Miqueas 2 - DIOSPA QHELQACHISQ

Ñak'arichejkunaj atiyninku

¹ Ay, imallapichus rikhurenqanku, pikunachus puñushaspapis millayta ruwanankupaj umachakunku, q'ayantin sut'iyamojtintaj, yuyasqankuta ruwanku atiyniyoj kasqankurayku, chaykunamanta.

² Waj runaj jallp'anta moq'erinku, qhechuspataj jap'ikapunku. Wajpa wasinta munapayanku, qhechunkutaj. Kallpankuman atinikuspa, runata aylluntinta ñak'arichinku. Q'otiyaspataj, paykunata wasinkumanta wijch'unku.

³ Chayraykumin Tata Dios nin: Noqapis contraykichejpi wakichikushani. Qankunaman jatun llakiyta apachimusaj, chaymantataj mana ni imaynamanta llusp'iyta atinkichejchu. Manañataj mayta runaykachaspa purinkichejchu, imaraykuchus manchay ñak'arina tiempo kanqa.

⁴ Chay p'unchaypi awqaykichejkuna kusipayaspa, kay jina yarawita takipusonqanku: Cheqapuni ni imayoj rikhurinku. Tata Diospata kajkunaqa wajpa makinman chayanku, ni pej jark'akusqan. Tukuy suyunkuta soldadonchejkuna jap'ikapunku, jallp'ankutapis rak'inaykukunchej, nispa.

⁵ Chayraykumin Tata Diospa ayllun ukhupi mana kanqachu jallp'ata suertepi rak'iraj, nispa.

Llullakuspa sut'inchajkuna

⁶ Chayta nejta uyariwajkuna kutichiwanku: Amapuni chay jinata sut'inchaychu, imaraykuchus mana ni ima llakiypis chayamuwasunchu, nispa.

⁷ Tata Diostajrí kutichin: Jacobpa ayllun, chay parlasqaykichej allinchu? Yuyankichejchu Espírituy chay jinata purejkunawan pacienciakunantapuni? Manachu parlasqay yanapan, pichus cheqanta kawsan, chay runata?

⁸ Qankunarí aylluy kaspapis, kunan contrayta oqharikunkichej. Qayllaykichejpi purej runakunamanta, pikunachus qankunapi atinikorqanku, chaykunaj patanchana p'achankuta qhechurparillankichej paykuna awqaykichejpis kankuman jina.

⁹ Jinallataj aylluypa warminkunata munasqa wasinkumanta wijch'unkichej, wawankunamantataj imatachus noqa paykunaman qorqani, chayta qhechunkichej.

¹⁰ Chayrayku jatarispa, puririychej, kayqa mana samarikunaykichej cheqañachu. Kay cheqaqa juchawan ancha ch'ichichasqa, chayraykutaj chinkachisqa kanqa.

¹¹ Sichus pi ch'awkiyaspa, llullakuspataj nisunkichej: Tata Diosqa vinotawan, licortawan qosonqachej nispa, chayqa, chay runamari qankunapaj sumaj sut'inchaj kanman.

Diosqa ayllunta kacharichinanta nin

¹² Aswan qhepamanrí, noqa Jacobpa ayllunmanta kajkunata tukuyninta tantasaj. Israelmanta uj chhika puchojta tantaykakapusaj, imaynatachus ovejata tropanman tantaykunchej, ajinata. Chantá pasto chawpipi michisqa oveja jina kanqanku, may chhika runapis kankuman jinataj ch'ajwarenqanku.

¹³ Kamachejninku ñanta kichaspa, ñawpaqenkuta renqa, paykunataj payta qhatispa, llajta punkunta llojsenqanku. Noqa Tata Diosmin kuraj kamachejninku kaspa, ñawpaqenkuta risaj, nispa.