Nahúm 3 - DIOSPA QHELQACHISQ

¹ Ay qanmanta, runa ch'allpa, yawar jich'aj llajta. Llullakuywan, kallpapi atinikuspa ñak'arichiywan junt'a kanki, suwakuspataj mana sajsakunkichu.

² Kunantajrí seq'onaj siuj siuj nisqanta uyariychej, ruedakunaj sonasqanta, caballokunaj sink'urisqankuta, carretakunaj phawarisqankuta ima.

³ Caballokunapi soldadokuna phawarishanku. Espadakuna k'ancharishanku, lanzankunataj lliphipirishan. Mana yupay atina parti wañusqakuna tiyan, ayakunapis qollu qollulla kashanku. Wañusqakunapis mana yupay atina kanku, purejkunataj ayapi misk'anku.

⁴ Chay tukuy jamun Nínive khuchichakusqanrayku, pichus manchay k'achita, layqachinanpaj may yachayniyojtaj karqa. Chay layqachisqanwan, khuchichakusqanwantaj llajtakunata, suyukunatapis sonqonkuta suwaspa q'otiyarqa.

⁵ Tukuy Atiyniyoj Tata Dios nin: Noqa contraykipi kashani. P'achaykita uyaykikama oqharisaj, waj suyukuna q'ala kayniykita rikunankupaj, waj kamachejkunapis p'enqayniykita rikunankupaj.

⁶ Pataykiman millay ch'ichita jich'aykamusaj Honrayki t'akasqa kananta ruwasaj, tukuy qhawaspa asikusunankupaj jina.

⁷ Tukuy rikusojkuna qanmanta ayqespa, nenqanku: Niniveqa thuñisqaña kashan. Pitaj paymanta khuyarikunmanri? Maypitaj sonqochaykojta tarisunmanri? nispa.

⁸ Qanrí, Tebasmanta aswan sumajchu kanki, mayqenchus Nilo mayu patapi kashan, chay llajtamantaqa? Chay llajtaqa muyuyninpi Nilo mayuwan jark'asqa, yakuwantaj perqasqa jina karqa.

⁹ Chantá Etiopiawan, Egiptowan tukuy kallpankuwan yanaparqanku. Futmanta kajkuna, jinataj Libiamanta kajkunapis payman sayasqa karqanku.

¹⁰ Chaywanpis Tebas llajtapi tiyakojkuna apasqa karqanku, wawankukunataj calle esquinapi ch'allpasqa karqanku. Awqankukunaqa jatunpaj qhawasqa runakunata wata runa jina jap'ikapunankupaj suerteta choqarqanku, kurajninkukunataj cadenawan ch'ipasqa karqanku.

¹¹ Nínive, qantapis machaykuchisonqanku, uma muyusqataj pakakunki, awqaykimanta ayqeyta munaspa.

¹² Tukuy sumaj jark'achasqa perqaykikunaqa higo sach'a jina kanku, mishkha poqosqa higowan junt'asqa jina. Thalajtinku, mikhojpa siminman urmaykun.

¹³ Soldadoykikunaqa warmi jina kanqanku. Llajtaykej punkonqa awqaykikunapaj kicharisqa kanqa, cerrojontataj ruphaykonqanku.

¹⁴ Yakuta tantaspa jallch'ay, awqaykiwan muyuykusqa kashajtiyki ama pisisunanpaj. Jark'akunayki perqata astawan perqachiy. T'uruta saruspa, wakichiy, ladrillo ruwana moldetataj oqharikuy.

¹⁵ Chaywanpis nina ruphaykuspa, tukuchisonqa, espadataj urmachisonqa. Phinki phinki jina mayta miray. Chaywanpis manapuni wañuymanta llusp'inkichu.

¹⁶ Ranqheroykikuna ch'askakunamanta astawan ashkhaman tukorqanku. Jinapis phinki phinkikuna jina llikhankuta ch'uskikuytawan, phawarikapunku.

¹⁷ Jark'akusoj soldadoykikunapis phinki phinki jinallataj kanku. Maqanakuman rinapaj soldadokunata jap'ejkunaqa may chhika sik'imira jina aywirinku. Chiriykamojtenqa, perqakunaman tiyaykunku. Inti llojsimojtintajrí llojsinku, nitaj pipis yachanchu maymanchus risqankuta.

¹⁸ Ay, Asiriamanta kuraj kamachej, michejniykikuna manchayta puñurishanku. Soldadoykikunata kamachejkuna samarishanku, soldadoykikunataj orqokunapi ch'eqerasqa purishanku, ni pipis paykunata tantamoj kanchu.

¹⁹ K'irisqa kasqaykipaj mana jampi kanchu. Chay onqoyniykeqa mana jampiy atina. Llakiypi rikhurisqaykimanta tukuy uyarejkuna kusikuspa t'ajllarakunku. Millay ruwasqaykeqa pitataj mana ñak'aricherqachuri?