Marcos 13 - DIOSPA QHELQACHISQ

Jesús sut'inchan Templo thuñisqa kananmanta

¹ Jesús Templomanta llojsimushajtin, ujnin yachachisqan payta nerqa: Yachachej Wiraqochíy, qhawariy, kay chhikachachaj ch'eqosqa rumikunata, kay chhika jatuchaj wasikunatapis, nispa.

² Jinapi Jesús kuticherqa: Kay jatuchaj wasikunata rikunkichu? Aswan qhepanejmanrí mana uj rumillapis rumi patapi qhepakonqachu, manachayqa tukuynin thuñisqa kanqa, nispa.

Manaraj kay pacha tukukushajtin imachus kanqa

³ Jesuswan, yachachisqankunawan ima Templomanta chimpaman Olivos sutiyoj orqoman rerqanku. Chantá Jesús chaypi tiyakushajtin, Pedrowan, Santiagowan, Juanwan, Andreswan imalla taporqanku:

⁴ Willawayku ari, mayk'ajtaj chay nisqayki kanqari? Ima t'ukuna señaltaj kanqa, chay tukuy nisqayki junt'akunanpajri? nispa.

⁵ Chantá Jesús paykunaman kuticherqa: Allinta qhawakuychej, pajtataj pipis q'otiyasunkichejman.

⁶ Chayta niykichej, imaraykuchus sutiypi ashkha jamuspa, nenqanku: Noqaqa Diospa kachamusqan Cristo kani, nispa. Ajinamantataj paykuna ashkha runata pantachenqanku.

⁷ Maypachachus qankuna kaynejpi jaqaynejpi wañuchinakunamanta, maqanakumanta ima parlajta uyarinkichej chayrí, ama mancharikuychejchu. Chay tukuy ima kananpuni tiyan. Chaywanpis manaraj kay pachaj tukukuyninchu kanqa.

⁸ Uj suyoqa waj suyoj contranta oqharikonqa, uj kamachejtaj waj kamachejpa contranta. Jinallataj tukuynejpi jallp'a ikhakuykuna kanqa, yarqhaykuna ima. Chaywanpis chay tukoyqa paqarichikoj warmej nanayninpa qallariynin jinalla kanqa.

⁹ Chayrayku qankuna sumajta qhawakuychej, imaraykuchus awqaykichejkunaqa qankunata jap'ichispa, llajtapi kurajkunaman jaywasonqachej, tantakuna wasikunapitaj jasut'isonqachej. Noqaraykutaj kamachejkunaman, kuraj kamachejkunaman ima qhatatisonqachej. Qankunarí, paykunaj ñawpaqenkupi testigo jina noqamanta parlankichej.

¹⁰ Noqamanta sumaj willayqa ñawpajta tukuy imaymana runaman willasqa kanan tiyan, manaraj kay pacha tukukushajtin.

¹¹ Maypachachus atiyniyoj kamachejkunaman apasonqachej chaypacha, ama llakikuychejchu imatachus ninaykichejmantaqa. Aswanpis, imatachus Dios yuyaychasonqachej, chayllata parlaychej, imaraykuchus manamin qankunachu parlankichej, manachayqa Santo Espiritumin qankunanejta parlanqa.

¹² Uj ayllupi runaqa wawqenta wañuchinankupaj jap'ichenqa. Tatapis wawanta jap'ichillanqataj. Wawakunapis tatankoj, mamankoj contranta oqharikuspa, paykunata kamachejkunawan wañuchichenqanku.

¹³ Kay pachapi tukuy runakuna noqarayku chejnisonqachej. Chaywanpis qankunamanta pichus tukukuykama sinch'ita sayaj, chay runata Dios qhespichenqa.

¹⁴ Pichus kayta ñawirejqa sut'ita yachachun. Maypachachus rikunkichej chay chejnina millay millachikunata mana kananpi sayashajta chaypacha, Judeapi kajkuna orqokunaman ayqechunku.

¹⁵ Chay p'unchaypi pipis wasi alto patapi kashaspaqa, ama urayk'amuchunchu wasinmanta imatapis orqhoj.

¹⁶ Chajrapi kajpis nillataj wasinman kutirimuchunchu p'achanta apakunanpaj.

¹⁷ Ay, chay p'unchaypi wijsayoj warmikunamanta, ñuñoj wawayoj warmikunamantapis.

¹⁸ Diosmanta mañakuychej, chay ayqenaykichej ama chiri tiempopi kananpaj,

¹⁹ imaraykuchus chay p'unchaykunapeqa manchay llakiykuna kanqa. Chay jina llakeyqa mana jayk'ajpis rikukorqachu, Dios kay pachata ruwasqanmantapacha kunankama, nillataj qhepamanpis kanqachu.

²⁰ Manachus Tukuyta Kamachej Dios chay p'unchaykunata pisiyachinman chayqa, mana pipis qhespichisqachu kanman. Aswanpis, payqa ajllakusqankunata munakusqanrayku chay p'unchaykunata pisiyachenqa.

²¹ Chaypachachus pipis nisunkichejman: Qhawaychej, kaypi Diospa kachamusqan Cristo kashan, nispa. Chayrí: Jaqaypi Cristo kashan, nispa chayqa, amapuni nisqankuta jap'ikunkichejchu.

²² Ajinamanta llulla cristokuna, mana cheqanta sut'inchajkuna ima rikhurimonqanku. Paykunataj runaj mana jayk'aj rikusqan t'ukunata, waj t'ukuna imakunata ima ruwaspa, runata pantachenqanku. Atispaqa, Diospa ajllakusqankunatapis pantachinkuman.

²³ Qankunarí allinta qhawakuychej, imaraykuchus kay tukuyta ñawpajtaña willashaykichej, nispa. Ajinata Jesús yachachisqankunata nerqa.

Runaj Churinpa kutimuynin

²⁴ Chantá Jesús nillarqapuni: Chaymanta, chay ñak'ariy p'unchaykunaj qhepanta inti laqhayaykonqa, killapis manaña k'anchanqachu.

²⁵ Ch'askakunapis urmaranqanku, janaj pacha atiykunapis kharkatitenqanku.

²⁶ Chaypacha Runaj Churinta phuyupi jamushajta rikonqanku, jatun atiywan, jatun kayninpa lliphipiyninwan ima.

²⁷ Chantá pay angelninkunata kachamonqa Diospa ajllakusqankunata kay pachaj tawantin cheqamanta tantanankupaj, kay pachaj ujnin k'uchunmantapacha janajpa ujnin kantunkama, nispa.

Higo sach'amanta rijch'anachina

²⁸ Jesús nillarqataj: Higo sach'a rijch'anachinamanta yachaychej. Maypachachus higo sach'aj k'allmankuna wawayarin, laqhenkunataj ijirimun chaypacha, qankuna q'oñi tiempo qayllapiña kasqanta yachankichej.

²⁹ Ajinallatataj qankunapis kay tukuy ima rikhurimojtenqa, Runaj Churenqa ñapis punkupiña kasqanta yachankichej.

³⁰ Kayta sut'ita niykichej: Manaraj mita masiykichej tukukushajtinku, kay tukuy ima junt'akunan tiyan.

³¹ Janajpis, kay pachapis tukukaponqanku. Chaywanpis nisqayqa mana jayk'ajpis pasanqachu, manachayqa junt'akonqapuni.

³² Runaj Churinpa jamunan p'unchay, chayrí chay phani mayk'ajchus kananmantaqa mana pipis yachanchu, ni janaj pachapi angelkunapis, nitaj Churipis. Tata Dioslla chaymantaqa yachan.

³³ Chayrayku qankunaqa wakichisqa kaychej, rijch'arisqataj. Allinta qhawarikuspa puriychej, imaraykuchus mana yachankichejchu mayk'ajchus chay p'unchay chayamunanta.

³⁴ Chayqa karu llajtaman ripoj runaman rijch'akun. Wasinta saqenanpaj, pay sapa kamachinman imachus ruwanankuta saqesqa. Punkuta qhawajtapis kutimunankama allinta qhawananta kamachisqa.

³⁵ Qankunapis ama puñuspa, wakichisqallataj kaychej, imaraykuchus mana yachankichejchu mayk'ajchus wasiyoj chayamunanta, ch'isiyaykuytachus, chayrí chawpi tutatachus, chayrí gallo waqaytachus, manachayrí sut'iyaytachus.

³⁶ Pajtataj wasiyoj mana willaspalla chayarparimuspa, puñushajta taripasunkichejman.

³⁷ Chayrayku imatachus qankunaman niykichej, chayllatataj tukuy runatapis nini: Ama puñuspa, wakichisqapuni kaychej, nispa. Ajinata Jesús nerqa.