Nehemías 2 - DIOSPA QHELQACHISQ

Artajerjes Nehemiasta Jerusalenman kachan

¹ Kuraj kamachej Artajerjes iskay chunka watataña kamachishajtin, Nisán nisqa killapi noqaqa payman vinota jaywasharqani. Chaykama payqa ni jayk'aj llakisqata rikuwasqachu.

² Chaypacharí llakisqata rikuwaspa, tapuriwarqa: Imamantataj llakisqa kashankiri? Imataj qhatirisunkiri? Mana onqosqapischu kashanki, ima llakiyniykichari tiyan? nispa. Jinata niwajtin, sinch'ita mancharikorqani.

³ Chaywanpis kuraj kamachejta nerqani: Kuraj kamachejníy, wiñaypaj kawsakuy. Imaraykutaj mana llakikusajchuri? Maypichus tatay mamay p'ampasqa kashanku, chay llajtaqa thuñisqa kashan, muyuyninpi perqanpa punkunkunataj rupharasqa kashanku, nispa.

⁴ Chantá kuraj kamachejqa tapuwarqa: Imatataj qanpaj ruwapunayta munanki? nispa. Chaypacha janaj pachapi kaj Diosmanta mañarikuytawan,

⁵ kuraj kamachejta nerqani: Sichus qan munawaj, khuyakuwankimantaj chayqa, tukuy sonqo mañayki Judaman kachanawaykita, ñawpa tataykuna p'ampasqa kashanku, chay llajtata watejmanta jatarichimunaypaj, nispa.

⁶ Kuraj kamachejpa warmin ladonpi kashajtin, kamachejqa tapuwarqa: Rispa, mayk'ajkamataj chaypi qhepakuwajri? Mayk'ajtaj kutimpuwaj? nispa. Noqa willarqani mayk'ajchus kutimpunayta, paytaj rejta saqellawarqa.

⁷ Jinallataj nerqani: Sichus allin rijch'asunkiman chayqa, uj cartata qowankiman Éufrates mayoj inti llojsimuynin ladopi kamachejkunapaj. Ajinata paykuna pasajta saqewanqanku, jinataj Judakama walejllata chayasaj.

⁸ Waj cartatapis qollawankimantaj kuraj kamachejpa sach'ankunata qhawaj Asafpaj, kurkukunata qonawanpaj. Chaywan Diospa Templonpa punkunkunata churasaj, jinallataj llajtaj perqanpa punkunkunata, chantá maypichus tiyakusaj, chay wasipajpis, nispa. Kuraj kamachejtaj tukuy mañasqayta qowarqa, Dios khuyarikuwaspa yanapawasqanrayku.

⁹ Chantá Persiamanta puririspa, chayarqani Éufrates mayu chimpaman, chaypitaj kamachejkunaman cartakunata jaywarqani. Kuraj kamachejpis caballopi soldadokunata noqawan kachallasqataj jark'anawankupaj.

¹⁰ Chaywanpis Horonmanta Sambalat, kamachej amonita Tobiaswan chayta yachaspa, sinch'ita phiñakorqanku, israelitakunata yanapaj jamusqaykurayku.

Nehemías Jerusalenman chayan

¹¹ Jerusalén llajtaman chayaspa, kinsa p'unchayta karqani.

¹² Chaymantaqa wakinkunawan tuta jatarikorqani, manataj pimanpis willarqanichu, imatachus Dios sonqoyman niwasqanta Jerusalenpi ruwanaypaj. Manataj waj caballokunataqa aparqanichu, purisharqani, chayllata aparqani.

¹³ Chay ch'isi llojserqani, Valleman Llojsina punku nisqa chayninta, chantá Sierpej Pujyun nisqa chayninta, Q'opa Jich'ana nisqa chay punkunejllatataj ima. Qhawarqanitaj Jerusalenpa urmasqa perqankunata, ruphasqa punkunkunatawan.

¹⁴ Chaymantataj rillarqanipuni Yaku Pujyu sutiyoj punkunejta, chantá Kuraj Kamachejpa Yaku Qochan chaynejtapis, jinapis caballoyqa mana chayninta pasayta aterqachu.

¹⁵ Tutallaraj kashajtin, chay wayq'onta pataman wicharerqani. Chay perqata qhawaspataj, kutiporqani, Valleman Llojsina nisqa punkunta yaykupuspa.

¹⁶ Chay llajtapi kamachejkunaqa mana yacharqankuchu maymanchus risqayta, nitaj imata ruwaspachus purishasqaytapis. Manallataj judiokunaman willarqanichu, nitaj sacerdotekunaman, kamachejkunaman, nillataj perqa oqharejkunamanpis.

¹⁷ Chantá paykunata nerqani: Qankuna yachankichej sinch'i llakiypi kashasqanchejta. Jerusalén llajtanchejpa perqanqa urmasqa, punkunkunapis ruphasqa kashanku. Jerusalenpa perqanta watejmanta jatarichinachej amaña asipayanawanchejpaj, nispa.

¹⁸ Chantá willarqani Dios imaynatachus khuyakuyninwan yanapawasqanta, jinataj imatachus kuraj kamachej parlawasqantapis. Paykunataj niwarqanku: Perqayta qallarinachej, nispa. Paykunataj sumajta kallpachanakuspa, perqayta qallarerqanku.

¹⁹ Jinapi Horonmanta Sambalat, kamachej amonita Tobiaswan, chantá Arabia llajtayoj Guesenpis chayta yachaspa, noqaykumanta asiykukuwarqayku, pisipaj qhawaspataj, niwarqayku: Imatataj pakaymanta ruwanayashankichejri? Kuraj kamachejpa contranpichu oqharikuyta munashankichej? nispa.

²⁰ Noqatajrí nerqani: Janaj pachapi kaj Diosqa ruwayta yanapawasqayku, noqayku kamachinkunataj watejmanta perqata jatarichisqayku. Qankunatajrí Jerusalenwan ni ima ruwanaykichejchu tiyan, nispa.