Nahúm 1 - DIOSPA QHELQACHISQ

Diosqa Ninivepaj sinch'ita phiñakun

¹ Kayta Tata Diosqa Elcos llajtayoj Nahumman mosqoypi jina rikucherqa Nínive llajtamanta.

² Tata Diosqa celoso, vengakojtaj. Payman sayaykojkunamanta vengakunpuni, awqankunapajtaj sinch'ita phiñakun.

³ Tata Diosqa mana usqhayllatachu phiñakun. Chaywanpis payqa may atiyniyoj, chayraykutaj juchallejkunata jasut'enqapuni. Tata Dios sinch'i para wayrapi purin, phuyupis chakin urapi jallp'a jinalla.

⁴ Payqa k'amispa, mama qochatapis ch'akirparichin. Ch'akichillantaj mayukunapi yakutapis. Basán pampapi, jinallataj Carmelo orqopipis qhorakuna qawipunku, Libanopi t'ikakunapis qawipullankutaj.

⁵ Paypa ñawpaqenpi orqokunapis kharkatitinku, lomakunapis yaku jina unuyarin. Payta rikuspaqa, tukuy jallp'antin kharkatitin. Kay pacha, chaypi tiyakojkunapis kharkatitillankutaj.

⁶ Phiñakojtin, pitaj ñawpaqenpi sayanmanri? Pay phiñakojtin, pitaj ñawpaqenpi awantayta atinmanri? Sinch'i phiñakuynenqa k'ajarishaj nina jina t'akakamun. Ñawpaqenpeqa qaqapis iskayman ch'ejtakun.

⁷ Tata Diosqa may k'achamin. Llakiy p'unchaypipis runata jark'akun, paypi atinikojkunatataj waqaychanpuni.

⁸ Chaywanpis imaynatachus yaku junt'aykuspa tukuy imata apakapun, ajinatamin paywan tukuy churanakojkunata picharparenqa. Tukuy awqankunata manchay laqhayaylla qhatirenqa.

⁹ Qankunarí imatataj Tata Diospa contranpi yuyaychakushankichejri? Payqa tukuyniykichejta chinkachisonqachej, manataj pipis iskay kutita Dioswan churanakunmanchu.

¹⁰ Khishkarara ch'awjra jina, ch'aki ichhu jinataj tukuynin awqankuna ruphachisqa kanqanku.

¹¹ Nínive llajta, qanmantamin Tata Diospa contranpi sajrata yuyaychakojqa llojserqa, millayta yuyaychaj, chay runa.

¹² Chayraykumin Tata Dios ayllunta nin: Asiriokuna may wapu, ashkhataj kanku chaypis, tukuyninku wañuchisqa kanqanku, chinkachisqataj. Ayllúy, noqa mayta ñak'aricherqayki. Kunantajrí manaña astawan ñak'arichisqaykichu.

¹³ Manachayqa, pataykipi kashan, chay yugota t'unasaj, cadenaykitapis p'itirasaj, nispa.

¹⁴ Nínive llajta, Tata Dios kamachinña imaynachus kanaykita: Aylluykimanta mirajkuna manaña kanqachu sutiykita apanankupaj. Diosniykita yupaychana wasipi kaj tukuy lantiykita phirisaj, chay kikinpitaj p'ampaykusqayki, imaraykuchus millachikunamin kanki, nispa.

Nínive llajta chinkachisqa kanqa

¹⁵ 15 (2.1) Qhawaychej, orqo patanejta chaski jamushanña. Payqa allin willaykunata apamushan, kusiy kawsaymanta willaykunata. Judá, Diospaj yupaychana raymita ruway, imaraykuchus manaña jayk'ajpis sajra runakuna suyuykichejman junt'aykamonqankuchu. Astawanpis tukuyninku wañuchisqa kanqanku.