Miqueas 6 - DIOSPA QHELQACHISQ

Diosqa Israelpa contranpi sayaykun

¹ Kunanqa uyariychej Tata Diospa parlasqanta: Sayarikuspa, orqokunaman quejakuy, lomakunapis parlasqaykita uyarichunku.

² Uyariychej orqokuna, jinataj kay pachaj cimientonkunapis. Tata Diosqa ayllunpa contranpi pleitoman yaykun, Israel ayllunwan pleitopi kanqa.

³ Tata Diosqa Israelta nin: Niway ayllúy, imanarqaykitaj, chayrí imata ruwaspataj phiñaricherqayki?

⁴ Noqa Egiptomanta orqhomorqayki, wata runa kasqaykimantataj kacharicherqayki. Chantá Moisesta, Aaronta, Mariatawan ima pusamusunaykichejpaj kachamorqani.

⁵ Munasqa ayllúy, yuyarikuy Moabmanta kuraj kamachej Balac imatachus contraykita wakichisqanta, Beorpa churin Balaampa kutichisqanta ima. Yuyarikuy Sitinmanta Gilgalkama imaynatachus risqaykita, yuyarikuytaj imaynatachus noqa Tata Dios sapa kuti awqaykimanta kacharicherqayki, chaytawan.

Tata Dios imatachus munan

⁶ Israel, qan tapunki: Janaj pachapi kaj Tata Diosta yupaychaj imawantaj chimpaymanri? Payman uj watayoj torillota ñak'aspa q'olachinawan chimpaymanchu?

⁷ Kusikunmanchu Tata Dios waranqa corderokunata q'olachispa jaywajtiy, chayrí chunka waranqa litro aceiteta jaywajtiypis? Kusikunmanchu kuraj kaj churiyta payman jaywajtiy, Diosta wasanchasqaymanta, juchaymantawan paganaypaj? nispa.

⁸ Ayllúy, Tata Dios nisunkiña imachus allin kasqanta. Payqa kayta ruwanaykita munan: Cheqan kajta ruwanaykita, khuyakuyniyoj kanaykita, chantá k'umuykukoj sonqowan payta kasunaykita ima.

⁹ Tata Diosqa israelitakunata wajyashan, pichus allin yuyayniyoj kajtaj nisqanta tukuy sonqo uyarin. Uyariychej, tukuy runakuna, jinallataj kamachejkunapis.

¹⁰ Juchasapa runaj wasin mana allin kajta ruwaspa qhapajyasqanwan junt'a kashan. Wasinpi kallantaj mana cabal balanza, mayqentachus noqa chejnikuni, chay.

¹¹ Mana cabal balanzayoj runata qhawakullasajchu? Mana cabal chimpuyojtapis allillan nisajchu?

¹² Kay llajtamanta qhapajkunaqa tukuyninku runa masinkuta ch'uskejkuna kanku, ch'awkiyajkuna, q'otiyajkuna ima.

¹³ Chayrayku jasut'isqayki, juchallisqaykiraykutaj q'ara pampaman tukuchisqayki.

¹⁴ Ajinamanta mikhuspapis mana sajsakunkichu, manachayqa mikhunamanta jina ch'ayñarayanki. Mikhuna tantasqaykitapis mana waqaychayta atinkichu. Imatachus jallch'anki, chaytapis contraykipi jamojkunaman jaywasaj.

¹⁵ Tarpunki chaypis, mana poqoyta oqharinkichu. Olivo sach'amanta aceitunata takaspapis, mana aceitenta llamirinkichu. Uvata ch'irwaspapis, mana vinota ujyankichu.

¹⁶ Ajina kanqa, imaraykuchus Omrij ayllunpa jinallataj Ajabpa ayllunpa kamachisqankuta ruwarqanki. Imaynatachus paykuna purerqanku, qanpis ajinallataj purerqanki. Chayraykumin noqa qanta, qanwan tiyakojkunatawan ima runa alqochakunankupaj jina ruwasaj. Kay pachamanta tukuy runataj pisipaj qhawasonqanku, nispa.