Lamentaciones 3 - DIOSPA QHELQACHISQ

Llakiypi rikhurejpa takiynin

¹ Noqamin kani, pitachus Dios k'araj phiñakuyninpi jasut'in, chay.

² Payqa mana k'anchayniyoj laqha ñankunata pusaykachawarqa, purichiwarqataj.

³ Jinallataj tuta p'unchay noqata kutin kutinta makinwan jasut'iwarqa.

⁴ Payqa aychayta, qaraytapis machuyachin. Tulluykunatapis payllataj p'akiran.

⁵ Payqa llakiywan, ñak'ariywan ima perqawan jina muyuykuchiwan.

⁶ Laqhapi saqerpariwan unayña wañojkunata jina.

⁷ Ni mayninta llojsinaypaj jina kanchapi wisq'aykuwan, rakhu cadenawantaj wataykuwan.

⁸ Chhikata qhaparispa yanapanawanta mañakushajtiypis, mana kasuta ruwawanchu.

⁹ Ñanniytapis ch'eqosqa rumikunawan perqaykuspa, ñan purinaytapis wisq'aykuwan.

¹⁰ Tata Dios noqapajqa mithanawanpaj jukumari jina kashan, pakaymanta wateqaj león jinataj.

¹¹ Ñanniyta pantachiwan, mitharpariwantaj. Manchachikuywan kharkatishajta saqewan.

¹² Flechana arconta mat'iykun, aysaspataj flechanawanpaj sayaykuchiwan.

¹³ Tata Dios arconwan flechamuwasqanqa sonqoyman sat'iykukun.

¹⁴ Tukuy aylluy asipayawanku, sapa kutitaj paykunaj alqochakunan kani.

¹⁵ Tata Diosqa llakiykunawan junt'aykuchiwan, jaya ujyanawantaj machaykuchiwan.

¹⁶ Pampaman choqarpariswaspa, kiruytapis muchharawan, ushphapitaj qhoshpichiwan.

¹⁷ Sonqo tiyaykusqa kayqa noqamanta karunchakun, kusiy kawsaytapis manaña tarinichu.

¹⁸ Chantá nerqani: Kallpayqa tukukapun, jinallataj Diosllapi atinikuspa suyakunaypis, nispa.

¹⁹ Llakiyniyta, ñak'ariyniyta ima yuyarikuspaqa, may jaya jayaq'e jina kasqanta yuyarini.

²⁰ Chaykunata yuyarejtiytaj, mana kallpayoj rikhurini.

²¹ Chay tukuywanpis, sonqoypi kaymanta unancharisqayrayku sonqoypi suyakuyta kawsarichiwan:

²² Tata Diospa khuyakuynenqa mana jayk'ajpis tukukunchu, munakuyninpis mana tukukuyniyojchu.

²³ Sapa paqarin mosojyan. Tata Diosníy, nisqaykita junt'ajpuni kanki.

²⁴ Chayrayku tukuy sonqo nini: Tata Diosqa tukuy ima noqapajqa. Chayrayku payllapi atinikuspa suyakusaj.

²⁵ Tata Diosqa may k'acha pikunachus paypi atinikojkunapaj, pikunachus payllapi atinikuspa suyakojkunapaj.

²⁶ Tata Diospa yanapayninta ch'inllamanta suyanaqa may sumaj.

²⁷ Runapaj allinpuni wayna kasqanmantapacha kasukoj sonqo kananqa.

²⁸ Tata Dios imatapis kamachejtenqa, runaqa sapan ch'inlla kachun.

²⁹ Pampakama k'umuykuchun, imaraykuchus ichapis imata suyananraj kanmanraj.

³⁰ Pichus maqajman uj lado uyantawan rikuchichun, ajinamanta p'enqachisqa kasqan junt'akunanpaj.

³¹ Tata Dios mana wiñaypajchu saqerpariwasunchej.

³² Ñak'arichispapis khuyakullantaj, may chhikan khuyakuynin kasqanrayku.

³³ Payqa runata ñak'arichisqanmanta mana kusikunchu nillataj runatapis llakichiyta munanchu.

³⁴ Tata Dios mana walej ninchu, atiyniyojkuna carcelpi kajkunata mana khuyakuspa sarojtinku.

³⁵ Manallataj walej ninchu, Tata Dios qhawamushajtin, runata waqachejtinku.

³⁶ Tata Dios nillataj walej ninchu, pikunachus justiciata q'ewinku, chaykunata.

³⁷ Pitaj imapis kananta ninman, Tata Dios mana kamachejtinri?

³⁸ Tukuy mana allin kaj, tukuy allin kajpis, Tata Dios nisqanrayku jamun.

³⁹ Imamantataj runaqa quejakunman juchanmanta jasut'isqa kashaspari?

⁴⁰ Purisqanchejta allinta qhawarikunachej. Tata Diosta mask'aspa paymantaj kutirikunachej.

⁴¹ Janaj pachapi kashaj Diosninchejman tukuy sonqo makinchejta oqharispa, Diosmanta mañakuna:

⁴² Noqaykoqa qanpa contraykita oqharikorqayku, manataj kasukorqaykuchu. Qantaj mana juchaykuta pampacharqankichu.

⁴³ Qanqa k'araj phiñakuyniykiwan muyuykuwarqayku, qhatiykachawarqaykutaj. Qanqa mana khuyarikuspa, wañurachiwarqayku.

⁴⁴ Qanqa phuyuwan pakaykukunki, mañakususqaykuta mana uyarinawaykupaj.

⁴⁵ Tukuy runaj ñawpaqenpi millay p'enqaypi, millachikunapaj jinataj rikhurichiwayku.

⁴⁶ Tukuy awqayku noqaykoj contrallaykutapuni parlanku.

⁴⁷ Manchachikuy misk'ana, jatun llakiy, pampachasqa kaypis noqaykuman chayawarqayku.

⁴⁸ Ñawiymanta waqayqa mayu yaku jina puririn, munasqa llajtay thuñisqa kasqanmanta.

⁴⁹ Mana samariyta ñawiymantaqa waqaylla surumun, manapunitaj samariyta tarinichu,

⁵⁰ Tata Dios janaj pachamanta qhawarimuspa khuyakunawaykukama.

⁵¹ Llajtaypi sipaskunata ñak'arejta rikusqayrayku, sonqoy maytapuni nanawan.

⁵² Awqaykoqa p'isqota jina mana imallamanta jap'iyta munawayku.

⁵³ Kawsashajta pujyuman wijch'uykuwanku, pujyutataj rumiwan kirpaykunku.

⁵⁴ Yakoqa umay patata wasarerqa, chaypachataj nerqani: Kunanqa wañupusajchá, nispa.

⁵⁵ Jinapi, Tata Diosníy, noqaqa pujyu ukhumantapacha sutiykita qhaparikorqani.

⁵⁶ Qantaj qhaparikamusqayta uyariwarqanki. Jinallataj mañakususqaytapis kasuwarqanki.

⁵⁷ Qhaparikamorqayki, chay p'unchay qayllaykamuwaspa, niwarqanki: Ama manchachikuychu, nispa.

⁵⁸ Tukuyta Kamachej Dios, noqaman kutikuwaspa, sayaykorqanki, kawsayniytataj qhespichiwarqanki.

⁵⁹ Qan, Tata Dios, manakajmanta ñak'arichiwasqankuta rikunki. Chayrayku qan justiciata ruwaway ari.

⁶⁰ Qan rikushanki imatachus ruwanawankupaj wakichikusqankuta, noqaj contraypi tukuy yuyasqankutapis yachallankitaj.

⁶¹ Tata Dios, qan uyarishanki sonqoyta nanachinawankupaj jina parlasqankuta, tukuy imata contraypi wakichisqankutapis.

⁶² Jinallataj tukuy awqaykuna parlasqankuta, yuyasqankutapis uyarinki, sapa p'unchay noqaj contrallaypipuni parlasqankuta.

⁶³ Qhawariy, tukuy ruwasqankupi noqallamantapuni takispa asikunku.

⁶⁴ Kunanqa, Tata Dios, paykunaman imatachus ruwasqankuman jina kutichipuy.

⁶⁵ Sonqonkuta astawan rumiyachiy, maldicisqaykipis paykunaman chayachun.

⁶⁶ Chay k'araj phiñakuyniykiwan paykunata qhatiykuy, kay jallp'a patamantataj chay runakunata chinkachiy ari, Tata Dios.