Nahúm 2 - DIOSPA QHELQACHISQ

¹ 1 (2) Nínive llajta, chinkachisojqa contraykipi jamushanña. Chayrayku sumaj jark'achasqa perqakuna pataman soldadoykikunata churay. Ñanta allinta qhaway. Mat'ita espadaykitapis wataykukuy, Tukuy soldadoykikunata tantaykuy.

² 2 (3) Israelpa awqankunaqa tukuy kapuyninta qhechurparisqanku, imaynatachus uva sach'ata pipis q'ara k'aspillata saqen, ajinata. Chaywanpis Tata Diosqa Jacobpa jatun kayninta sayarichenqa, imaynachus ñawpajta karqa, ajina kananpaj.

³ 3 (4) Soldadokunaj escudonkoqa puka kanku, p'achankupis pukallataj. Paykunaqa maqanakunankupaj wakichisqaña kashanku. Carretankukunapis ninaman rijch'akunku, caballonkukunataj mana kakuyta atinkuñachu.

⁴ 4 (5) Chay carretankukunaqa callepi phawanku pitapis saroj jina. Imaynatachus nina jachonkuna jap'ichisqa kanku, ajinallatataj plazakunanejta lliuj lliuj jina phawarinku.

⁵ 5 (6) Kuraj kamachejqa soldadokunata kamachejkunata wajyan, paykunataj paykunapura takanakuspa imata jina phawanku maqanakupaj wakichikunankupaj.

⁶ 6 (7) Chantá mayuta jark'ana punkuta kicharejtinku, yakoqa kamachina wasita thuñiykun.

⁷ 7 (8) Qoya jina llajtaqa waj suyuman apasqa kanqa, warmi kamachinkunataj paywan khuska rillanqankutaj. Urpikuna jina ayqospa, waqaspataj, paykuna qhasqonkuta takakonqanku.

⁸ 8 (9) Nínive llajtayojkuna yaku jark'asqa jina karqanku. Kunantajrí jark'ana phatajtin, paykuna imata jina ayqenqanku. Ujkuna ninku: Sayaychej, kutirimuychejtaj, nispa. Ayqekoj runakunatajrí mana uyarejllapis tukunku.

⁹ 9 (10) Suwaychej qolqenkuta, apakapuychej qorinkuta. Nínive llajtaj qhapaj kaynenqa mana tukukuyniyoj.

¹⁰ 10 (11) Nínive llajtaqa phirisqa, thuñisqa, ch'inpachataj. Mancharikuywan chay llajtayojkunaj sonqonku phatashanña, moqonkupis kharkatitishan. Tukuyninkojta kallpankutaj manaña kanchu. Uyankupis t'ojrapachallaña.

¹¹ 11 (12) Leonkunaj jusk'unkupi imañataj qhepakunri? Uña leonkunaj thapankupipis imallañataj qhepakunri? Chaypimin león uñankunantin pakakoj, manataj pipis paykunata mancharichejchu.

¹² 12 (13) Leonqa jap'isqanta uñankunaman, mamankumanpis rak'iraj, jap'isqanwantaj jusk'unman junt'achej.

Nínive llajta phirisqa kanqa

¹³ 13 (14) Tukuy Atiyniyoj Tata Dios ujtawan nillantaj: Nínive, noqa contraykipi kashani. Maqanakupaj wakichisqa carretaykikunata ruphachispa, ushphaman tukuchisaj. Soldadoykikunata wañurachisaj, jallp'aykipipis tukuy suwakuyta tukuchisaj. Manañataj chaskiykikunaj parlasqanpis uyarikonqachu.