Marcos 11 - DIOSPA QHELQACHISQ

Jesús Jerusalén llajtaman yaykun

¹ Jesuswan, yachachisqankunawan ima Jerusalén llajtaman qayllashaspa, Betfagué, Betania llajtaman ima chayarqanku, Olivos sutiyoj orqo chimpanejman. Chaymantataj Jesusqa iskay yachachisqankunata kachaspa, nerqa:

² Jaqay chimpa ranchoman riychej, chayman yaykuspataj, maltón burrota watasqata tarinkichej. Chay burromanqa manaraj pipis lloq'anchu. Qankunataj phaskaraspa, kayman aysamuychej.

³ Sichus pipis tapusunkichej: Imapajtaj chay burrota phaskarashankichej? nispa, chayqa, qankuna kutichiychej: Wiraqochiyku Jesús kay burrota munan, chaymantataj kutichimpusonqapacha, nispa.

⁴ Chantá chay iskay yachachisqakunaqa ranchoman rispa, maltón burrota ñan patapi tarerqanku wasi punkupi watasqata, chantá phaskararqanku.

⁵ Chaypi kajkunamantarí wakin taporqanku: Imapajtaj chay burrota phaskarashankichej? nispa.

⁶ Yachachisqakunataj Jesuspa kamachisqanman jina kuticherqanku, chay runakunataj apajta saqellarqanku.

⁷ Jinapi burrota Jesusman aysaytawan qhatanankuwan caronaykorqanku. Chantá Jesús burroman lloq'aykorqa Jerusalenman yaykunanpaj.

⁸ Ashkha runa qhatananku p'achakunata ñanman mast'ararqanku Jesuspa ñawpaqenman. Wajkunataj sach'akunamanta thansata k'uturaspa, mast'allata ñanman churallarqankutaj.

⁹ Jinaspataj, Jesuspa ñawpaqenta rejkuna, qhepanta jamojkuna ima qhaparerqanku: Diosta jatunchaychej ari. Tukuyta Kamachej Diospa sutinpi jamojta jatunchaychej.

¹⁰ Dios saminchachun ñawpa tatanchej Davidpa jamoj kamachiyninta. Janaj pachapipis qhespichej Dios jatunchasqa kachun, nispa.

¹¹ Chantá Jesús Jerusalenman chayaspa, Temploj pationman yaykorqa. Muyuyninpi tukuy imata qhawaspataj, chunka iskayniyoj yachachisqankunawan Betaniaman kutirerqa, imaraykuchus inti yaykusharqaña.

Jesús higo sach'ata maldicin

¹² Q'ayantin Betaniamanta llojsimushajtinku, Jesús yarqhachikorqa.

¹³ Karumantataj uj higo sach'ata rikorqa q'omer laqheyojta. Poqoyta tariyta munaspataj, higo sach'aman qayllaykorqa. Chaywanpis mana poqoyta tarerqachu, manachayqa laqhellata, imaraykuchus manaraj higo poqona tiempochu karqa.

¹⁴ Chantá Jesús higo sach'ata nerqa: Qanmantaqa amaña pipis poqoyta mikhuchunchu, nispa. Yachachisqankunataj chay nisqanta uyarerqanku.

Jesús qhatojkunata Templomanta qharqon

¹⁵ Chaymantaqa Jerusalenman chayamorqanku. Chantá Jesús Temploj pationman yaykuspa rantejkunata, vendejkunatawan ima jawaman qharqoyta qallarerqa. Qolqe chhalajkunaj mesankunata tijrararqa, jinallataj urpikunata qhatojkunaj tiyanankutapis.

¹⁶ Manataj pitapis Temploj pationnejta imallatapis apaykachajta saqerqachu.

¹⁷ Chantá Jesusqa runakunaman yachacherqa: Manachu Diospa Qhelqachisqanpi nin: Waseyqa noqawan parlarikuna wasimin, nispa? Chaywanpis qankunaqa suwa thapaman tukuchisqankichej, nispa.

¹⁸ Chantá kuraj sacerdotekuna, Diospa kamachisqanmanta yachachejkuna ima Jesús imatachus ruwasqanmanta uyarispa, imaynamantapis payta wañuchinankuta mask'arqanku. Chaywanpis Jesusta manchachikorqanku, imaraykuchus tukuy runakuna yachachisqanta uyarispa, t'ukoj kanku.

¹⁹ Ch'isiyaykuytataj Jesús, yachachisqankunawan ima Jerusalén llajtamanta llojserqanku.

Maldicisqa sach'a ch'akipun

²⁰ Q'ayantenqa tutamanta Jesuswan, yachachisqankunawan ima ñanta rishaspa, chay maldicisqa higo sach'ata saphinmantapacha ch'akipusqanta rikorqanku.

²¹ Pedrotaj Jesuspa nisqanta yuyarikuspa, nerqa: Yachachej Wiraqochíy, qhawariy, maldicisqayki higo sach'a ch'akipusqa, nispa.

²² Chantá Jesús kuticherqa: Diospi tukuy sonqo atinikuychej.

²³ Kayta sut'ita niykichej: Sichus pipis kay orqota ninman: Jatariy, mama qochaman wijch'uykukuy, nispa, sonqonpitaj mana iskayrayaspa Diospi atinikun chayqa, paypa nisqan ruwasqa kanqa.

²⁴ Chayrayku noqa niykichej: Diosmanta imatapis mañakuspaqa, jap'inaykichejtapuni creeychej, jap'inkichejtaj.

²⁵ Chaywanpis Diosmanta mañakushaspa, sichus pillawanpis phiñanasqa kawajchej chayqa, contraykipi juchallisqanta ñawpajta pampachaychej. Ajinamanta, janaj pachapi kaj Tataykichejpis contranpi juchallisqaykichejta pampachallanqataj.

²⁶ Manachus qankuna runa masiykichej contraykichejta juchallisqankuta pampachawajchej chayqa, nillataj janaj pachapi kaj Tataykichejpis contranpi juchallisqaykichejta pampachanqachu, nispa.

Jesusta atiyninmanta tapunku

²⁷ Chantá Jesuswan, yachachisqankunawan ima Jerusalenman kutirerqanku. Chaypeqa Jesús Temploj pationpi purishajtin, kuraj sacerdotekuna, Diospa kamachisqanmanta yachachejkuna, kurajkuna ima payman chimpamorqanku.

²⁸ Paykunataj Jesusta taporqanku: Ima atiywantaj kay tukuy imata ruwankiri? Pitaj atiyta qosorqa kayta ruwanaykipajri? nispa.

²⁹ Jesustaj paykunaman kuticherqa: Noqapis ujta tapullasqaykichejtaj. Sichus chayman kutichiwankichej chayqa, noqapis willallasqaykichejtaj ima atiywanchus kay imakunata ruwasqayta.

³⁰ Niwaychej: Pitaj Juanman bautizananpaj atiyta qorqa: Janaj pachapi kaj Dioschu, chayrí runallachu? nispa.

³¹ Chantá paykunapura ninakorqanku: Janaj pachapi kaj Dios atiyta qorqa nisun chayqa, pay niwasun: Imaraykutaj chantá mana paypa nisqanta jap'ikorqankichejchuri? nispa.

³² Manallataj nisunmanchu runakunalla Juanman atiyta qorqanku, nispa. Paykuna mana chayta niyta munarqankuchu, imaraykuchus runakunata manchachikorqanku. Tukuy runataj yuyaj kanku Juan Diosmanta sut'inchajpuni kasqanta.

³³ Chayrayku Jesusman kuticherqanku: Mana yachaykuchu, nispa. Chaymantataj Jesús paykunata nerqa: Noqapis manallataj nisqaykichejchu pichus atiyta qowasqanta kay imakunata ruwanaypaj, nispa.