Nehemías 13 - DIOSPA QHELQACHISQ

Nehemías israelitakunata allin ñanman churan

¹ Chaypacha levitakunaqa Moisespa qhelqanta tukuypa uyarinanta ñawirerqanku. Chaypitaj qhelqasqa kasqa amonitakuna, jinataj moabitakunapis Diospa ayllunwan mana jayk'ajpis chajrukunankuta.

² Chay ajina karqa imaraykuchus israelitakuna Egiptomanta ayqeshajtinku, paykuna israelitakunaman mana mikhunata, nitaj ujyanata jaywasqankuchu. Manachayqa Balaamman pagasqanku israelitakunata maldicinanpaj. Chaywanpis Diosniykoqa Balaampa maldicisqanta saminchayman tukuchisqa.

³ Ajinaqa, Diospa kamachisqanta uyarispa, israelitakunaqa chay waj llajtayojkunata qharqorqanku.

⁴ Chaymanta aswan ñawpajta sacerdote Eliasib churasqa kasqa Diosniykoj Templonpi jallch'ana cuartota qhawananpaj. Eliasibrí Tobiaswan aylluchakusqanrayku,

⁵ payman uj jatun wasita qosqa, maypichus ñawpajtaqa jallch'aj kanku Diosman jaywasqata, inciensota, imawanchus Diosta yupaychaj kanku, chay imakunata, sapa chunkamanta ujta t'aqaj kanku, chaytapis granomanta, vinomanta, aceitemantawan. Chay tukoyqa karqa levitakunapaj, takejkunapaj, punku qhawajkunapaj, sacerdotekunapaj ima.

⁶ Chay ajina kashajtenqa, noqa mana Jerusalenpichu karqani, manachayqa Babiloniapi kuraj kamachej Artajerjes kinsa chunka iskayniyoj watataña kamachishajtin, paypaman kutirerqani. Jinapis mana unayninmantachu noqaqa kuraj kamachejmanta mañarqani Jerusalenman kutirejta saqenawanta.

⁷ Jerusalenman chayaspataj, yacharqani Eliasib mana allinta ruwasqanta, Tobiasman llunk'ukuspa Diospa Temploj pationpi uj jatun cuartota qospa.

⁸ Chay ruwasqanmanta sinch'ita phiñakuspa, Tobiaspa chay tukuy imanta jawaman wijch'umorqani.

⁹ Chantá kamacherqani wasita llimphuchanankuta, watejmantataj churampunankuta, Diospa Templonpi yupaychanapaj imachus kajta, jaywanakunata, jinataj inciensokunatapis.

¹⁰ Yachallarqanitaj imatachus levitakunaman qonanku karqa kawsanankupaj, chayta mana qosqankuta. Chayrayku Diosta yupaychanankupaj churasqa kajkuna levitakunawan, takejkunawan sapa uj jallp'ankuman ripusqanku.

¹¹ Chantá kuraj kamachejkunata k'amerqani: Imaraykutaj chay jinata Diospa Templonta saqerparerqankichejri? nispa. Chaymantataj levitakunata, sacerdotekunata ima wajyachiytawan, ruwanankuman kutiykuchiporqani.

¹² Chantá Judamanta kajkunaqa tukuyninku chay jallch'ana wasiman apamorqanku sapa chunkamanta ujnin t'aqasqata granomanta, vinomanta, aceitemantawan ima.

¹³ Jinataj jallch'ana wasikunata qhawanankupaj churarqani sacerdote Selemiasta, qhelqeri Sadocta, uj levita Pedaiasta ima. Paykunata yanapananpajtaj Jananta churarqani. Pay karqa Zacurpa churin, Mataniaspa allchhintaj. Paykuna allin sonqoyoj atinikunapaj jina kasqankurayku, paykunata churarqani masinkuman mikhuykunata rak'iranankupaj.

¹⁴ Chantá Diosman parlaspa nerqani: Diosníy, yuyarikuway ari kayta ruwasqaymanta, amataj qonqapuychu Temploykipaj jinataj yupaychanapajpis imatachus ruwasqaymanta.

¹⁵ Chantá rikullarqanitaj Judapi wakinkunaqa samarina p'unchaypi vinota ruwanankupaj uvata sarushajta, trigo marq'atapis astashasqajta ima. Rikullarqanitaj vinota, uvata, higota, tukuy q'epita burrokunaman chajnaspa samarina p'unchaypi Jerusalenman apashajta. Chaypacha paykunata k'amerqani samarina p'unchaypi ranqhasqankumanta.

¹⁶ Chay jawataj Jerusalenpi tiyakoj Tiro llajtayojkunaqa challwakunata, waj qhatutawan apamoj kanku samarina p'unchaypi Jerusalenpi judiokunaman ranqhanankupaj.

¹⁷ Chantá Judamanta kurajkunata k'amerqani: Imaraykutaj kay sajrata ruwaspa samarina p'unchayta manakajman tukuchishankichejri?

¹⁸ Ajinallatataj ñawpa tataykichejkuna ruwarqanku. Chayraykutaj Diosninchejqa chay chhika llakiykunata noqanchejman jinataj kay llajtamanpis kachaykamuwarqanchej. Astawanrajchu Diostaqa phiñachiyta munashankichej samarina p'unchayta millay kajman tukuchisqaykichejwanqa? nispa.

¹⁹ Chantá punkuta qhawajkunata kamacherqani samarina p'unchay qallarikunanpaj ch'isiyaykushajtin, Jerusalén llajtaj punkunkunata wisq'aykunankuta samarina p'unchay pasanankama. Chay jawataj kamachiykunata punkuta qhawanankupaj churarqani.

²⁰ Chay ranqhajkunaqa, jinataj qhatojkunapis iskay kutita Jerusalén llajtamanta jawapi puñorqanku.

²¹ Noqatajrí paykunata k'amerqani: Imaraykutaj qankuna kay perqa wasapi puñurashankichejri? Ujtawanchus jinata ruwankichej chayqa, qankunata presochasqaykichej, nispa. Chaymantapacha manaña ujtawan samarina p'unchaypi jamorqankuchu.

²² Chaymantataj levitakunata kamacherqani Diospa ñawpaqenpi llimphuchakuspa punkukunata qhawaj rinankuta, jinamanta samarina p'unchayta ama manakajman tukuchinankupaj. Chantá Diosman parlaspa, nerqani: Diosníy, kay tukuy ima ruwasqaymanta yuyarikuway, khuyarikuwaytaj k'acha munakuyniykiman jina, nispa.

²³ Ajinallatataj chaypacha uyarerqani wakin judiokuna waj llajtayoj warmikunawan casarasqankuta. Chay warmikuna kasqanku Asdodmanta, Amonmanta, Moabmanta ima.

²⁴ Wawankunamanta wakintaj Asdod rimayta parlarqanku, chayrí waj suyukunaj rimayninkuta, manataj noqayku judiokunaj rimayniykutaqa parlarqankuchu.

²⁵ Jinapi paykunata k'amerqani, maldicerqanitaj. Paykunamanta wakintaqa maqarqani, chujchankutataj t'irarqani. Kamacherqanitaj Diosrayku tilunankuta: Manaña ujtawan ususiykukunata, nitaj churiykukunatapis waj llajtayojkunawan casarachisqaykuchu. Noqaykupis manallataj paykunamanta warmikunawan casarasqaykuchu, nispa.

²⁶ Paykunata nillarqanitaj: Manachu Israelpa ñawpa kuraj kamachejnin Salomonpis ajinata ruwaspa juchallisqa? Tukuy suyupi pay jina kuraj kamachejqa mana kasqachu. Diosqa payta munakuspa, israelitakunata kamachinanpaj churasqa. Chaywanpis chay waj llajtayoj kaj warmikuna payta juchallichisqanku.

²⁷ Chayrayku noqayku mana pitapis saqesqaykuchu chay waj llajtayoj warmikunawan casaraspa Diosninchejpa contranpi millayta juchallejtaqa, nispa.

²⁸ Kuraj kaj sacerdote Eliasibpa churin Joyadáj ujnin kaj wawanqa horonita Sambalatpa tolqan karqa. Chayrayku paytapis ñawpaqeymanta wijch'orqani.

²⁹ Chantá Diosman parlaspa nerqani: Diosníy, paykunata jasut'iy ari sacerdote kayta millaypaj qhawachisqankurayku, jinallataj sacerdotekunawan levitakunawan trato ruwasqaykitapis millaypaj qhawachisqankurayku, nispa.

³⁰ Ajinata chay tukuy waj llajtayojkunata qharqorqani sacerdotekunamanta, levitakunamantapis. Chantá sacerdotekunata, levitakunata ima sapa ujninkuta ruwanankuman churaykaporqani.

³¹ Kamachillarqanitaj ima p'unchaykunapichus ruwanankupaj churasqa karqa, chay p'unchaypi llant'ata churanankuta, jinataj chay ñawpaj kaj poqoykunatapis jaywanankuta. Chantá Diosman parlaspa nerqani: Diosníy, ama qonqapuwaspa allinniypaj yanapariway ari.