchhintaj. Paytaj niwarqa: Jaku Diospa Templonman pakakamunachej. Punkunta sumajta wisq'aykunkichej, imaraykuchus kunan ch'isi qanta wañuchej jamonqanku, nispa.

¹¹ Noqatajrí nerqani: Noqa jina runaqa mana ayqenchu, nitaj Diospa Templonpi pakakunchu mana wañuchinankupaj. Noqaqa manapuni pakakusajchu, nispa.

¹² Chay jawaqa repararqani payqa mana Diospa nisqantachu parlawasqanta. Manachayqa chay tukuyta nisharqa Sambalat, Tobías ima lluk'iykusqankurayku.

¹³ Payman lluk'iykorqanku noqata mancharichinawankurayku, chantá juchallichinawankurayku. Chay jinamanta mana allin runata p'enqaypitaj rikhurichiwankuman karqa.

¹⁴ Jinapi Diosmanta kay jinata mañakorqani: Diosníy, yuyarikuy ari Sambalatwan, Tobiaswan imatachus ruwasqankumanta. Amallataj qonqapuychu sut'inchaj Noadiasmanta, nillataj waj sut'inchajkunamanta, pikunachus manchachiwayta munarqanku, chaykunamanta, nispa.

¹⁵ Chantá Jerusalén llajtaj perqanta oqhariyta tukorqayku Elul killapi iskay chunka phishqayoj kaj p'unchayninpi. Chaytataj phishqa chunka iskayniyoj p'unchaypi tukucharqayku.

¹⁶ Awqaykukuna, muyuyniykupi tukuy suyukunapis chayta yachaspa, mayta manchachikorqanku. Chay runaykachasqankupis k'umuykuchisqa karqa, imaraykuchus yacharqanku tukuy ruwasqaykupi Tata Dios yanapawasqaykuta.

¹⁷ Chaypacha kutin kutinta Tobiaswan, Judamanta kurajkunawan cartata apachinakorqanku.

¹⁸ Judá ayllumanta ashkha runakuna Tobiaswan ujchakusqanku, Arajpa churin Secaniaspa tolqan kasqanrayku. Jinataj Tobiaspa churin Johanán casarakullasqataj, pichus Berequiaspa churin karqa, chay Mesulanpa ususinwan.

¹⁹ Chayrayku uyarinayta Tobiasmanta allinta parlarqanku, noqaj parlasqaytapis payman willarqamoj kanku. Tobiastaj mancharichiwayta munaspa, noqamanpis cartakunata apachimullawarqapuni.