Nehemías 5 - DIOSPA QHELQACHISQ

Judiokuna ukhupi ch'ajwa rikhurin

¹ Chaymanta qhepaman judiokuna ukhupi ch'ajwa rikhurerqa, warmikunataj qharikunataj chay llajta masinku judiokunajpa contrankuta rimarqanku.

² Paykunamanta wakin nerqanku: Noqaykoqa ashkha qhari wawayoj, warmi wawayoj kayku. Chayrayku trigota munayku, mana yarqhaymanta wañunaykupaj, nispa.

³ Wakintaj nerqanku: Noqaykupaj mikhuna pisisqanrayku, jallp'aykuta, uva huertaykuta, jinataj wasiykutapis prendaykorqayku, nispa.

⁴ Wakin nillarqankutaj: Kuraj kamachejman impuestota paganaykupaj jallp'aykuta, uva huertaykuta prendaspa, qolqeta manukorqayku.

⁵ Noqaykupis paykunapis uj ayllullamanta kayku. Wawaykukunapis paykunaj wawankukuna jinallataj kanku. Chaywanpis noqaykoqa wawaykuta, ususiykukunata wata runata jina vendeykuña. Ñapis ususiykukunamanta wakinkuna wata runaña kanku, noqaykutaj mana imatapis ruwayta atiykuchu paykunata kacharichinaykupaj, imaraykuchus jallp'aykupis, huertaykupis wajkunajtaña, nispa.

⁶ Chay quejakusqankuta, jinataj nisqankuta uyarispa, anchata phiñakorqani.

⁷ Allinta umacharikuytawantaj, kurajkunata, kamachejkunata ima k'amerqani: Imajtintaj llajta masiykichejmanta interesta orqhoshankichejri? nispa. Chantá tukuy runakuna tantakunankuta nerqani chay imakunamanta parlanapaj.

⁸ Tukuy tantasqa kashajtinku, paykunata nerqani: Tukuyninchej atisqanchejman jinaqa kallpakushanchej pagaspa llajta masinchej judiokunata kacharichinanchejpaj, pikunachus waj suyukunamanta kajkunaman wata runapaj vendesqa karqanku, chaykunata. Kunantajrí qankunaqa watej paykunata wata runapaj vendeshankichej. Ujtawanchu pagaspa paykunata kacharichisqayku? nispa. Paykunatajrí ch'inpacha qhepakorqanku, manataj imatapis kutichiyta aterqankuchu.

⁹ Chantá noqa nillarqanitaj: Imatachus ruwashankichej, chayqa mana walejchu kashan. Qankunaqa Diosninchejta may jatun respetowan qhawanaykichej karqa, ajinamanta awqanchej mana asipayanawanchejpaj.

¹⁰ Noqaj aylloyqa, kamachiykunapis, noqapis pisichikojkunaman qolqeta, trigota ima manorqayku. Chaywanpis mana interesniyojtachu manuta qochikaporqayku.

¹¹ Chayrayku uyariwaychej: Chay manuchakojkunaj jallp'ankuta, uva huertankuta, olivo sach'ankuta, wasinkutapis kunanpacha kutichipuychej. Ajinallatataj mashkha interestachus jap'ikorqankichej qolqeta, granota, vinota, aceitetapis manusqaykichejmanta, chaytapis paykunaman kutichipullaychejtaj, nispa.

¹² Paykunataj kutichiwarqanku: Arí, kutichipusqayku tukuy imata, manataj ni imatapis mañakapusqaykuñachu. Nisqaykiman jina ruwasqayku, nispa. Chaypacha sacerdotekunata wajyacherqani, ñawpaqenkupitaj runakunata tilucherqani, kutichipusaj nisqankuta junt'anankupaj.

¹³ Chay jawaqa p'achayta thalarikuspa, nerqani: Ajinata Diosqa pichus kay nisqanta mana junt'ajta wasinmanta wijch'urparichun, chay runataj mana ni imayoj rikhurichun, nispa. Chantá tukuy runakuna nerqanku: Ajina kachun, nispa. Tata Diostataj yupaycharqanku, nisqankutataj junt'arqanku.

¹⁴ Kuraj kamachej Artajerjes iskay chunka watamanta, kinsa chunka iskayniyoj watakama kamachishajtin, noqata churawarqa Judá suyupi kamachej kanaypaj. Chay churawasqan p'unchaymantapachataj chunka iskayniyoj watata mana noqaqa, nitaj kamachiykunapis, jap'ikorqaykuchu, imatachus kamachejman qonanku karqa mikhunanpaj, chayta.

¹⁵ Noqamanta aswan ñawpaj kaj kamachejkunaqa tukuy runata ch'irwasqanku. Paykunaqa tawa chunka qolqeta sapa p'unchay pagachikoj kanku mikhunankupaj, ujyanankupajwan. Chay kamachejkunaj kamachinkunapis runakunawan munayninkuta ruwallajtaj kanku. Noqarí mana chayta ruwarqanichu Diosta may jatun respetowan qhawasqayrayku.

¹⁶ Chay jawarí llajta perqanapi noqa kikin yanapaysikorqani, manataj jallp'akunatapis rantikorqanichu. Jinallataj kamachiykunapis noqawan khuska llank'arqanku.

¹⁷ Wasiypi noqawan mikhojkunaqa judiokunamanta, kamachejkunamantawan 150 karqanku. Chay qaylla suyukunamanta waturiwaj jamojkunapis wajlla karqanku.

¹⁸ Noqataj sapa p'unchay uj bueyta ñak'achej kani, sumajnin kaj sojta ovejakunata, jinallataj wallpakunatapis. Sapa chunka p'unchaymantataj vinota ashkhata jaywaj kayku. Chay tukuywanpis kamachej jina manapuni pagota mañakorqanichu, imaraykuchus repararqani judiokunaqa mana pagayta atisqankuta.

¹⁹ Chayrayku kunan nini: Yuyarikuy noqamanta, Diosníy, allin rinawanpaj, chay tukuy imata judío masiykunarayku ruwasqaymanta, nispa.