San Mateo 11 - DIOSPA QHELQACHISQ

Bautizaj Juanpa kachankuna

¹ Jesusqa chunka iskayniyoj yachachisqankunaman chaymanta yuyaychayta tukuytawan purirerqa, chay cheqanejpi llajtakunaman yachachinanpaj, Diosmantataj willarananpaj ima.

² Chaypacha Bautizaj Juan carcelpi kasharqa. Chantá Cristoj ruwasqanmanta uyarispa, wakin yachachisqankunata Jesusta tapunankupaj kacharqa:

³ Qanchu kanki, pichus jamunan karqa, chay? Chayrí, wajtachu suyasqayku? nispa.

⁴ Jesustaj paykunaman kuticherqa: Rispa, Juanman willamuychej imatachus rikushankichej, uyarishankichejtaj, chay tukuyta:

⁵ Ñawsakunaqa rikunku, suchukunapis puririnku, jinallataj llejti onqoyniyojkuna llimphuchasqa kanku. Joq'arakunapis uyarinku, wañusqakuna kawsarimunku, wajchakunamanpis Diosmanta sumaj willay willakun.

⁶ Kusikuyniyojmin pichus mana iskayrayaspa noqamanta jap'ikojqa, nispa.

⁷ Juanpa yachachisqankuna ripusqankutawan, Jesusqa Juanmanta runakunaman parlayta qallarerqa: Imata qhawajtaj ch'inman rerqankichej? Wayraj wajtaykachasqan soqosotachu?

⁸ Manachayrí, imatataj rikorqankichej? Sumaj p'achayoj runatachu? Sumaj p'achayojkunaqa kuraj kamachejkunaj wasinkupi kashanku.

⁹ Imatapunitaj rikumorqankichejri? Diosmanta uj sut'inchajtachu? Arí, noqatajrí niykichej, Diosmanta sut'inchajmantapis aswanraj kasqanta.

¹⁰ Kay Juanmanta parlaspa, Diospa Qhelqachisqanpi nin: Noqa willajniyta ñawpaqeykita kachamushani, ñanta wakichipusunanpaj, nispa.

¹¹ Noqa sut'ita nillaykichejtaj: Tukuy runamanta mana ujllapis Juanmanta nisqaqa aswan kuraj kanchu. Chaywanpis Diospa janaj pacha kamachiyninpi mana kasu ruwana kaj Juanmanta aswan kurajraj.

¹² Bautizaj Juan jamusqanmantapacha kunankamaqa, Diospa janaj pacha kamachiynenqa ñawpajman rishan, awqakuna mana munashajtinkupis. Mana manchachikojkunatajrí Diospa kamachiyninman kallpankuwan yaykuyta munashanku.

¹³ Diosmanta tukuy sut'inchajkunaj qhelqasqankupi, chantá Moisespa kamachisqankuna qhelqasqapi imaqa Diospa kamachinanmanta willarqanku Juan jamunankama.

¹⁴ Sichus qankuna kay nisqayta jap'ikuyta munankichej chayqa, Juanqa Diosmanta sut'inchaj Elías qankunapaj kanman, pitachus Dios kachamunan karqa, chay.

¹⁵ Pichus nisqayta jap'ikuyta munajqa allinta uyarichun, nispa.

¹⁶ Kay tiempopi kawsaj runakunata imamantaj rijch'achiymanri? Paykunaqa plazapi pujllaj wawakunaman rijch'akunku. Wawa masinkuta qhaparispa, paykuna ninku:

¹⁷ Qenata tocapuyku, qankunarí mana tusunkichejchu. Llakiy takiykunata takiripuyku chaypis, manallataj waqankichejchu, nispa.

¹⁸ Chayta niykichej, imaraykuchus Bautizaj Juan jamuspa, mana chhikata mikhojchu, nitaj vinota ujyajchu. Qankunataj nerqankichej: Payqa supayniyoj, nispa.

¹⁹ Runaj Churin jamojtintajrí, mikhusqanrayku, ujyasqanraykutaj ninkichej: Kay runaqa anchata mikhun, machasqallataj purin. Chantá juchasapakunawan, impuestota cobrajkunawan ima kawsakun, nispa. Jinapis Dios yachayniyoj kasqanta reparanchej, chay yachachisqanta qhatejkuna imaynatachus kawsasqankuta rikuspa, nispa.

Jesuspi mana atinikojkuna

²⁰ Chaypacha Jesús k'amiyta qallarerqa, may llajtakunapichus astawan t'ukuna imakunata ruwarqa, chaypi tiyakojkunata, manapuni juchankumanta Diosman kutirikusqankurayku.

²¹ Nerqataj: Ay, Corazín llajtayojkuna, qankunamanta imallachus kanqa. Ay imallachus kanqa qankunamantapis, Betsaida llajtayojkuna. Sichus Tiro llajtapi, jinataj Sidón llajtapi pipis qankuna ukhupi kay ruwasqay t'ukunata ruwanman karqa chayqa, maypachaña Diosman kutirikunkuman karqa. Paykunaqa qhashqa p'achata churakuspa, ushpha patapi tiyaspataj, Diosman kutirikusqankumanta yachayta qonkuman karqa.

²² Chayrayku niykichej: Juicio p'unchaypeqa, Tiro llajtayojkunapaj, Sidón llajtayojkunapaj ima aswan pisi ñak'ariy kanqa. Qankunapajrí aswan sinch'i ñak'ariy kanqa.

²³ Jinallataj qankuna Cafarnaún llajtayojkuna, yuyankichejchu janaj pachakama oqharisqa kanaykichejta? Manapuni, astawanqa ukhu pachaman wijch'uykusqa kankichej. Sodomapichus qanpi jina pipis t'ukuna imakunata ruwanman karqa chayqa, chay llajtaqa kunankama kakushanman karqa.

²⁴ Chayrayku niykichej: Juicio p'unchaypeqa qankuna aswan sinch'ita ñak'arinkichej Sodomapi tiyakojkunamanta nisqaqa, nispa.

Jesusqa runakunata wajyan

²⁵ Chaypacha Jesús kay jinata Diosta nerqa: Tatáy, janaj pachata, kay pachatawan kamachej Dios, noqa jatunchayki imaraykuchus qan kay imakunata yachayniyojkunamanta, yuyayniyojkunamantawan pakaykorqanki, wawa jina kajkunamantaj sut'incharqanki.

²⁶ Arí, Tatáy, qan ajinata munarqanki, nispa.

²⁷ Chantá Jesús chaypi kajkunata nillarqataj: Tatayqa tukuy imata qowan. Mana pipis yachanchu pichus Churi kasqanta. Chaytaqa Tatalla yachan. Nitaj pipis yachanchu pichus Tata kasqanta, manachayqa Churillan yachan, jinallataj pimanchus Churin rejsichiyta munan, chay.

²⁸ Noqaman jamuychej, tukuy sayk'usqa kajkuna, llasa q'epiyojkuna ima, noqataj samarichisqaykichej.

²⁹ Yugoy churasqayta tukuy sonqo jap'ikuychej, noqamantataj yachaqakuychej. Noqaqa k'acha kani, llamp'u sonqotaj, qankunataj chayta ruwaspa, samariyta tarinkichej,

³⁰ imaraykuchus yugoyqa apay atinalla, q'epiypis mana llasachu, nispa.