Marcos 1 - DIOSPA QHELQACHISQ

Bautizaj Juan sumaj willayta willaran

¹ Kayqa Diospa Churin Jesusmanta sumaj willay, pichus Cristo karqa, chaymanta.

² Chay karqa Diosmanta ñawpa sut'inchaj Isaiaspa qhelqasqanpi Dios imaynatachus nisqanman jina: Noqa willajniyta ñawpaqeykita kachamushani, ñanta wakichipusunanpaj.

³ Ch'innejpi uj runaj qhaparisqan uyarikun: Tata Diospaj ñanta pichaychej, purinantataj cheqanyachiychej, nispa.

⁴ Ajinaqa Bautizaj Juan ch'innejpi rikhurispa, tukuy runata nerqa bautizachikunankuta, ajinamanta yachayta qospa Diosman kutirikusqankumanta juchanku pampachasqa kananpaj.

⁵ Jinapi ashkha runakuna tukuy Judea jap'iymanta, Jerusalén llajtamanta ima Juanta uyarej jamorqanku. Paykunataj juchankuta rimarispa, Jordán mayupi Juanwan bautizachikorqanku.

⁶ Juanqa camelloj millmanmanta ruwasqa p'achawan p'achallisqa karqa, qara chumpiwantaj chumpisqa. Paytaj phinki phinkikunata, lachiwana misk'itawan ima mikhoj.

⁷ Chantá runakunaman kay jinata willarqa: Qhepayta wajtaj jamushan, noqamanta aswan atiyniyoj. Noqataj mana paypa wata runan kanaypaj jinallapischu kani.

⁸ Noqaqa qankunata yakuwan bautizaykichej. Paytajrí Santo Espirituwan bautizasonqachej, nispa.

Jesusqa Juanwan bautizachikun

⁹ Chaypachallataj Jesusqa Galileapi kaj Nazaret llajtamanta jamorqa, jinataj Juanwan Jordán mayupi bautizachikorqa.

¹⁰ Jinallapi Jesús yakumanta llojsimushaspa, janajta kicharikushajta rikorqa, Santo Espiritutataj urpi jina, paypa patanman urayk'amushajta.

¹¹ Janaj pachamantataj Dios nimorqa: Qanmin munasqa Churiy kanki, qanwantaj sonqo junt'asqa kani, nispa.

Kuraj Supayqa Jesusta juchallichiyta munan

¹² Chay ratopacha Santo Espiritoqa Jesusta ch'innejman pusarqa.

¹³ Jesustaj chaypi tawa chunka p'unchayta kasharqa k'ita phiña animalkunawan khuska. Chantá Supay Satanás jamuspa, juchallichiyta munarqa. Angelkunataj jamuspa, Jesusta yanaparqanku.

Jesusqa Galilea jap'iypi sumaj willayta willaran

¹⁴ Chay qhepata, Juanta carcelman wisq'achisqankumantaña, Jesús Galilea jap'iyman rerqa, chaypitaj Diosmanta kay sumaj willayta willarqa:

¹⁵ Diospa nisqan p'unchay junt'akunña, paytaj kamachinanpaj wakichisqaña kashan. Chayrayku juchaykichejmanta Diosman kutirikuychej, Diosmanta kay sumaj willaytataj jap'ikuychej, nispa.

Jesús tawa challwirikunata wajyan

¹⁶ Uj p'unchay Jesusqa Galilea qocha kantunta purishaspa, Simonta rikorqa, wawqen Andrestawan ima. Paykunaqa qochaman challwa jap'ina ch'ipata wijch'uykusharqanku challwakunata jap'inankupaj, imaraykuchus challwiri karqanku.

¹⁷ Jesustaj paykunata nerqa: Jaku noqawan khuska rinachej. Chantá challwata jap'inaykichejtaqa, noqa runakuna qhatinawankupaj mask'ayta yachachisqaykichej, nispa.

¹⁸ Paykunataj chay kikinpi challwa jap'ina ch'ipankuta saqerparispa, Jesuswan riporqanku.

¹⁹ Tumpatawan chaymanta karunchakuspa, Jesús Zebedeoj churinkunatañataj rikorqa. Bote ukhupi kasharqanku Santiago, wawqen Juan ima, paykunataj challwa jap'inanku ch'ipakunata t'irisharqanku.

²⁰ Rikuytawankama, Jesús paykunatapis yachachisqankuna kanankupaj wajyallarqataj. Paykunataj tatanku Zebedeota, yanapajkunatawan botepi saqespa, Jesuswan riporqanku.

Jesusqa supayta runamanta qharqon

²¹ Chaymantá Jesuswan, yachachisqankunawan ima Cafarnaún llajtaman chayarqanku. Jesustaj samarina p'unchaypi tantakunanku wasiman yaykuspa, Diosmanta yachachiyta qallarerqa.

²² Chay runakunataj yachachisqanta uyarispa, t'ukorqanku, imaraykuchus Jesusqa kasuchikunapaj jina yachacherqa, manataj Diospa kamachisqanmanta yachachejkuna jinachu.

²³ Chaypacha chay tantakuna wasipi supayniyoj uj runa kasharqa. Ujllata qhaparispataj, pay nerqa:

²⁴ Nazaretmanta Jesús, ima nispa noqaykuwan jap'inakoj jamunkiri? Noqaykuta tukuchejchu jamunki? Noqa yachani pichus kasqaykita. Qanqa Diospa May Llimphu Kaj Ajllakusqan kanki, nispa.

²⁵ Jesustajrí chay supayta k'amerqa: Ch'in kay, kay runamantataj llojsiy, nispa.

²⁶ Chay supayqa runata sinch'ita thalaytawan, jatunmanta qhaparispa, chay runamanta llojserqa.

²⁷ Runakunataj mayta t'ukuspa, purajmanta tapunakusharqanku: Imataj kayri? Ima mosoj yachachiytajri? Kay jina atiyniyojpuni kananri? Pay kamachejtin, millay supaykunapis payta kasunku, nispa.

²⁸ Ajinamanta, tukuynejpi Jesusmanta uyarikorqapacha. Tukuy Galileaj muyuynintinpitaj imatachus ruwasqanmanta yacharqanku.

Jesús Pedroj suegranta qhaliyachin

²⁹ Chay tantakuna wasimanta llojsispa, Jesusqa Santiagowan, Juanwan ima Simonpa, Andrespa wasinkuman rerqanku.

³⁰ Chaypacha Simonpa suegranqa k'aja onqoywan puñunanpi kasharqa, chaypi kajkunataj chay warmi onqosqa kasqanta Jesusman willarqanku.

³¹ Chantá Jesús payman qayllaykorqa, makinmanta aysarispataj jataricherqa. Chay ratopachataj chay warmeqa k'aja onqoyninmanta qhaliyaporqa, sayariytawantaj, mikhunata wayk'orqa mikhunankupaj.

Jesús ashkha onqosqakunata qhaliyachin

³² Inti yaykuyta, ña ch'isiyaykuytaña, ashkha onqosqakunata Jesusman pusamorqanku, supayniyoj runakunatawan.

³³ Tukuy llajtamanta runakunataj wasi punkuman tantakamorqanku.

³⁴ Chantá Jesús ashkha runata tukuy imaymana onqoymanta qhaliyacherqa. Jinallataj ashkha runamanta supaykunata qharqorqa, nitaj supaykunata parlajta saqerqachu, imaraykuchus paykuna pichus Jesús kasqanta yacharqanku.

Jesús Galileapi Diosmanta willaran

³⁵ Q'ayantenqa Jesús tutamanta jatarerqa. Allin chhapullaraj kashajtin, wasimanta llojsispa, ch'innejman rerqa, chaypitaj Dioswan parlarikorqa.

³⁶ Jinapi Simón, paywan khuska kajkuna ima Jesusta mask'amorqanku.

³⁷ Tarispataj, nerqanku: Tukuy mask'ashasunku, nispa.

³⁸ Jesustajrí paykunaman kuticherqa: Jaku kay qaylla llajtakunaman. Chaypipis Diosmanta sumaj willayta willanay tiyan, imaraykuchus chaypajmin jamuni, nispa.

³⁹ Ajinata Jesús tukuy Galilea jap'iypi purerqa, chaypi kaj tantakuna wasikunapitaj Diosmanta yachacherqa. Supaykunatapis runakunamanta qharqollarqataj.

Jesús llejti onqoyniyojta qhaliyachin

⁴⁰ Uj kuti Jesusman jamorqa llejti onqoyniyoj uj runa. Ñawpaqenpi qonqorikuspataj, Jesusmanta mañakorqa: Munankichus chayqa, onqoyniymanta qhaliyachiwayta atinki, nispa.

⁴¹ Jesustaj paymanta khuyakuspa, makinwan llankhaykorqa, nerqataj: Arí, munani, llimphuchasqaña kanki, nispa.

⁴² Jesús chayta nisqantawan, chay runaqa llejti onqoyninmanta qhaliyachisqa karqa, chantá Diospa ñawpaqenpi llimphuchasqa ima.

⁴³ Chaymantataj Jesús chay runata kachapuspa, mayta kamacherqa:

⁴⁴ Allinta uyariway: Ama pimanpis kay ruwasqayta willankichu. Manachayqa cheqanta rispa, sacerdotewan qhawachikamuy. Moisés kamachisqanman jinataj jaywanaykita qomuy ajinamanta runakuna yachanankupaj onqoyniykimanta llimphuchasqaña kasqaykita, nispa.

⁴⁵ Chay runatajrí rispa, tukuyman imaynatachus Jesús chay onqoyninmanta qhaliyachisqanta willamorqa. Chayrayku Jesusqa pakayllamantaña llajtakunamanpis yaykoj, jinataj ch'in cheqakunallapiña qhepakoj. Chaywanpis ashkha runakuna tukuynejmanta Jesusman jamullajpuni kanku.