Lamentaciones 5 - DIOSPA QHELQACHISQ

Llakiypi rikhurejkuna Diosmanta mañakunku

¹ Tata Dios, kay jina mana allin qhatiriwasqaykumanta yuyarikuy ari. Imaynatachus k'umuykachachiwasqaykuta rikuy ari.

² Tukuy jallp'aykuta waj llajtayojkuna jap'ikapunku. Wasiykupis waj runakunaj makinkuman chayan.

³ Mana tatayoj wajcha wawakuna jina rikhuriyku, mamaykukunapis warmisapa jina qhepakunku.

⁴ Yakuykutapis qolqewan rantikuyku, llant'aykutapis qolqellawantaj rantikuyku.

⁵ Awqaykoqa qhatiykachawayku. Sinch'i sayk'usqaña kayku, manataj samarikojta saqewaykuchu.

⁶ Mikhunata mask'aspa Egipto llajtayojkunaman, asiriokunaman ima k'umuykorqayku.

⁷ Tatayku mamayku juchallikorqanku, wañuraporqankutaj. Juchallisqankurayku jasut'itajrí noqaykuman chayamuwayku.

⁸ Wata runakunaj makinpi kayku. Ni pipis kanchu chaykunaj makinkumanta kacharichinawaykupajqa.

⁹ Mana wañuyta manchachikuspa mikhunata mask'ayku, ch'innejpi wañuchejkunamanta llusp'ispa.

¹⁰ Aycha qaraykoqa horno jina k'ajarin, yarqhaywan ch'ayñarayasqaykurayku.

¹¹ Sión llajtapi awqakunaqa warmiykuta alqochaspa, honrankuta t'akarqanku. Judá jap'iypitaj sipasniykoj honrankutapis t'akallarqankutaj.

¹² Awqakunaqa kurajkunata makinkumanta warkhuykorqanku. Machu runakunatapis mana jatunpaj qhawarqankuchu.

¹³ Aswan kallpayoj runakunata molinopi kutanankupaj churarqanku. Waynakunataj llant'a q'epiwan atiykuchikorqanku.

¹⁴ Punkupi tiyakoj machu runakuna manaña kankuchu. Waynakunaj takisqankupis manaña uyarikunchu.

¹⁵ Sonqoykupi kusikuypis manaña kanchu, tusuyniykupis llakiyman tukupun.

¹⁶ Maypaj qhawasqa kayniykupis manaña kanchu. Ay, noqaykumanta imachus kanqapis, imaraykuchus noqaykoqa juchallikorqayku.

¹⁷ Chayrayku sonqoykupi manchay llakiy tiyan, jinataj ñawiykupis chharpuyaykuwayku.

¹⁸ Sión orqoqa ch'inpacha raqaylla kashan, atojkunallaña kayman jaqayman purishanku.

¹⁹ Qantajrí, Tata Dios, wiñaypaj kuraj kamachej kanki. Kamachinaykeqa wiñay wiñaypaj kanqa.

²⁰ Imaraykutaj chay jinatapuni qonqakapuwaykuri? Imaraykutaj chay chhika unaytaña saqerpariwaykuri?

²¹ Wajyakapuwayku ari, Tata Dios, noqaykutaj qanman kutirimpusqayku. Imayna ñawpajta kawsayniyku karqa, ajinallataj kunanpis kachun ari.

²² Qanqa qhesachasqatachu qhesachawayku? Qanqa anchatañapunitaj noqaykupaj phiñakunki ari.