Nehemías 4 - DIOSPA QHELQACHISQ

¹ Sambalatqa noqayku watejmanta perqata jatarichishasqaykuta yachaspa, sinch'ita phiñarikorqa. Chayrayku noqayku judiokunamanta asiykukuyta qallarerqa.

² Llajta masinkoj ñawpaqenpi, Samariamanta soldadokunaj ñawpaqenkupiwan kay jinata nerqa: Imatataj kay yarqhaymanta wañusqa judiokuna ruwayta yuyankuri? Yuyarqankuchu ujtawan uywa ñak'asqata jaywayta? Chayrí uj p'unchayllapichu perqa oqhariyta tukuychayta yuyanku? Chayrí yuyankuchu laqaya ukhumanta mosoj rumita orqhoyta? nispa.

³ Sambalatpa ladonpitaj amonita Tobías kasharqa, paypis nillarqataj: Qhawariychej má chay perqa ruwasqankuta. Uj atojllaraj chay pataman wicharispa, urmaykuchinman, nispa.

Nehemías Diosmanta mañakun

⁴ Chaypacha Diosmanta mañakorqani: Diosniyku, uyariy imaynatachus noqaykumanta asiykukuwasqaykuta. Kay waqachiwasqaykoqa paykunaj patallankumantaj chayachun. Awqankoj makinkuman urmaspataj, waj suyukunaman apasqa kachunku.

⁵ Ama juchankuta qonqayman churaychu, nitaj chay sajra ruwasqankuta qhespichiychu, imaraykuchus paykunaqa perqata oqharichejkunaj sonqonkuta p'akiykunku, nispa.

Awqakuna perqa oqharinankuta jark'anku

⁶ Chaywanpis perqata oqharishallarqaykupuni. Ñapis khuskanpiña kasharqa, imaraykuchus runakunaqa tukuy sonqo ruwasharqanku.

⁷ Chantá Jerusalenpa perqanta watejmanta oqharishasqaykuta, q'asantataj wisq'ashasqaykuta ima yachaspa, Sambalat, Tobías, Arabia llajtayojkuna, Amonmanta kajkuna, Asdodmanta kajkunapiwan mayta phiñakorqanku.

⁸ Tukuyninkutaj yachachinakorqanku Jerusalenman yaykuykuspa, contranpi maqanakunankupaj, perqa ruwasqaykutataj thuñiranankupaj.

⁹ Chaypacha Diosmanta mañakorqayku, tuta p'unchaytaj qhawajkunata churarqayku awqaykumanta jark'akunawaykupaj.

¹⁰ Jinapi Judamanta kajkuna thutuyta qallarerqanku: Laqayaqa ancha ashkha, wijch'ojkunataj sayk'urpankuña. Jina kajtenqa, perqa oqhariyta mana jayk'aj tukusunmanchu, nispa.

¹¹ Chay awqaykukunapis nillarqankutaj: Paykunaj mana yachasqallan, mana reparasqallan yaykuspa, noqanchej paykunata wañuchisunchej, jinamanta perqashasqankuta jark'asunchej, nispa.

¹² Awqaykukunawan khuska tiyakoj judiokunapis kutin kutinta willaj jamuwarqayku, chay llajtayoj runakuna tukuy ladomanta contraykupi jamushasqankuta.

¹³ Chayrayku kamacherqani sapa ayllumanta runakunata perqa wasaman pakaykukunankuta t'oqokunapi, q'asakunapipis, sapa uj espadayoj, lanzayoj, flechata kacharinapaj arcoyoj ima.

¹⁴ Jinapis mancharikusqankuta reparaspa, kurajkunata, kamachejkunata, tukuy runata ima tantaykorqani. Chantá paykunata nerqani: Ama chay awqanchejkunata manchachikuychejchu. Yuyarikuychej Tukuyta Kamachej Diosninchejqa may jatun, manchachikunataj kasqanta. Maqanakuychej ari llajta masiykichejrayku, wawaykichejrayku, ususiykichejrayku, warmiykichejrayku, wasiykichejrayku ima, nispa.

¹⁵ Chantá awqaykukunaqa yachakorqanku noqayku paykunata suyaykushasqaykuta, Diostaj imatachus ruwayta munawasqaykuta pantachisqanta. Noqaykutajrí tukuyniyku perqa ruwayman watej kutillarqaykutaj sapa uj ruwananman.

¹⁶ Chay p'unchaymantapacha noqaykumanta khuskanniyku perqasharqayku. Khuskanniykutaj qhawasharqayku lanzayoj, jark'akuna escudokunayoj, flechanapaj arcokunayoj, pecherakunayoj ima. Chantá Judá jatun ayllumanta kurajkunapis perqachajkunata yanapallarqankutaj.

¹⁷ Perqata ruwajkuna, q'epejkunapis ujnin makiwan ruwarqanku, ujninwantaj armata jap'erqanku.

¹⁸ Tukuyninku chumpinkupi sat'isqa espadayoj perqasharqanku. Cornetata tocaj runataj ladollaypi kasharqa.

¹⁹ Chantá noqaqa kurajkunaman, soldadokunata kamachejkunaman, jinataj tukuy runamanpis nerqani: Ruwananchejqa may chhika, noqanchejtaj perqa ruwanapi ancha karu karupi kashanchej.

²⁰ Chayrayku maypichari cornetata waqajta uyarinkichej, chayman yanapanawaykupaj tantakamunkichej, Diosninchejtaj noqanchejrayku maqanakonqa, nispa.

²¹ Noqayku perqashanaykukama, khuskanqa inti llojsimuymantapacha inti yaykuykama armanku jap'irisqallapuni qhawasharqanku.

²² Chantá Jerusalenmanta jawapi tiyakojkunata nillarqanitaj: Sapa ujniykichejqa kamachiykichejwan khuska Jerusalén llajta ukhupi qhepakunkichej. Ajinamanta ch'isin qhawankichej, p'unchaypitaj perqayta yanapankichej, nispa.

²³ Jinaqa ni noqa, nitaj aylluypis, nillataj kamachiykunapis, nitaj noqawan karqanku, chay soldadokunapis p'achaykutaqa lluch'ukorqaykuchu. Sapa ujninkutaj lanzanku jap'irisqallapuni kasharqanku.