Marcos 14 - DIOSPA QHELQACHISQ

Jesusta wañuchinankupaj yachachinakunku

¹ Iskay p'unchayllaña Pascua raymipaj karqa, jinallataj Mana Levadurayoj T'anta raymipaj ima. Chantá kuraj sacerdotekuna, Diospa kamachisqanmanta yachachejkuna ima mask'asharqanku imaynatachus Jesusta pakayllamanta jap'ichispa wañuchinankuta.

² Jinapis nisharqanku: Ama Pascua raymi p'unchaypeqa jap'ichinachu, imaraykuchus runakuna oqharikuspa, ch'ajwankuman, nispa.

Betaniapi uj warmi Jesusta sumaj q'apashaj jawinawan jawin

³ Chaypacha Jesusqa Betania llajtapi kasharqa, Simonpa wasinpi, pichus ñawpajta llejti onqoyniyoj karqa, chaypapi. Jesús mikhushajtintaj, uj warmi chayman yaykumorqa. Payqa sumaj q'apashaj nardomanta ruwasqa jawinata apasharqa alabastro rumimanta juch'uy botellapi. Chay jawinataj manchay valorniyoj karqa. Chantá warmeqa botellaj siminta p'akispa, jawinawan Jesuspa umanta jawiykorqa.

⁴ Wakinkunatajrí chaymanta sonqonkupi phiñakuspa, nerqanku: Imapajtaj pay kay jina sumaj q'apashaj jawinata usuchinri?

⁵ Payqa chunka killa jornalta jina qolqepi chayta vendenman karqa, chay qolqewantaj wajchakunata yanapayta atinman karqa, nispa. Ajinamanta warmipaj mayta rimarqanku.

⁶ Jesustajrí paykunata nerqa: Ama payta imatapis niychejchu. Imaraykutaj kay warmej contranta rimashankichejri? Payqa noqapaj allinta ruwapuwan.

⁷ Wajchakunaqa qankuna ukhupi kallanqankupuni. Paykunata yanapayta munaspaqa, mayk'ajllapis yanapayta atinkichej. Noqarí manaña unaytachu qankunawan kasaj.

⁸ Kay warmeqa atisqanta ruwan. Payqa sumaj q'apashaj jawinawan ukhuyta jawin, ajinamantataj ñawpaykun p'ampakunay p'unchaypaj.

⁹ Kayta sut'ita niykichej: Mayllapipis noqamanta sumaj willay willakojtin, kay warmej ruwasqanmantapis willallanqankutaj, paymanta runa yuyarikunankupaj, nispa.

Judasqa Jesusta jap'ichinanta nin

¹⁰ Chaymanta Jesuspa chunka iskayniyoj yachachisqankunamanta ujnin, Judas Iscariote sutiyoj, kuraj sacerdotekunawan parlamoj rerqa, Jesusta jap'ichinanpaj.

¹¹ Paykunataj chayta uyarispa, mayta kusikorqanku. Chantá payman qolqeta qonankupaj parlarqanku. Chaymantapachataj Judas imaynamantapis Jesusta jap'ichinanta mask'asharqa.

Jesús Pascua mikhuyta mikhun

¹² Mana Levadurayoj T'anta Mikhuna raymi p'unchaypa qallariynin karqa, maypachachus Pascuapaj corderota ñak'anku, chaypacha. Chantá Jesuspa yachachisqankuna payta taporqanku: Maypitaj Pascua mikhunata mikhunaykipaj wakichinaykuta munankiri? nispa.

¹³ Chantá Jesusqa iskay yachachisqankunata ajinata nispa kacharqa: Llajtaman riychej, chaypitaj p'uñupi yakuta apashaj runawan tinkukunkichej. Chantá payta qhatiychej.

¹⁴ Maymanchá yaykonqa, chay wasiyojta niychej: Yachachejniyku nisunki: Maypitaj cuarto kanman yachachisqaykunawan khuska Pascua mikhunata mikhunaypajri? nispa.

¹⁵ Chay wasiyojtaj, alto patapi k'uchunchasqa uj jatun cuartota rikuchisonqachej. Chaypi tukuy imata wakichiychej Pascua mikhunata mikhunanchejpaj, nispa.

¹⁶ Chantá chay yachachisqakunaqa chayman rerqanku. Llajtaman yaykuspataj, tukuy imata Jesuspa nisqanman jina tarerqanku, chay wasipitaj Pascua mikhunata wakicherqanku.

¹⁷ Chantá ch'isiyaykuyta Jesús chay wasiman chayarqa, chunka iskayniyoj yachachisqankunawan.

¹⁸ Pascua mikhuyta mikhushajtinkutaj, Jesusqa paykunata nerqa: Kayta sut'ita niykichej: Qankunamanta ujniykichej, pichus noqawan mikhushan, chay wasanchawaspa jap'ichiwanqa, nispa.

¹⁹ Chaymanta yachachisqankuna llakikuspa, ujmanta uj Jesusta tapuyta qallarerqanku: Chay wasanchasojqa mana noqachu kani, icharí? nispa.

²⁰ Jinapi Jesús paykunaman kuticherqa: Qankunamanta ujniykichej, pichus noqawan chuwapi t'antata chhapuspa mikhushan, chaymin jap'ichiwanqa.

²¹ Diospa Qhelqachisqanpi nin jina, Runaj Churenqa wañunanpuni tiyan. Chaywanpis, ay jaqay runamanta, pichus noqata wasanchawaspa jap'ichiwanqa, chaymanta. Allin kanman karqa chay runapaj ama paqarinanqa, nispa.

²² Paykuna mikhushajtinku, Jesús t'antata oqharispa, Diosman pachis nerqa. Chantá chay t'antata partiytawan, yachachisqankunaman jaywaspa, nerqa: Jap'iychej, kaymin ukhoyqa, nispa.

²³ Chaymantataj vinoyoj copata oqharispa, Diosman watej pachis nillarqataj. Chantá paykunaman jaywarqa, tukuyninkutaj chay copamanta ujyarqanku.

²⁴ Jesustaj paykunata nerqa: Kaymin yawarneyqa, chaywantaj Dios qankunawan mosoj tratota ruwan. Kay yawartaj ashkha runarayku jich'asqa kanqa.

²⁵ Kayta sut'ita niykichej: Manaña ujtawan uva sach'aj poqoyninmanta ujyasajchu, Diospa kamachiyninpi kaspa mosoj vinota ujyanaykama, nispa.

²⁶ Chantá uj salmota takiytawan, Jesuswan, yachachisqankunawan ima Olivos orqoman rerqanku.

Jesús sut'inchan Pedro qhesachananta

²⁷ Ñanta rishajtinkutaj, Jesús paykunata nerqa: Kunan tukuyniykichej iskayrayaspa saqerpariwankichej. Diospa Qhelqachisqanpi nin: Michejta wañuchisaj, ovejakunataj ch'eqerakonqanku, nispa.

²⁸ Chaywanpis, wañusqamanta kawsarimpuspa, noqa ñawpaqeykichejta Galileaman risaj, nispa.

²⁹ Pedrotajrí Jesusta nerqa: Tukuyninku saqesojtinkupis, noqaqa manapuni saqerparisqaykichu, nispa.

³⁰ Jesustajrí Pedrota nerqa: Kayta sut'ita niyki: Kunan ch'isipacha, manaraj gallo iskay kutita waqashajtin, qan kinsa kutikama ninki noqata mana rejsiwasqaykita, nispa.

³¹ Pedrotajrí astawan atipakuspa, kuticherqa: Qanwan wañunay kashajtinpis, manapuni nisajchu: Paytaqa mana rejsinichu, nispa. Jinapi chay waj yachachisqakunapis kikillantataj nerqanku.

Jesús Getsemanipi Dioswan parlarikun

³² Jesuswan, yachachisqankunawan ima Getsemaní sutiyoj cheqaman chayarqanku. Jesustaj paykunata nerqa: Kaypi tiyarikuychej, noqataj Tata Dioswan parlarikamusaj, nispa.

³³ Chantá Pedrota, Santiagota, Juantawan aswan jaqaynejman pusaspa, chaypi Jesús sonqo nanayta llakiywan ñak'ariyta qallarerqa.

³⁴ Paykunatataj nerqa: Sonqoyqa llakiymanta manchay phutisqa kashan, wañunaypaj jina. Qankuna kaypi qhepakuychej, ama puñuspalla, nispa.

³⁵ Jinapi Jesusqa tumpatawan ñawpajman riytawan, pampakama k'umuykuspa, Diosmanta mañakorqa, atikojtenqa, ñak'arinan karqa, chay p'unchay ama chayamunanta.

³⁶ Mañakuspataj, Jesús nerqa: Tatáy, Tatitáy, qanpajqa tukuy imapis atikullan. Imatachus ñak'arinaymanta kacharichiway ari. Chaywanpis ama noqaj munaynillay kachunchu, manachayqa qanpa munayniyki ruwasqa kachun, nispa.

³⁷ Chantá Jesús, maypichus chay kinsa yachachisqankuna kasharqanku, chayman kutirimorqa, paykunatataj puñushajta tariparqa. Chayrayku Pedrota nerqa: Simón, puñushankichu? Manachu uj phanillatapis mana puñuspalla noqawan kayta aterqanki?

³⁸ Rijch'arisqa kaychej, ama puñuspataj Dioswan parlarikuychej, juchaman tanqasqa kaspa ama kasunaykichejpaj. Sut'ita niykichej: Qankunaqa sonqoykichejpi kasuyta munankichej. Chaywanpis ukhuykichejqa pisi kallpayoj, nispa.

³⁹ Chantá Jesús ujtawan paykunamanta karunchakuspa, ñawpajta jina Diosmanta mañakorqa.

⁴⁰ Maypichus chay kinsa yachachisqankuna kasharqanku, chayman kutimuspataj, Jesús watejmanta paykunata puñushajta tariparqa, imaraykuchus paykuna puñuywan atichikuspa k'aywisharqanku. Chaywanpis ni imata niyta aterqankuchu.

⁴¹ Kinsa kutitaña Diosmanta mañakusqanmanta kutimuspa, Jesús yachachisqankunata nerqa: Puñushankichejrajchu? Samarikushankichejrajchu? Jinalla kachun. Chaywanpis imachus kanan kashan, chayqa junt'akushanña, Runaj Churintaj juchasapakunaj makinpiña kashan.

⁴² Sayariychej, jaku. Jap'ichiwajqa kaypiña, nispa.

Jesusta presochanku

⁴³ Jesús parlashajtillanraj, Judas chayaykamorqa. Payqa chunka iskayniyojmanta ujnin kaj karqa. Jinallataj paywan khuska ashkha runakuna jamorqanku espadayoj, k'aspiyoj ima. Chay runakunataqa kuraj sacerdotekuna, Diospa kamachisqanmanta yachachejkuna, kurajkuna ima kachamusqanku.

⁴⁴ Jesusta jap'ichej Judastaj presochajkunawan yachachinakusqaña imaynatachus Jesusta jap'ichinanpaj: Pitachari noqa much'aykusaj, chay kanqa. Payta jap'ispa, presota apankichej, nispa.

⁴⁵ Chantá Judasqa Jesusman qayllaykuspa, nerqa: Yachachej Wiraqochíy, nispa. Jinaspataj uyanpi much'aykorqa.

⁴⁶ Jinallapi chay runakuna Jesusta jap'iytawan, presocharqanku.

⁴⁷ Chaypi Jesuswan kajkunamanta ujninrí espadanta sik'ikuspa, kuraj kaj sacerdotej wata runanpa ujnin ninrinta qholurparerqa.

⁴⁸ Jesustaj chay runakunata taporqa: Suwata jinachu jap'iwaj jamunkichej, espadayoj, k'aspiyoj ima?

⁴⁹ Sapa p'unchay Temploj pationpi yachachishajtiy, imaraykutaj mana jap'iwarqankichejchuri? Chaywanpis kay jinata ruwashankichej, imaraykuchus Diospa Qhelqachisqanpi imatachus nisqan junt'akunan tiyan, nispa.

⁵⁰ Chantá tukuynin yachachisqankuna Jesusta sapallanta saqerparispa, ayqerikaporqanku.

⁵¹ Uj waynataj Jesusta qhatisharqa, sabanawan llijllaykusqa. Chay runakunataj paytapis jap'illarqankutaj.

⁵² Chaywanpis jap'ejkunaj makinkupi sabanata saqerparispa, waynaqa q'alalla ayqerikaporqa.

Jesús Jatun Juntaj ñawpaqenpi

⁵³ Chaymanta Jesusta kuraj kaj sacerdotejpaman pusarqanku. Chaymantaj tukuy kuraj sacerdotekuna tantakamorqanku, kurajkuna, Diospa kamachisqanmanta yachachejkuna ima.

⁵⁴ Pedrotajrí karullamanta Jesusta qhatispa, kuraj kaj sacerdotej wasinpa ukhu pationman yaykorqa. Chaypitaj payqa Templota qhawaj soldadokunawan khuska nina qayllapi chukuspa, q'oñikusharqa.

⁵⁵ Kuraj kaj sacerdotekuna, Jatun Juntamanta kajkunawan ima, llulla testigokunata mask'arqanku, Jesusta ch'ataykuspa, chaymanta wañuchichinankupaj. Chaywanpis ni imata tarerqankuchu.

⁵⁶ Jinapi chaypi kajkunamanta ashkha runakuna llullakuspa, Jesuspa contranta parlarqanku. Chaykunarí mana ujllatachu parlarqanku.

⁵⁷ Chantá wakinkunaqa sayarerqanku, llullakuspataj Jesuspa contranta nerqanku:

⁵⁸ Noqaykoqa Jesusta ajinata nejta uyarerqayku: Noqaqa runaj makinwan ruwasqa kay Templota thuñirparisaj, chaymantataj kinsa p'unchaypi wajta sayarichisaj mana runaj ruwasqanta, nispa.

⁵⁹ Chaywanpis paykunaj tumpasqankoqa manallataj uj rejchu karqa.

⁶⁰ Chaypacha kuraj kaj sacerdoteqa tukuypa ñawpaqenpi sayarispa, Jesusta taporqa: Manachu imatapis kutichikunki? Imamanta kaykuna ch'ataykushasunkuri? nispa.

⁶¹ Jesustajrí ch'inlla karqa, mana imata kutichispa. Watejmanta kuraj kaj sacerdoteqa Jesusta tapullarqataj: Qanchu Diospa kachamusqan Cristo kanki, jatunchasqa Diospa Churin? nispa.

⁶² Jesustaj kuticherqa: Arí, noqa kani, qankunataj Runaj Churinta rikunkichej, Tukuy Atiyniyoj Diospa pañanpi tiyashajta, jinallataj phuyu patapi janaj pachamanta jamushajta ima, nispa.

⁶³ Chayta uyariytawankama, kuraj kaj sacerdoteqa patanchana p'achanta llik'irakuspa, nerqa: Imapajñataj testigokunata munanchejri?

⁶⁴ Qankuna uyarinkichejña imaynatachus kay runaqa Diospa contranpi mana allin kajta rimasqanta. Kunanqa, ima ninkichejtaj? nispa. Tukuyninkutaj Jesús juchayojpuni kasqanta nispa qhaparerqanku. Chantá, Jesusta wañuchisqa kananpaj juchacharqanku.

⁶⁵ Chaymantataj wakinkuna Jesusman thoqaykuyta qallarerqanku, ñawinta qhataykuspataj sajmarqanku, nerqankutaj: Sut'inchawayku pichus sajmasusqanta, nispa. Templota qhawaj soldadokunapis Jesusta uyanpi laq'arqanku.

Pedroqa Jesusta mana rejsejman tukun

⁶⁶ Chaykama Pedro ukhu patiopi kashajtin, kuraj kaj sacerdotej ujnin sipas kamachin chayamorqa.

⁶⁷ Jinapi Pedrota nina qayllapi q'oñikushajta rikorqa, payta qhawariytawantaj, nerqa: Qanpis Nazaretmanta Jesuswan purej kanki, nispa.

⁶⁸ Pedrotajrí nerqa: Mana jinachu. Mana payta rejsinichu, nitaj yachanichu imamantachus parlashasqaykita, nispa. Chantá jawa punkunejman llojserqa. Jinallaman gallo waqarqa.

⁶⁹ Chay sipas kamachirí Pedrota ujtawan rikuspa, chaypi kajkunata nerqa: Kay runaqa Jesusta qhatejkunaj masin, nispa.

⁷⁰ Pedrotajrí ujtawan nerqa: Mana jinachu, nispa. Uj chhikanmantawan chaypi kajkunañataj Pedrota uyancharqanku: Qan paykunamantapuni kanki, imaraykuchus qanpis Galileallamantataj kanki, nispa.

⁷¹ Jinapi Pedroqa tiluspa nerqa: Dios jasut'iwachun llullakushanichus chayqa. Pimantachus parlashankichej, chay runataqa manapuni rejsinichu, nispa.

⁷² Chantá ujtawan gallo waqallarqataj, Pedrotaj chayta uyarispa, Jesuspa kay nisqanmanta yuyarikorqa: Manaraj iskay kutita gallo waqashajtin, qanqa kinsa kutikama ninki mana rejsiwasqaykita, nispa. Chayta yuyarikuspataj, Pedro sonqo nanayta waqarqa.