Lamentaciones 4 - DIOSPA QHELQACHISQ

Jerusalén llajtata waj llajtayojkuna jap'inku

¹ Qoreqa mayta yanayaykorqa. Qorej lliphipiyninpis manaña k'ancharinchu. Temploj perqankunamanta rumikunapis kaynejpi jaqaynejpi wijch'urasqa kashan.

² Sión llajtapi tiyakojkunaqa maypaj qhawasqa kaj kanku, sumaj kaj qorimantapis aswan munasqa. Kunantajrí manka llut'aj ruwasqan t'uru manka jinalla qhawasqa kanku.

³ K'ita alqokunapis uñankuman ñuñuchinku. Llajtaypa runankunarí ancha millay sajra kanku, imaynatachus ch'in pampapi suri irpanta mana khuyarinchu, ajina.

⁴ Ñuñoj wawakunaj qallunkoqa yaku ch'akiymanta siminkuman k'askaykapullanña. Wawakuna t'antata mañakojtinku, mana pipis t'antata qorej kanchu.

⁵ Ñawpa tiempopi sumajta mikhojkunaqa kunan yarqhaywan wañunku. Qhapaj kawsaypi wiñajkunaqa q'opa wijch'unapi kawsashanku.

⁶ Suyuypa jatun llajtaj millayta ruwasqanqa Sodomaj juchanmanta nisqaqa astawan jatunraj. Sodoma llajtataj ujllapi chinkachisqa karqa, mana runaj imanasqallan.

⁷ Ajllasqa runankunaqa rit'i jina yuraj karqanku, lechemantapis astawan karqanku. Ukhunkoqa coral nisqamantapis astawan puka karqa, uyankutaj zafiro sutiyoj rumi jina k'achitu karqa.

⁸ Kunantaj uyanku yana oqepacha kashan, ñanpi mana rejsiy atina. Aycha qarankupis tullunkuman k'askaykusqallaña kashan, ch'aki k'aspi jina.

⁹ Espadawan ujllapi wañuchisqa kajkunaqa aswan allin wañuyta rikunku, yarqhaywan ch'ayñaspa wañojkunamanta nisqaqa, imaraykuchus mikhuna mana kasqanrayku, paykunaqa pisimanta pisi wañushanku.

¹⁰ Suyuypa jatun llajtan thuñisqa kashajtin, chaypacha k'acha khuyakuyniyoj warmikuna wawankuta wayk'uykakaporqanku. Kikin wawankullatataj mikhuykakaporqanku.

¹¹ Tata Dios may jatun k'araj phiñakuyninta kachaykamuspa, phiñakuyninta thasnukorqa. Sión llajtaman ninata jap'iykucherqa, cimientonmantapachataj ushphaman tukucherqa.

¹² Kay pachapi kuraj kamachejkuna, tukuy kay pachapi tiyakojkuna ima manapuni jayk'ajpis yuyarqankuchu, awqankuna Jerusalén llajtaj punkunta yaykuykunankutaqa.

¹³ Chay jina jasut'i Diosmanta sut'inchajkuna juchallikusqankurayku karqa, sacerdotekuna millay juchata ruwasqankurayku ima. Paykunaqa chay llajtapi mana juchayoj runakunata wañucherqanku.

¹⁴ Paykunaqa tukuy ñankunata ñawsakuna jina chankaykacharqanku. P'achankupis yawar pukalla kasqanrayku, mana pipis llankhariyta munarqachu.

¹⁵ Paykunataqa runakuna qhaparinku: Ithiriychej, amataj llojchiwaykuchu, imaraykuchus mana llimphupaj qhawasqa kankichej, nispa. Waj suyukunamanta runakunapis ninku: Paykunaqa qhella puriskiri kanku. Manaña jayk'ajpis kaypeqa ujtawan tiyakonqankuñachu, nispa.

¹⁶ Tata Diospuni paykunata tukuynejman ch'eqeracherqa, manañataj paykunata qhawarerqachu. Runakunaqa sacerdotekunata manaña jatunpaj qhawankuchu, nitaj machu runakunatapis khuyankuchu.

¹⁷ Yanapanawaykuta suyaspa qhawasqaykupi ñawiykupis chharpuyawaykuña. Chaywanpis suyashayku mana pitapis kacharichiyta atej suyu yanapanawaykuta.

¹⁸ Purisqaykupis qhawasqalla karqa. Chaynejta jawamanpis mana llojsiyta aterqaykuchu. Wañoyqa patallaykupiña karqa. Chay phani chayamunña, tukukunayku p'unchayqa kayllapiña kashan.

¹⁹ Qhatiykachawajniykoqa ankamantapis aswan sinch'i phawajkuna kanku. Tukuy orqokunapi qhatiykachawayku, jap'inawaykupajtaj tukuy ch'innejpi suyaykuwayku tojllata churaspa.

²⁰ Tata Diospa ajllakusqan kuraj kamachej, pichus noqaykuta kallpachawajniyku preso urman, pimantachus noqayku nej kayku: Tukuy suyoj chawpinkupi paypa llanthullanpi kawsasunchej, nispa, chay.

²¹ Uz suyupi tiyakoj Edom, kunanqa kusikuy ari. Chaywanpis aswan qhepaman qanmanpis chay jaya ujyana chayamullasonqataj. Chaywan qanqa machasqa, mana p'achayoj q'alalla rikhurinki.

²² Sión llajta, jasut'isqa kanayki junt'akun. Manaña jayk'ajpis ujtawan pay apachisonqachu. Chaywanpis, qan Edom suyu, jasut'isqapuni kanki, imaraykuchus Tata Diosqa juchaykita sut'iman orqhonqa.