Nehemías 11 - DIOSPA QHELQACHISQ

Jerusalenpi tiyakojkuna

¹ Chaypacha kamachejkunaqa Jerusalén llajtapi tiyakorqanku. Chay waj runakunataj suerteta choqarqanku, sapa chunka ayllukunamanta ujnin kaj ayllu Diospaj t'aqasqa Jerusalén llajtapi tiyakapunankupaj. Chay jisq'on puchoj ayllukunarí waj llajtitakunapi tiyakapunanku karqa.

² Wakinkunaqa munasqankurayku Jerusalén llajtapi tiyakorqanku, chay wajkunataj paykunarayku mañaporqanku Dios paykunata saminchananpaj.

³ Kutimpoj israelitakunamanta, sacerdotekunamanta, levitakunamanta, Temploj kamachinpi ruwanayoj kajkunamanta, jinataj Salomonpa kamachinkunaj miraynin kajkunamanta ima aswan ashkha Judapi llajtankupi, jallp'ankupi ima tiyakaporqanku. Kamachejkunamantarí ashkha Jerusalén llajtapi tiyakaporqanku.

⁴ Judá jatun ayllumanta, jinataj Benjamín jatun ayllumanta wakenqa Jerusalenpi tiyakaporqanku. Judá jatun ayllumanta karqanku: Uziaspa churin Ataías, ñawpa tatankunataj karqanku Zacarías, Amarías, Sefatías, Malalelpiwan, pichus Farespa ayllunmanta karqa, chay.

⁵ Barucpa churin Maseías, ñawpa tatankunataj karqanku Coljozé, Jazaías, Adaías, Joyarib, Zacarías, Silonipiwan.

⁶ Farespa ayllunmanta Jerusalén llajtapi tiyakapojkunaqa karqanku 468, paykunataj wapu qharikuna karqanku.

⁷ Benjamín jatun ayllumanta karqanku: Mesulanpa churin Salú, paypa ñawpa tatankunataj karqanku Joed, Pedaías, Colaías, Maseías, Itiel, Jesaiaspiwan.

⁸ Jinallataj Salujpa wawqen Gabay, Salaypiwan ima tukuyninpi 928 karqanku.

⁹ Zicrijpa churin Joeltaj kamachejninku karqa. Senuáj churin Judataj chay llajtapi qhepan kaj kamachej karqa.

¹⁰ Sacerdotekunamanta karqanku: Joyaribpa churin Jedaías, Jaquín,

¹¹ Hilciaspa churin Seraiaspiwan. Paypa ñawpa tatankuna karqanku Mesulán, Sadoc, Merayot, Ajitobpiwan. Ajitobqa Diospa Templonpi imachus kasqanmanta kuraj qhawaj karqa.

¹² Paywan khuska Temploj kamachinpi ruwanayoj kajkuna 822 karqanku. Jeroanpa churin Adaiaspa ñawpa tatankunataj karqanku Pelalías, Amsi, Zacarías, Pasjur, Malquiaspiwan.

¹³ Paykunaj ayllunkumanta kaj kamachejkunapiwan 242 karqanku. Azareelpa churin Amasaypa ñawpa tatankuna karqanku Ahzai, Mesilemot, Imerpiwan.

¹⁴ Chaypa ayllonqa 128 wapu runakuna karqanku, kamachejninkutaj Guedolinpa churin Zabdiel karqa.

¹⁵ Levitakunamanta kaykuna karqanku: Jasubpa churin Semaías, paypa ñawpa tatankunataj karqanku, Azricán, Jasabías, Binuypiwan.

¹⁶ Sabetaywan, Yozabadwanqa levitakunajpa kamachejninku karqanku, paykunataj churasqa karqanku Diospa Templonpa jawannejpi ruwajkunata qhawanankupaj.

¹⁷ Micaíaj churin Mataniaspa ñawpa tatankuna karqanku Zabdi, Asafpiwan. Payqa takejkunaj kamachejninku karqa. Diosta yupaychaspa, jinataj pachis nispa takej kanku Diosmanta mañakuna ratopi. Bacbuquiasqa kuraj kaj wawqenpa sullk'an karqa. Samúaj churin Abda, paypa ñawpa tatankuna karqanku Galal, Jedutunpiwan.

¹⁸ Diospaj t'aqasqa Jerusalén llajtapi levitakunaqa tukuyninkupi 284 karqanku.

¹⁹ Punkuta qhawajkuna Acubwan, Talmonwan, chantá ayllunkuwan ima Temploj punkunkunata qhawarqanku, paykunataj 172 karqanku.

²⁰ Sacerdotekunamanta, levitakunamanta puchoj israelitakunataj Judapi kaj llajtakunapi, sapa ujpis jallp'ankupi tiyakaporqanku.

²¹ Chaywanpis Diospa Temploj kamachinpi kajkunaqa Ofel nisqa cheqapi tiyakaporqanku, kamachejninkukunataj karqanku Sijá, Gispa ima.

²² Jerusalenpi levitakunajpa kamachejninkoqa Banij churin Uzi karqa. Paypa ñawpa tatankunaqa karqanku Jasabías, Matanías, Micaía, Asafpiwan. Paykunataj Diosta Templopi yupaychashaspa takichej kanku.

²³ Chaytaqa kamachej kamachisqa, takejkunaqa sapa p'unchay mit'ankuman jina Diospa Templonpi takichinankupaj.

²⁴ Judá jatun ayllumanta Seraj mirayninmanta Mesezabelpa churin Petajiasqa kamachejnejta churasqa karqa llajtayojkunamanta qhawananpaj.

Waj cheqapi tiyakojkuna

²⁵ Judá jatun ayllumanta wakinkuna kay cheqakunapi tiyakorqanku: Quiriat Arbapi, Dibonpi, Yecabselpi,

²⁶ Josuepi, Moladapi, Bet Peletpi,

²⁷ Jasar Sualpi, Bersebapi,

²⁸ Siclagpi, Meconapi,

²⁹ Enrimonpi, Sorapi, Jarmutpi,

³⁰ Zanoajpi, Adulanpi, Laquispi, Azecapi ima, tukuy ranchonkunapi, chantá campo jallp'ankunapi ima. Tiyakaporqanku Bersebamantapacha Jinón vallekama.

³¹ Benjamín jatun ayllumanta kajkunataj tiyakorqanku Gebapi, Micmaspi, Aiapi, Betelpi, chantá chay ranchonkunapi ima.

³² Tiyakullarqankutaj Anatot llajtapi, Nobpi, Ananiaspi,

³³ Jazorpi, Ramapi, Guitayinpi,

³⁴ Jadidpi, Seboguinpi, Nebalatpi,

³⁵ Lodpi, Onopi, Imatapis Ruwayta Yachajkunaj vallen nisqapipis.

³⁶ Chay jawataj levitakunaqa Judá suyupi, Benjamín suyupiwan tiyakorqanku.