Marcos 16 - DIOSPA QHELQACHISQ

Jesús wañusqamanta kawsarimpun

¹ Samarina p'unchay pasayta María Magdalena, Santiagoj maman María, Salomé ima sumaj q'apaj jawinata rantimorqanku, chaywan Jesuspa ayanta jawinankupaj.

² Semana qallariyta inti llojsimushajtin, chay warmikuna aya p'ampanaman rerqanku.

³ Rishaspataj, paykuna ninakusharqanku: Kunanqa pitaj aya p'ampanaman yaykuna punkupi rumita tanqaripuwasunri? nispa.

⁴ Chayta nerqanku chay rumi ancha jatun kasqanrayku. Chayaspatajrí, rumita tanqarparisqataña rikorqanku.

⁵ Chantá chay warmikuna aya p'ampanaman yaykuspataj, uj waynata pañanejpi tiyashajta rikorqanku qhoysu yuraj p'achayojta. Chantá sinch'ita mancharikorqanku.

⁶ Jinapi chay wayna nerqa: Ama mancharikuychejchu. Qankunaqa Nazaretmanta Jesusta mask'ashankichej, pichus cruzman chakatasqa wañorqa, payta icharí? Payrí kawsarimpunña, mana kaypiñachu. Qhawariychej, Jesuspa ayanta kayman churarqanku.

⁷ Kunantaj rispa, yachachisqankunaman, chantá Pedroman ima willamuychej. Jesús ñawpaqeykichejta Galileaman rishan, chaypitaj nisqanman jina payta rikunkichej, nispa.

⁸ Chay warmikuna aya p'ampanamanta llojsispa, imata jina ayqerqanku, imaraykuchus mancharikuspa kharkatitisharqanku. Chayrayku mana pimanpis imatapis willarqankuchu.

Jesusqa María Magdalenaman rikhurin

⁹ Jesús samarina p'unchay pasayta sut'iyamuyta wañusqamanta kawsarimpuspa, ñawpajta María Magdalenaman rikhurerqa, pimantachus Jesús qanchis supaykunata qharqosqa, chay warmiman.

¹⁰ Mariataj rispa, Jesuspa yachachisqankunaman willamorqa. Paykuna may llakisqa kaspa, waqasharqanku.

¹¹ Mariataj paykunaman willarqa Jesús wañusqamanta kawsarimpusqanta, paytataj rikusqanta ima. Paykunarí manapuni Mariaj nisqanta jap'ikorqankuchu.

Jesús iskay yachachisqankunaman rikhurin

¹² Chay qhepata Jesús uj jina rijch'ayniyoj rikhurillarqataj iskay yachachisqankunaman, campoman rishajtinku.

¹³ Chaymantataj paykuna Jerusalenman kutirispa, chay ujkunaman Jesusta rikusqankuta willarqanku. Jesuspa chay waj yachachisqankunatajrí nillataj paykunaj nisqankuta jap'ikorqankuchu.

Jesús yachachisqankunaman uj ruwanata qon

¹⁴ Qhepaman Jesús chunka ujniyoj yachachisqankunamanpis rikhurillarqataj, paykuna mikhushajtinku. Jinapi paykunata k'amerqa, rumi sonqo kaspa, mana paypi atinikusqankurayku, imaraykuchus kawsarimpusqanta rikojkunaj nisqankutapis manapuni jap'ikorqankuchu.

¹⁵ Jesustaj nerqa: Qankuna tukuy kay pachaman riychej, jinaspataj noqamanta sumaj willayta tukuy runaman willamuychej.

¹⁶ Pichus noqapi atinikojqa, chantá bautizachikojtaj, qhespichisqa kanqa. Noqapi mana atinikojrí wiñaypaj juchachasqa kanqa.

¹⁷ Noqapi atinikojkunataj runaj mana jayk'aj rikusqan t'ukunata ruwanqanku: Sutiypi supaykunata runamanta qharqonqanku, mosoj parlaykunatataj parlanqanku.

¹⁸ Paykuna makinkuwan katarikunata oqharenqanku, venenota ujyaspapis, mana imanakonqankuchu. Chantá onqosqakunata makinkuwan llankhajtinku, qhaliyanqanku, nispa.

Jesús janaj pachaman kutipun

¹⁹ Chantá Tukuyta Kamachej Jesús parlajtinkama, janaj pachaman oqharisqa karqa, chaypitaj Diospa pañanman kamachinanpaj tiyaykukorqa.

²⁰ Paypa yachachisqankunataj, tukuynejman rispa Jesusmanta sumaj willayta willaramorqanku. Tukuyta Kamachej Jesuspis paykunata yanapaj, runaj mana jayk'aj rikusqan t'ukunata ruwasqankuwan yachayta qonankupaj yachachisqanku cheqan kasqanta.