Nehemías 1 - DIOSPA QHELQACHISQ

Nehemías Jerusalenpi kajkunapaj Diosmanta mañapun

¹ Kaymin Jacaliaspa churin Nehemiaspata ruwasqanmanta willayqa. Kuraj kamachej Artajerjes iskay chunka watataña kamachishajtin, Quisleu nisqa killapi, noqa Nehemías Susa llajtapi karqani.

² Chayllapi wawqey Jananí, wajkunapiwan Judamanta chayamuytawan, watukoj jamuwarqanku. Chaypacha paykunata Jerusalenmanta tapurerqani, jinataj chay judiokunamanta, pikunachus Babiloniaman apasqa kanankumanta llusp'isqanku, chaykunamantawan.

³ Paykunataj niwarqanku: Pikunachus apasqa kanamanta llusp'erqanku, chaykuna chayllapi qhepakorqanku. Chaywanpis may llakisqa, p'enqasqataj kashanku. Jerusalén llajtaj perqanpis thuñisqa, punkunkunataj ninawan ruphasqa kashan, nispa.

⁴ Chayta willawajtinkukama, noqa tiyaykukuspa, mayta waqarikorqani. Uj mashkha p'unchayta ajina sinch'i llakisqa karqani, ayunaspataj, janaj pachapi kaj Diosmanta mañakorqani.

⁵ Nerqanitaj: Tata Dios, janaj pachapi kaj Diosníy, may atiyniyoj Dios kanki, manchachikuna kanki. Qanqa trato ruwasqaykita sumajta junt'anki, jinataj munakusojkunatapis, kamachisqaykita junt'ajkunatapis mana jayk'aj saqerpankichu.

⁶ Kunanqa, mañarikuyki uyarinawaykita tuta p'unchay israelitakunarayku mañakususqayta. Noqayku yachakuyku contraykipi juchallisqaykuta. Aylluykunapis, noqapis juchalliyku.

⁷ Noqaykoqa ancha millaytapuni ñawpaqeykipi kawsayku. Kamachisqaykita, jinallataj Moisesman kamachisqaykitapis manallataj junt'aykuchu.

⁸ Chaywanpis yuyarikuy imaynatachus kamachiyki Moisesnejta k'amirpariwasqaykuta. Qan nerqanki: Sichus noqata wasanchawankichej chayqa, noqa tukuynejman ch'eqerachisqaykichej.

⁹ Chaywanpis sichus noqaman kutirikamuspa, kamachisqayta junt'awajchej, nisqaytataj ruwawajchej chayqa, tukuynejman ch'eqerasqa kawajchej chaypis, chaymantapacha tantakapusqaykichej. Chantá pusakampusqaykichej, maypichus sutiy yupaychasqa kananpaj ajllakorqani, chay cheqaman, nispa.

¹⁰ Noqayku israelitakunaqa qanpa kamachiykikuna, aylluykitaj kayku, pikunatachus qan preciota pagaspa jatun atiyniykiwan, kallpaykiwantaj kacharicherqanki, chaykuna.

¹¹ Chayrayku mañarikuyki ari, Tukuyta Kamachej Diosníy, mañakususqayta uyariway. Qhaparikamususqaykutapis uyariwayku, pikunachus sutiykita mayta jatunchayta munayku. Mañakullaykitaj tukuy imapi allin rinawanta, jinallataj kay Persia suyoj kuraj kamachejninpa khuyakuyninta tariyta atinaypaj, nispa. Ajinata Diosmanta mañakorqani. Chaypacha noqaqa kuraj kamachej Artajerjespa copa jaywajnin karqani.