Nehemías 10 - DIOSPA QHELQACHISQ

¹ Chay tratota ruwasqankuman qhelqajkunaqa kaykuna karqanku: Jacaliaspa churin kamachej Nehemías, Sedequías ima.

² Sacerdotekunataj karqanku: Seraías, Azarías, Jeremías,

³ Pasjur, Amarías, Malquías,

⁴ Jatús, Sebanías, Maluc,

⁵ Jarín, Meremot, Abdías,

⁶ Daniel, Ginetón, Baruc,

⁷ Mesulán, Abías, Mijamín,

⁸ Magasías, Bilgay, Semaías ima.

⁹ Levitakunataj karqanku: Azaniaspa churin Josué, Henadadpa ayllunmanta Binúi, Cadmiel,

¹⁰ jinataj masinkuna Sebanías, Hodías, Kelita, Pelaías, Janán,

¹¹ Micaía, Rejob, Jasabías,

¹² Zacur, Serebías, Sebanías,

¹³ Hodías, Bani, Beninu ima.

¹⁴ Kamachejkunataj karqanku: Paros, Pajat Moab, Elam, Zatu, Bani,

¹⁵ Binuy, Azgad, Bebay,

¹⁶ Adonías, Bigvay, Adín,

¹⁷ Ater, Ezequías, Asur,

¹⁸ Hodías, Jasún, Besay,

¹⁹ Jarif, Anatot, Nebay,

²⁰ Magpías, Mesulán, Hezir,

²¹ Mesezabel, Sadoc, Jadúa,

²² Pelatías, Janán, Anaías,

²³ Oseas, Jananías, Jasub,

²⁴ Halojés, Piljá, Sobec,

²⁵ Rejún, Jasabná, Maseías,

²⁶ Ajías, Janán, Anán,

²⁷ Maluc, Jarín, Baná ima.

²⁸ Chantá tukuy runakuna tantaykukorqanku Dioswan tratota ruwanankupaj: Sacerdotekuna, levitakuna, punkuta qhawajkuna, takejkuna, Templopi kamachikuna ima. Tantakullarqankutaj pikunachus Diospa kamachisqanta junt'anankurayku waj llajtayojkunamanta t'aqakusqanku, chaykuna, warminkunawan khuska, wawankukunawan, ususinkukunawan, pikunachus yuyayniyojña karqanku, chaykunawan.

²⁹ Paykunataj ayllunkuwan jinataj kurajninkuwan tantaykukuspa, tilorqanku Diospa kamachisqanman jina kawsanankupaj. Nillarqankutaj Tata Diosninkoj kamachisqanta, nisqanta, yachachisqanta ima mana pantaspa junt'anankuta, Moisespa yachachisqanman jina.

³⁰ Kay jinata nerqanku: Mana ususiykuta casarachisqaykuchu mana Diospa ayllunmanta kaj qharikunawan, nillataj churiykutapis saqesqaykuchu chaykunaj ususinkunawan casarakojta.

³¹ Jinallataj sichus mana Diospa ayllunmanta kajkuna granota, chayrí waj poqochisqankuta samarina p'unchaypi, chayrí mayqen jatunpaj qhawasqa p'unchaypipis apamuwaykuman chayqa, mana imatapis rantisqaykuchu. Chantá qanchis kaj watapeqa jallp'ata samarichisqayku. Jinallataj imatachus israelita masiykuman manorqayku, chaytaqa mana mañakapusqaykuchu.

³² Jinallatataj niyku: Kamachisqa kasqanman jina, tukuyniyku sapa wata tawa gramo qolqe metalta qosqayku Diosniykoj Templonpi kay imakuna ruwakunanpaj:

³³ Diosman t'antata jaywanapaj, sapa p'unchay ch'aki mikhuyta jaywanapaj, sapa p'unchay q'olachispa jaywanapaj, mosoj killapi jaywanapaj, samarina p'unchaypi jaywanapaj, raymikunapi jaywanakunapaj, waj jaywanakunapaj, Israelpa juchanmanta jaywanakunapaj, jinallataj Diosniykoj Templonpi waj imakunatachus ruwanapajpis.

³⁴ Chay jawaqa sacerdotekuna, levitakuna, tukuy runapis, sapa ayllunkunaman jina suerteta choqarqayku Tata Diosniykoj Templonman llant'ata apanaykupaj, sapa watapi mayk'ajpajchus apana karqa, chayman jina. Chay kanqa Tata Diosniykoj altarninpi lawrachinapaj, Moisespa kamachisqanpi qhelqasqaman jina.

³⁵ Jinallataj parlanakuyku sapa wata Tata Diosniykoj Templonman apanaykupaj chajraykumanta ñawpaj kaj poqoyta, jinataj tukuy poqoj sach'aykoj poqosqanmantapis.

³⁶ Jinallataj nerqayku Diospa Templonman apanaykuta kuraj kaj qhari wawaykukunata, wakakunaj, ovejakunaj phiwi uñantapis, sacerdotekunaj ñawpaqenman sayarichinaykupaj kamachisqa kasqanman jina.

³⁷ Jinallataj nerqayku Diosniykoj Templonpi jallch'ana wasiman sacerdotekunapaj apanaykuta chajraykumanta ñawpaj kaj poqoyta, ñawpaj kaj poqoymanta jak'uta, huertaykumanta ñawpaj kaj poqoyta, vinomanta, aceitemanta ima. Chantá levitakunaman apanaykuta nillarqaykutaj, tukuy chajra poqoykunamanta sapa chunkamanta ujta, imaraykuchus paykuna chayta sapa llajtaykupi tantananku karqa.

³⁸ Poqoykunamanta chunkaman t'aqasqamanta ujnin kaj t'aqata levitakuna tantamoj rejtinku, paykunawan khuska Aaronpa ayllunmanta uj sacerdotepis rillanqataj. Chantá levitakunañataj tantasqankumanta sapa chunkamanta ujta apanqanku Diosniykoj Templonpi mikhuna jallch'ana wasiman.

³⁹ Israelitakuna, jinataj levitakunapis apanqanku imatachus Diosman qonankuta granomanta, vinomanta, aceitemanta ima, Templopi jallch'ana wasiman. Chaypi kashan Templopi imachus ruwanata ruwanapaj imakuna. Chayllapitaj kashanku sacerdotekuna, Templopi ruwanayoj kajkuna, punkuta qhawajkuna, jinataj takejkunapis. Ajinata niyku Diosniykoj Templonta mana saqerparinaykuta, nispa.