Miqueas 1 - DIOSPA QHELQACHISQ

¹ Judá suyupi Yotán, Ajaz, Ezequiaspiwan ujmanta uj kamachishajtinku, Tata Diosqa Moreset llajtayoj Miqueasta parlarqa. Chaypachataj imachus Samariawan, Jerusalenwan ima kananmanta mosqoypi jina rikucherqa.

Dios nin Samaria llajtata jasut'inanta

² Tukuy runakuna, kayta uyariychej: Tukuyta Kamachej Tata Diosmin may llimphu Templonmantapacha testigo jina qankunaj contraykichejpi sayanqa.

³ Tata Dios llojsimonqa, maypichus tiyakushan, chaymanta, jamonqataj orqo patanta thaskispa.

⁴ Chakin urapi orqokuna unuyanqanku, imaynatachus ceraqa ninaman churaykojtinchej unuyan, jinata. Vallekunapis iskayman khallasqa kanqanku, imaynatachus purishaj yaku wayq'ota ruwan, jinata.

⁵ Chay ajina kanqa, Jacobpa ayllun mana kasukusqanrayku, Israel suyu juchallikusqanrayku ima. Jacob imata ruwaspa juchallinri? Imatachus ruwasqanqa Samaria llajtapi kashan. Maypitaj Judá suyoj lanti yupaychanan kashanri? Chayqa Jerusalén llajtapi kashan.

⁶ Chayraykumin, Tata Dios nin: Samaria llajtata laqayaman tukuchisaj, uva huertata churanapaj jina. Chay llajtaj perqanmanta rumikunata valleman wijch'usaj, cimientontapis sut'iman rikhurichisaj.

⁷ Tukuy lantinkupis phirisqa kanqanku, k'ullumanta tukuy lantikunapis ruphachisqa kanqanku. Chaykunaqa phisu warmikunaj qolqe ganasqankuwan ruwasqa karqa. Chayrayku ujtawan phisu warmikunaj qolqellankumantaj tukuchisaj, nispa.

Miqueas llakikuspa waqarikun

⁸ Chayrayku ancha llakisqa waqasaj, jinataj q'alalla, q'ara chakitaj purisaj. K'ita alqo jina awllakuspa, suri jina waqaspataj purisaj.

⁹ Samaria llajtaj k'irisqa kasqanqa mana jampiy atina jina. Judá suyupis k'irisqallatajmin kashan, chaytaj Jerusalén llajtaypa punkunkama chayan.

¹⁰ Ama Gatpi tiyakojkunaman chayta willaychejchu, amataj waqaychejchu. Bet Leafrá llajtapi tiyakojkuna, llakiywan jallp'api sunt'iraychej.

¹¹ Safirpi tiyakojkuna, llajtaykichejmanta q'arallata, p'enqaytataj waj suyuman apasonqachej. Zananpi tiyakojkuna manchachikuspa, mana llajtankumanta llojsenqankuchu, Betesel llajtapi tiyakojkunataj wañojkunamanta waqashanku. Chayrayku qankunata mana pipis yanapasonqachejchu.

¹² Marot llajtapi tiyakojkuna imaynatataj kusisqa kankuman, Tata Diospa jasut'iynin Jerusalén llajtaj punkunkama chayajtinri?

¹³ Qankuna, Laquis llajtapi tiyakojkuna, israelitakuna jinallataj Diospa contranpi oqharikorqankichej. Qankunanejta Sión llajtapi tiyakojkunata juchallicherqankichej, kunantaj carretaykichejman caballokunata wataychej.

¹⁴ Moréset Gatman t'inkata qoychej ripunaykichejpaj. Aczib llajtaqa Israelta kuraj kamachejkunapaj tojlla jina kanqa.

¹⁵ Tata Dios nin: Maresa llajtapi tiyakojkuna, qankunaj contraykichejta watej atipajta kachamusaj. Israel suyumanta astawan wapu kajkunapis Adulán jusk'uman pakakoj ayqenqanku.

¹⁶ Sión llajtapi tiyakojkuna, munasqa wawaykichejkunarayku may llakisqa kasqaykichejta rikuchispa, sunkhaykichejta raphakuychej. Suweq'araj umanman rijch'akunankama umaykichejta ruthukuychej, imaraykuchus wawaykichejkunaqa mana munashajpis waj suyuman apasqa kanqanku.