Miqueas 4 - DIOSPA QHELQACHISQ

Tata Dios kamachenqa

¹ Jamoj p'unchaypi, maypichus Tata Diospa Templon kashan, chay orqoqa maypaj qhawasqa kanqa. Tukuy orqokunamanta aswan uyarisqa kanqa, tukuy suyumanta runakunataj chayman jamonqanku.

² May chhika runa tukuynejmanta jamuspa, nenqanku: Jamuychej, Tata Diospa orqonman wicharinachej, Jacobpa Diosninpa Templonman rinachej. Chaypi pay munasqanman jina kawsayta yachachiwasunchej, noqanchejtaj paypa ñanninpi purisunchej, imaraykuchus Tata Diospa yachachisqan Sionmanta jamonqa, Jerusalenmantataj Tata Dios parlamonqa.

³ Tukuy suyukuna ukhupi Tata Dios justiciata ruwanqa, jinataj karupi kaj may chhika atiyniyoj suyukunata cheqan ñanman churanqa. Chaypacha paykuna espadankuta rejaman tukuchenqanku, lanzankutapis trigo ruthunaman. Ni mayqen suyupis armankunata maqanakunapaj oqharenqachu, nitaj maqanakunapaj wakichikonqachu.

⁴ Manachayqa, tukuyninku ni imata manchachikuspa kawsakonqanku. Sapa runa uva sach'anpa llanthunpi samarikuyta atenqa, jinataj higo sach'anpa llanthunpi tiyarikonqa. Ajinata Tukuy Atiyniyoj Tata Dios nin.

⁵ Waj suyukunaqa diosninkuta kasuspa purinku. Noqanchejrí Tata Diosninchejta kasuspapuni purisunchej.

Tata Dios ayllunta kacharichenqa

⁶ Tata Dios kaytapis nillantaj: Chay p'unchay, ñak'arichisqay ovejaykunata, chakin p'akisqata, sayk'usqata, jinataj ch'eqerasqata ima tantaykusaj.

⁷ Chaykunawan, qhepakojkunawantaj kallpayoj suyuta ruwasaj. Chantá noqa Tata Diosmin Sión orqopi Israel suyuyta wiñaypaj kamachisaj.

⁸ Qanrí, Jerusalén, uywa qhawana torre jina kanki, sumaj perqasqa llajtataj. Chaypachataj ujtawan Israelpa jatun llajtan kanki, imaynachus ñawpajpi may uyarisqa karqanki, jinallataj.

⁹ Kunanrí, imarayku ajinata qhaparinki, onqokushaj warmi jinari? Manachu qanpi kuraj kamachej tiyan? Chayrí yuyaychasojkuna wañupusqankuchu?

¹⁰ Sión llajta, onqokushaj warmi jina nanaywan qhapariy, imaraykuchus runaykikuna qanmanta llojsenqanku, q'ara pampapi tiyamonqanku. Chaymantataj mana munaspapis, Babiloniaman apasqa kanqanku. Chaywanpis Tata Dios chaypi preciota pagaspa ayllunta kacharichenqa, awqanpa makinmantataj paykunata qhespichenqa.

¹¹ Kunan ashkha suyukuna contraykipi tantaykukuspa, ninku: Jakuchej, Jerusalén llajta sarusqa kasqanta rikuspa, manchayta kusikusunchej, nispa.

¹² Chaywanpis chay suyukuna mana Tata Diospa yuyasqanta yachankuchu, nitaj imachus ruwanan kasqantapis. Manallataj yachankuchu Dios paykunata tantaykunanta, imaynatachus trigo marq'ata eraman tantanchej, jinata.

¹³ Tata Dios nin: Sión llajta, jatarispa, contraykipi kaj suyukunata trillay. Noqa fierromanta wajrata, broncemanta silluta ima qosqayki, phiña toro jina ashkha suyukunata phirinaykipaj. Jinapi qan paykunamanta qhechunki, mana allinta ruwaspa qhapajyasqankuta, chaytataj noqapaj t'aqapuwanki, imaraykuchus noqamin tukuy kay pachata kamachej Tata Dios kani, nispa.