Miqueas 7 - DIOSPA QHELQACHISQ

Miqueas waqarikun

¹ Ay, imallapichus tukukusaj. Noqa chajmakoj jina kani, pichus poqoyta pallay tukukuyta higota, chayrí uva chhullchuta mask'an, ajina. Chaywanpis mana imatapis tarinichu, imajtinchus pallajkuna tukuyninta pallasqanku.

² Kay pachapi manaña kanchu khuyakuyniyoj runakuna, nitaj ujllapis kanchu cheqanta ruwajkuna. Tukuyninku runa masinkuta wañuchinanpaj awaytanku, ujkuna ujkunataj urmanankupaj tojllata churanakunku.

³ Millayta ruwanapaj may yuyayniyoj kanku. Kurajkunaqa runakuna t'inkata apamunankuta mat'inku, justiciata ruwajkunataj lluk'ichikunku. Atiyniyoj kajkunataj munayninkuman jina ruwaspa, runakunata mana allinta ruwanaman apanku.

⁴ Paykuna ukhumanta sumaj runaqa khishkamantapis astawan millayraj, cheqanta ruwaj runapis t'ankar jina. Chaywanpis jasut'isqa kananku p'unchay chayamushanña, Diosmanta sut'inchajkuna willasqankuman jina. Chaypacha paykuna imatachus ruwanankuta mana yachanqankuchu.

⁵ Ama runa masiykej nisqanta jap'ikuychu, nitaj ni mayqen kawsaqeykipipis atinikuychu. Warmiykiwan parlanaykipajpis allintaraj qhawarikuy,

⁶ imaraykuchus qhari wawakuna tatankuta p'enqaypi rikhurichinku, warmi wawakunapis mamankoj contrankuta oqharikunku. Ñojch'akunapis suegrankoj contranpi sayarinku. Sapa ujpata ayllunku ukhullamantataj awqan rikhurin.

⁷ Noqatajrí Tata Diospi atinikusaj, qhespichiwajniy Diosnillaypi atinikuspa suyakusaj, imaraykuchus pay mañarikusqayta uyariwanqa.

Israel atipanqapuni

⁸ Babilonia suyu, ama asikuychu mana allin qhatiriwasqanmanta. Urmarqani chaypis, watej sayarikullasajtaj. Laqhayaypis muyuykuwachun, Tata Diosllamin k'anchaykuwajneyqa.

⁹ Tata Diospa contranpi juchallikorqani. Chayrayku k'araj phiñakusqanta awantasaj. Chaymantataj uj p'unchay juzgaspa, justiciata ruwawanqa. Tata Dios k'anchayman pusawanqa, cheqan kaynintataj rikuchiwanqa.

¹⁰ Chantá awqay chayta rikuspa, p'enqakuymanta wañonqa. Pay kusipayawaspa niwaj: Maypitaj Tata Dios, chay Diosniykiri? nispa. Chaywanpis ñanpi t'uruta jina sarusqata awqayta rikuspa, noqañataj kusikusaj.

¹¹ Jerusalén, muyuyniykipi kaj perqa watej sayarichisqa kanan p'unchay jamushanña, jinataj mojonniykikuna astawan jatunyachisqa kanan p'unchay chayamushallantaj.

¹² Chay p'unchaypi tukuynejmanta tukuy runakuna qanman jamusonqanku: Asiriamanta, Egiptomanta, chantá Nilo mayumanta, Éufrates mayumanta ima. Aswan karu mama qochakunamanta, tukuy orqokunamanta ima qanman jamusonqanku.

¹³ Kunantajrí kay jallp'a ch'inman tukuchisqa kanqa kaypi tiyakojkunaj juchaykichejrayku. Ajina kanqa millayta ruwasqaykichejrayku.

¹⁴ Tata Dios, Israel aylluykita waqaychay qanpa tropaykita jina, imaraykuchus montepi chinkasqa oveja jina kashanku. Paykunata sumachaj jallp'akunaman pusariy. Ñawpajta jina, Basanpi chantá Galaadpi pastoman pusay.

¹⁵ May t'ukuna imakunata paykunaman rikuchiy, imaynatachus Egiptomanta paykunata orqhomushaspa rikucherqanki, ajinata.

¹⁶ Waj suyukunamanta kajkunapis t'ukuna ruwasqaykita rikullachunkutaj, atiyniyoj kashaspapis p'enqakunankupaj. Opa jina, lojt'u jinataj qhepakuchunku.

¹⁷ Katari jina, pampata qhatatakuspa khuru jina jallp'ata llajwachunku. Thapankumanta kharkatitishaj llojsimuchunku. Manchachikuspataj, qan Tata Diosniykuman, chimpamuchunku.

Diosqa ayllunpa juchanta pampachan

¹⁸ Qan jina Dios mana waj dios kanchu, imaraykuchus qanqa juchaykuta pampachanki, qonqayman churanki puchoj aylluykej juchankuta. Qanqa munakuwasqaykuta rejsichiwayku, nitaj wiñaypajchu phiñakunki.

¹⁹ Aswan qhepaman ujtawan noqaykumanta khuyarikuwayku. Juchaykuta chakiykiwan saruranki, mama qocha ukhumantaj millay ruwasqaykuta wijch'uykunki.

²⁰ Tata Dios, Jacobman imatachus nisqaykita ama qonqaychu, nitaj Abrahamta khuyakusqaykitapis, imaynatachus ñawpa tataykuman tiluspa nerqanki, ajinata.