Nehemías 3 - DIOSPA QHELQACHISQ

Ruwanata rak'inakunku

¹ Chaypacha kuraj kaj sacerdote Eliasibwan, sacerdote masinkunawan ima Oveja Punku nisqata watej ruwarqanku. Kurkunkunata churaykapuytawan, punkukunatapis churaykapullarqankutaj. Chantá perqata oqharerqanku Pachaj nisqa torremantapacha Jananel nisqa torrekama, chaytataj Diosman jaywaporqanku.

² Perqamanta qhepa kaj t'aqata Jericomanta kajkuna oqharillarqankutaj. Chaymantataj Imrij churin Zacur perqamanta qhepan kaj t'aqata oqharichillarqataj.

³ Senáj churinkunaqa Challwa Punku nisqata oqharerqanku. Kurkunkunata churaykuytawankama, punkunta churaykorqanku llaventinta, fierromanta trancanayojta.

⁴ Perqaj qhepan kaj t'aqantataj Cospa allchhin Meremot, pichus Uriaspa churin karqa, pay oqharerqa. Chaymantaj waj perqatataj Mesezabelpa allchhin Berequías, pichus Mesulanpa churin karqa, pay oqharerqa. Qhepan kajtataj Banáj churin Sadoc oqharichillarqataj.

⁵ Chaymanta rej perqatataj Tecoamanta kajkuna oqharicherqanku, kurajninkukunarí mana yanapayta munarqankuchu.

⁶ Paseajpa churin Joyadá, Besodiaspa churin Mesulán ima Jesana Punku nisqata ruwarqanku. Kurkunkunata churaykuytawankama, punkunkunata churaykorqanku llavekunantinta, fierromanta trancananta ima.

⁷ Chaymanta rej perqataqa oqharicherqanku Gabaonmanta Melatías, Meronotmanta Yadón, chantá Gabaonmanta, Mispamanta ima kajkuna. Paykunaj kamachejninku Éufrates mayu chimpamanta kamachej karqa.

⁸ Chaymanta rej perqataqa Jaraiaspa churin Uziel oqharicherqa. Payqa qorimanta k'achanchanata ruwaj runa karqa. Chaymanta rej perqatataj Jananías oqharicherqa. Payqa sumaj q'apashaj jawinata ruwaj karqa. Iskayninku Jerusalenpa perqanta oqharicherqanku ancho nisqa perqakama.

⁹ Chaymanta rej perqata Jurpa churin Refaías oqharichillarqataj. Payqa Jerusalén khuskan llajtamanta kamachej karqa.

¹⁰ Chaymanta rej perqata Jarumafpa churin Jedaías oqharicherqa. Wasin chimpallapi chay ruwananqa karqa. Chaymanta rej perqatataj Jasabniaspa churin Jatús oqharicherqa.

¹¹ Chaymanta rej perqataqa Jarinpa churin Malquiaswan, chantá Pajat Moabpa churin Jasubwan oqharicherqanku. Hornos Torre nisqatapis paykunallataj oqharicherqanku.

¹² Chaymanta rej perqatataj Halojespa churin Salún, chantá wawankuna ima oqharicherqanku. Payqa Jerusalén khuskan llajtata kamachej karqa.

¹³ Janunwan, chantá Zanoajpi tiyakojkunawan Valle Punku nisqata watej ruwarqanku. Punkukunata churaykaporqanku, llaventinta, fierromanta trancanantinta ima. Oqharicherqankutaj 450 metro perqata Q'opa Wijch'una punku nisqakama.

¹⁴ Recabpa churin Malquiasqa Q'opa Wijch'una punku nisqata ruwarqa. Punkukunata churaykaporqa llaventinta, fierromanta trancanantinta ima. Payqa Bet Haqueren jap'iypi kamachej karqa.

¹⁵ Coljozéj churin Salunqa Mispá chaynejmanta kamachej karqa, paytaj Pujyu Punku nisqata oqharicherqa. Payqa patanta qhataykucherqa, punkunkunata churaykaporqa llaventinta, fierromanta trancanantinta ima. Perqata oqharichillarqataj Kuraj Kamachejpa Huertan nisqa qayllapi, Siloé qocha chaynejpi, Davidpa llajtanman urayk'una patillakuna, chaynejkama.

¹⁶ Azbucpa churin Nehemías chaymanta rej perqata oqharicherqa, Davidpa ayan p'ampasqa kashan, chay chimpakama. Chaymantataj perqata oqharicherqa yaku churanakama, jinataj Wapu Soldadokunaj wasin nisqakama. Nehemiasqa Betsur llajtaj khuskanninmanta kamachej karqa.

¹⁷ Chaymanta rej perqataqa levitakuna oqharicherqanku: Banijpa churin Rejún, chaymantataj Jasabías perqata oqharicherqa. Payqa Keila cheqapi kamacherqa, llajtanpa sutinpitaj perqata oqharicherqa.

¹⁸ Chaymanta rej perqatataj Henadadpa churin Bavaywan oqharicherqa. Payqa Keila cheqapi khuskan llajtamanta kamachej karqa.

¹⁹ Josuéj churin Ezerqa perqata chay esquinapi arma jallch'ana wasiman wicharina chimpanpi oqharicherqa. Payqa Mispá llajtapi kamachej karqa.

²⁰ Chaymanta rej perqatataj Zabaypa churin Baruc tukuy sonqo oqharicherqa, esquinanmantapacha kuraj kaj sacerdote Eliasibpa wasi punkunkama.

²¹ Chaymanta rej perqataqa Uriaspa churin Meremot oqharicherqa. Payqa Cospa allchhin karqa. Pay perqata oqharichillarqataj Eliasibpa wasi punkunmantapacha wasin tukukuyninkama.

²² Chaymanta rej perqata Jordán vallepi tiyakoj sacerdotekuna oqharicherqanku.

²³ Chaymanta rej perqataqa Benjaminwan, Jasubwan, wasinku chimpapi karqa, chayta oqharichillarqankutaj. Chaymanta rej perqatataj Maseiaspa churin Azarías oqharicherqa. Payqa Jananiaspa allchhin karqa, wasintaj chaynejpi karqa.

²⁴ Chaymanta rej perqataqa Henadadpa churin Binúi Azariaspa wasinmantapacha kikin esquinakama oqharicherqa.

²⁵ Chaymanta rej perqatataj Uzaypa churin Palal esquinaj chimpanta oqharicherqa. Chantá kuraj kamachejpa kamachinan wasipi aswan jatun kaj torretawan oqharicherqa. Chayqa soldadokunaj pationkupi kashan. Chaymanta rej perqata Farospa churin Pedaías oqharicherqa.

²⁶ Yaku punku nisqa chay chimpamantapacha inti llojsimuynejman jina, chantá chay aswan jatun kaj torretawan, Ofelpi tiyakojkunaqa Diospa Templonpi ruwanayoj kajkuna oqharicherqanku.

²⁷ Tecoamanta kajkunataj chaymanta rej perqata oqharerqanku, chay jatun torrej chimpanmantapacha Ofelpa perqankama.

²⁸ Sacerdotekunapis sapa uj wasinkoj chimpanpi kajta, Caballokuna punku nisqa chaynejmantapacha perqata oqharicherqanku.

²⁹ Chaymanta rej perqata Imerpa churin Sadoc oqharichillarqataj, wasin chimpapi kasharqa, chayta. Chaymanta rej perqataqa Secaniaspa churin Semaías oqharicherqa. Payqa Inti Llojsimuy punku nisqata qhawaj karqa.

³⁰ Chaymanta rej perqatataj Selemiaspa churin Jananías, Janunwan khuska oqharicherqanku. Janunqa Salafpa sojta kaj churin karqa. Chaymanta rej perqata Berequiaspa churin Mesulán wasin chimpapi kaj perqata oqharicherqa.

³¹ Chaymanta rej perqataqa Malquías oqharicherqa. Payqa qolqemanta k'achanchanakunata ruwayta yacharqa. Oqharichisqa perqaqa Templopi Diospaj ruwanayoj kajkunaj wasinkumantapacha qhatojkunaj wasinkukama, Qhawana punku nisqa chimpapi, chay altopata esquina wasikama karqa.

³² Qorimanta k'achanchanakunata ruwajkunawan, qhatojkunawan ima chaymanta rej perqata oqharichillarqankutaj, esquinapi soldadokunaj qhawananku, chaymantapacha Ovejakunaj punkun nisqakama.